ഇന്ത്യന്‍ കമ്പനികളുടെ ചരിത്രത്തിലാദ്യം; കോടികളുടെ നഷ്ടവുമായി വോഡഫോണ്‍ ഐഡിയ

മുംബൈ: 2020 മാർച്ച് 31ന് അവസാനിച്ച സാമ്പത്തിക വർഷത്തിൽ 73,878 കോടി രൂപയുടെ അറ്റ നഷ്ടം രേഖപ്പെടുത്തി രാജ്യത്തെ മൂന്നാമത്തെ വലിയ ടെലികോം ഓപ്പറേറ്ററായ വോഡഫോണ്‍ ഐഡിയ. ചരിത്രത്തിലാദ്യമായാണ് ഇത്രയും വലിയ നഷ്ടം ഒരു ഇന്ത്യന്‍ കമ്പനി രേഖപ്പെടുത്തുന്നത്. ഇന്ത്യന്‍ കോര്‍പ്പറേറ്റ് വ്യവസായ ചരിത്രത്തിലെ ഏറ്റവും ഉയര്‍ന്ന വാര്‍ഷിക നഷ്ടമാണിതെന്നും സാമ്പത്തിക വിദഗ്ധർ ചൂണ്ടിക്കാട്ടുന്നു.

ടെലികോം ഇതര വരുമാനം നിയമപരമായ കുടിശ്ശിക കണക്കാക്കുന്നതിൽ ഉൾപ്പെടുത്തണമെന്ന് സുപ്രീംകോടതി ഉത്തരവിട്ടതിനെത്തുടർന്ന് 51,400 കോടി രൂപ കമ്പനി കുടിശ്ശികയായി അടച്ചിരുന്നു. ഇതാണ് ഈ സാമ്പത്തിക വർഷത്തിൽ നഷ്ടം കൂടാൻ കാരണമായത്. മാർച്ച് പാദത്തിലെ അറ്റ നഷ്ടം 11,643.5 കോടി രൂപയായി വർദ്ധിച്ചതായി റെഗുലേറ്ററി ഫയലിംഗിൽ വോഡഫോൺ ഐഡിയ (വിഐഎൽ) അറിയിച്ചിരുന്നു. കഴിഞ്ഞ വർഷം ഇതേ കാലയളവിൽ 4,881.9 കോടി രൂപയും ഒക്ടോബർ-ഡിസംബർ പാദത്തിൽ 6,438.8 കോടി രൂപയുമായിരുന്നു കമ്പനിയുടെ നഷ്ടം.

Also Read: ഉത്പന്നം ഏത് രാജ്യത്തിന്റേതെന്ന് വ്യക്തമാക്കണം; ഇ-കൊമോഴ്സ് പ്ലാറ്റ്ഫോമുകളോട് വിശദീകരണം തേടി കോടതി

2016-17 സാമ്പത്തിക വർഷത്തിൽ കമ്പനിയുടെ ക്രമീകരിച്ച മൊത്ത വരുമാന (എജിആർ) കുടിശ്ശിക 58,254 കോടി രൂപയാണെന്നായിരുന്നു ടെലികോം വകുപ്പിന്റെ കണക്ക്. എന്നാൽ ചില കംപ്യൂട്ടേഷണൽ പിശകുകളും പേയ്‌മെന്റുകളും ക്രമീകരിച്ച ശേഷം കുടിശ്ശിക 46,000 കോടി രൂപയായി കുറഞ്ഞതായി കമ്പനി വകുപ്പിനെ അറിയിച്ചു. മൊത്തം കുടിശ്ശികയിൽ ഇതുവരെ 6,854.4 കോടി രൂപയാണ് കമ്പനി അടച്ചത്.

ഈ സാമ്പത്തിക വർഷത്തെ നാലാംപാദത്തിൽ കമ്പനിയുടെ വരുമാനം 11,754.2 കോടി രൂപയും മൊത്തവരുമാനം 44,957.5 കോടി രൂപയുമാണ്. 2019 സാമ്പത്തിക വർഷത്തിൽ ഇത് 37,092.5 കോടി രൂപയായിരുന്നു. 2018-19 സാമ്പത്തിക വര്‍ഷത്തിലെ 14,603.9 കോടിയില്‍ നിന്നാണ് ഈ സാമ്പത്തിക വര്‍ഷത്തില്‍ വോഡഫോണ്‍ ഐഡിയയുടെ നഷ്ടം 73,878.1 കോടി രൂപയിലേക്കുയര്‍ന്നത്.