വി ഉപഭോക്താക്കൾക്ക് ഇനി വാട്സ്ആപ്പ് വഴി റീചാർജ് ചെയ്യാം, ബില്ലുമടയ്ക്കാം

മുംബൈ: രാജ്യത്തെ മുൻനിര ടെലികോം കമ്പനിയായ വോഡഫോൺ ഐഡിയ ലിമിറ്റഡ് പുതിയ ഡിജിറ്റൽ പേയ്‌മെന്റ് സംവിധാനം ആരംഭിച്ചു. ജനകീയ മെസേജിങ് ആപ്ലിക്കേഷനായ വാട്സ്ആപ്പ് വഴിയാണ് കമ്പനി ഡിജിറ്റൽ പേയ്മെന്റ് സേവനങ്ങൾ ലഭ്യമാക്കുക. പ്രീപെയ്ഡ്, പോസ്റ്റ് പെയ്ഡ് ഉപഭോക്താക്കൾക്ക് വാട്സ്ആപ്പ് വഴി എളുപ്പത്തിൽ ബില്ലുകൾ അടയ്ക്കാനും റീചാർജ് ചെയ്യാനും സാധിക്കുമെന്ന് വോഡഫോൺ ഐഡിയ പ്രസ്താവനയിൽ പറഞ്ഞു.

വെർച്വൽ ഏജന്റ് അഥവാ വിഐസി എന്നറിയപ്പെടുന്ന ഈ സേവനം യുപിഐ ഇടപാടുകളും വാഗ്ദാനം ചെയ്യും. വെറും രണ്ട് ക്ലിക്കുകളിലൂടെ ഉപഭോക്താക്കൾക്ക് ഏത് പ്രീപെയ്ഡ് പായ്ക്കും തൽക്ഷണം റീചാർജ് ചെയ്യാനും കഴിയും. വിഐസി ഉപയോഗിക്കുന്ന വോഡഫോൺ ഐഡിയ ഉപഭോക്താക്കൾക്ക് എസ്എംഎസ് വഴി ഒരു ലിങ്ക് ലഭിക്കുമെന്നും ഇതുവഴി എളുപ്പത്തിൽ പേയ്‌മെന്റുകളും റീചാർജുകളും നടത്താമെന്നും വി വ്യക്തമാക്കി.

Also Read: വിമാന യാത്രകൾക്ക് ഇനി ചിലവേറും; ടിക്കറ്റ് നിരക്ക് ഉയർത്തി

കഴിഞ്ഞ വർഷം കമ്പനി വാട്‌സ്ആപ്പിൽ ചാറ്റ്ബോട്ട് വിഐസി പുറത്തിറക്കിയിരുന്നു. ബിൽ പേയ്‌മെന്റ്, റീചാർജ്, പ്ലാൻ ആക്റ്റിവേഷൻ, പുതിയ കണക്ഷൻ, ഡാറ്റ ബാലൻസ്, ബിൽ അഭ്യർത്ഥന എന്നിവയുൾപ്പെടെയുള്ള സേവനങ്ങളിൽ തൽക്ഷണ പ്രതികരണം ലഭിക്കാൻ വിഐസി ഉപഭോക്താക്കളെ സഹായിക്കും.