ലോകത്തിലെ ഏറ്റവും ദൈർഘ്യമേറിയ നദീജല ആഡംബരക്രൂസ് എംവി ഗംഗാ വിലാസ് സർവീസ് ആരംഭിച്ചു. 51 ദിവസം കൊണ്ട് 3,200 കിലോമീറ്റർ താണ്ടുന്ന യാത്രക്ക് 12.59 ലക്ഷം രൂപയാണ് ടിക്കറ്റ് നിരക്ക്. വാരണാസിയിൽ നിന്ന് ആരംഭിച്ച് ബംഗ്ലാദേശിലൂടെ അസമിലെ ദിബ്രുഗഡിൽ ആണ് യാത്ര പൂർത്തിയാകുക. 51 ദിവസം നീണ്ട യാത്രയിൽ ഇന്ത്യയിലെയും ബംഗ്ലാദേശിലെയും 27 നദീതടങ്ങൾ താണ്ടിയാണ് യാത്ര. ലോക പൈതൃക കേന്ദ്രങ്ങളും ദേശീയ പാർക്കുകളും ഉൾപ്പെടെ പ്രധാന വിനോദ സഞ്ചാര കേന്ദ്രങ്ങൾ സന്ദർശിക്കും. നദീജല ടൂറിസം രംഗത്ത് പുതിയ അധ്യായമെഴുതുന്ന ഒരു പദ്ധതിയാണിത്.
Also Read: പ്രവാസികൾ ഇന്ത്യൻ അംബാസഡർമാർ; നാട്ടിലേക്ക് അയക്കുന്ന പണത്തിൽ വർധന
എന്തൊക്കെ സവിശേഷതകളാണ് പദ്ധതിയിൽ ഉള്ളത്?
36 വിനോദസഞ്ചാരികളെ ഉൾക്കൊള്ളാൻ കഴിയുന്ന മൂന്ന് ഡെക്കുകളും ആഡംബര 18 സ്യൂട്ടുകളുമാണ് ക്രൂസിൽ ഉള്ളത്. 62.5 മീറ്റർ നീളവും 12.8 മീറ്റർ വീതിയുമുള്ള ആഡംബര ക്രൂസ് യാത്രക്കാർക്ക് ആവശ്യമായ എല്ലാ സുഖ സൗകര്യങ്ങളോടും കൂടെ രൂപകൽപ്പന ചെയ്തിരിക്കുന്നതാണ്. കൺവേർട്ടിബിൾ ബെഡുകളും എൽഇഡി ടിവിയും എല്ലാം ഉൾപ്പെടെയുമുള്ളതാണ് ക്രൂസ്. ഈ യാത്രയിൽ യുപി, ബിഹാർ, പശ്ചിമ ബംഗാൾ, ബംഗ്ലാദേശ്, അസം എന്നീ സംസ്ഥാനങ്ങളിലെ മൊത്തം 27 നദീതടങ്ങളും മൂന്ന് പ്രധാന നദികളും ഉൾപ്പെടുന്നു. ഗംഗ, ബ്രഹ്മപുത്ര, മേഘ്ന നദികളിലൂടെയാണ് യാത്ര.
ബംഗാളിൽ, ഗംഗാ വിലാസ് ക്രൂയിസ് ഭഗീരഥി, ഹൂഗ്ലി, മലത, ബിദ്യാവതി, സുന്ദർബൻസ് എന്നീ അഞ്ച് നദീതടങ്ങളിൽ പ്രവേശിക്കും. ലോകത്തിലെ ഏറ്റവും വലിയ റിവർ ക്രൂയിസ് ബംഗ്ലാദേശിലെ മേഘ്ന, പദ്മ, ജമുന എന്നിവയിലൂടെ കടന്നുപോകുകയും തുടർന്ന് അസമിലെ ബ്രഹ്മപുത്രയിൽ എത്തുകയും ചെയ്യും. ഗംഗാ വിലാസ് റൂട്ടിൽ പട്ന (ബീഹാർ), സാഹിബ്ഗഞ്ച് (ജാർഖണ്ഡ്), കൊൽക്കത്ത (പശ്ചിമ ബംഗാൾ), ധാക്ക (ബംഗ്ലാദേശ്), ഗുവാഹത്തി (അസം) തുടങ്ങിയ പ്രധാന നഗരങ്ങളും ഉൾപ്പെടുന്നു.
കൂടാതെ ബീഹാർ സ്കൂൾ ഓഫ് യോഗ, വിക്രംശില യൂണിവേഴ്സിറ്റി തുടങ്ങിയ ഇടങ്ങളും യാത്രക്കാർക്ക് സന്ദർശിക്കാനാകും.
Read Latest Business News and Malayalam News