റിലയൻസ് ജിയോയിലെ ഫേസ്ബുക്ക് നിക്ഷേപം എന്തിന്?

കൊച്ചി: കൊറോണക്കാലത്ത് റിലയൻസ് ജിയോയിൽ വൻ നിക്ഷേപം നടത്തിയിരിക്കുകയാണ് ഫേസ്ബുക്ക്. ജിയോയുടെ 10 ശതമാനത്തോളം ഓഹരികൾ ഏതാണ്ട് 43,574 കോടി രൂപയ്ക്കാണ് ഫേസ്ബുക്ക് വാങ്ങുന്നത്. റിലയൻസ് ഇൻഡസ്ട്രീസിൻറെ കടഭാരം ലഘൂകരിയ്ക്കുക എന്ന മുകേഷ് അംബാനിയുടെ പ്രഖ്യാപിത ലക്ഷ്യത്തിന് കരുത്ത് പകരുന്നതാണ് നീക്കം. ഇന്ത്യയിലെ ടെക്നോളജി രംഗത്തെ ഏറ്റവും വലിയ നിക്ഷേപങ്ങളിൽ ഒന്നും.

ഫേസ് ബുക്കിനും വാട്സാപ്പിനും ഏറ്റും കൂടുതൽ ഉപഭോക്താക്കൾ ഉള്ള രാജ്യങ്ങളിൽ ഒന്നാണ് ഇന്ത്യ. ഇന്ത്യയുടെ ടെലികോം രംഗത്ത് ഏതാനും നാളുകൾ കൊണ്ട് ഡിസ്റപ്ഷൻ തീർത്ത ജിയോയുമായുള്ള കൂട്ടുകെട്ട് ഇന്ത്യയിൽ ബിസിനസ് വിപുലീകരണത്തിന് ഫേസ്ബുക്കിന് സഹായകരമാകും.

Also Read: ഫേസ് ബുക്ക് ജിയോ ഓഹരികൾ വാങ്ങി; വരുന്നത് വാട്‍സാപ്പ് ഷോപ്പിങോ?

ഫേസ്ബുക്കിൻറെ പ്ലാറ്റ് ഫോം പ്രയോജനപ്പെടുത്തി ഷോപ്പിങ് മുതൽ സോഷ്യൽ നെറ്റ് വർക്കിങ് വരെ സാധ്യമാക്കുന്ന ഒരു വൺ സ്റ്റോപ് ആപ്പ് റിലയൻസ് രൂപീകരിയ്ക്കുമെന്ന റിപ്പോർട്ടുകൾ അടുത്തിടെ പുറത്ത് വന്നിരുന്നു. ആറു കോടിയോളം വരുന്ന ചെറുകിട ബിസിനസുകാരിലേയ്ക്ക് എത്താനും ഇത് സഹായകരമാകും. റിലയൻസിൻറെ ജിയോമാർട്ടുമായുള്ള പങ്കാളിത്തത്തിലൂടെയാണിത്.

നിലവിലെ ഫേസ്ബുക്കിൻറെ ഉപഭോക്താക്കൾക്ക് പുറമെ ജിയോയുടെ 38.8 കോടിയോളം വരുന്ന ഉപഭോക്താക്കളെ കൂടെ അധികം നേടാൻ ജിയോയുമായുള്ള കൂട്ടുകെട്ടിലൂടെ ഫേസ്ബുക്കിനാകും.
ഇരു കമ്പനികളുമായുള്ള കൂട്ടുകെട്ട് രാജ്യത്തെ ഡിജിറ്റൽ ഇന്ത്യ പദ്ധതികൾക്കും കരുത്ത് പകരും.

Also Read: ഡിജിറ്റൽ പെയ്മെൻറുകളും സോഷ്യൽ നെറ്റ് വർക്കിങ്ങും എല്ലാം ഇനി ഒറ്റ ആപ്പിൽ..

ഡിജിറ്റൽ ഇക്കണോമി രംഗത്തെ ഇന്ത്യയുടെ സാധ്യതകൾ ഉപയോഗപ്പെടുത്തുക കൂടെയാണ് ഫേസ്ബുക്കിൻറെ ലക്ഷ്യം. ഇന്ത്യയുടെ ഡിജിറ്റൽ പദ്ധതികൾക്കും ലോകത്തിലെ തന്നെ ഏറ്റവും വലിയ സോഷ്യൽ നെറ്റ് വർക്കിങ് കമ്പനിയുമായുള്ള കൂട്ടുകെട്ട് കരുത്ത് പകരും. ഫേസ്ബുക്ക് ഇത് ആദ്യമായല്ല ഒരു ഇന്ത്യൻ കമ്പനിയിൽ നിക്ഷേപം നടത്തുന്നത്. ഓൺലൈൻ എഡ്യുക്കേഷൻ ആപ്പായ മീഷോയിലും കമ്പനി നിക്ഷേപം നടത്തിയിരുന്നു.

റിലയൻസിനെ സംബന്ധിച്ചിടത്തോളം കടബാധ്യതകൾ തീർക്കുന്നതിൻറെയും ബിസിനസ് വിപുലീകരണത്തിൻറെയും ഭാഗമാണ് ഫേസ്ബുക്കുമായുള്ള ഈ കൂട്ടുകെട്ട്. റിലയൻസ് ഇൻഡസ്ട്രീസ് അടുത്തിടയായി വിവിധ ബിസിനസുകളിലെ ഓഹരികൾ വിറ്റഴിച്ചിട്ടുണ്ട്.