ലോകത്തിലെ ഏറ്റവും വിലകൂടിയ മാസ്ക് റെഡി, വില 11 കോടി രൂപ

ഇസ്രായേൽ: ലോകത്തിലെ ഏറ്റവും വിലകൂടിയ കൊവിഡ്-19 ഫെയ്സ് മാസ്ക് പുറത്തിറക്കി ഇസ്രായേൽ ആഡംബര ജ്വല്ലറി ബ്രാൻഡായ യെവൽ. 18 കാരറ്റ് സ്വർണം കൊണ്ടുണ്ടാക്കിയ മാസ്ക്കിൽ കറുപ്പും വെളുപ്പും നിറത്തിലുള്ള 3,608 വജ്രങ്ങളാണ് പതിപ്പിച്ചിരിക്കുന്നത്. 1.5 മില്യൺ ഡോളർ (11 കോടി രൂപ) ആണ് മാസ്കിന്റെ വില. ആകെ 250 ഗ്രാം ആണ് മാസ്കിന്റെ ഭാരം. ഇത് സാധാരണ ശസ്ത്രക്രിയ മാസ്കിനേക്കാൾ 100 ഇരട്ടി ഭാരം വരും.

ഓഗസ്റ്റിലാണ് മാസ്ക്കിന്റെ നിർമ്മാണ് ആരംഭിച്ചത്. ഡിസ്പോസിബിൾ എൻ -99 മാസ്ക് അകത്തേക്ക് കടത്തുന്നതിനായി പ്രത്യേകം സ്ലോട്ട് ഉപയോഗിച്ചാണ് ഇത് രൂപകൽപ്പന ചെയ്തിരിക്കുന്നത് യെവൽ കമ്പനിയുടെ ഉടമയും പ്രശസ്ത ഡിസൈനറുമായ ഐസക് ലെവി പറഞ്ഞു. 25 കരകൗശലത്തൊഴിലാളികളാണ് മാസ്ക് നിർമ്മാണത്തിന പിന്നിൽ. മുഖത്ത് ധരിക്കാൻ സാധിക്കുന്നതും ഭാരക്കുറവുള്ളതുമാമായ മാസ്ക് തയ്യാറാക്കുക എന്നതായിരുന്നു പ്രധാന വെല്ലുവിളി. ടീമിന്റെ കൂട്ടായ പ്രവർത്തനമാണ് ഈ വെല്ലുവിളി മറികടക്കാൻ സഹായകമായതെന്നും ഐസക് ലെവി കൂട്ടിച്ചേർത്തു.

Also Read: 10 കോടി രൂപയുടെ ചെറുകിട സംരംഭങ്ങൾ തുടങ്ങാൻ മുൻകൂർ അനുമതി വേണ്ട, നിക്ഷേപ സൗഹൃദ പദ്ധതിയുമായി സർക്കാർ

ലോസ് ഏഞ്ചൽസ് ആസ്ഥാനമായുള്ള ചൈനീസ് ബിസിനസുകാരനാണ് മാസ്ക്കിന് ഓർഡർ നൽകിയത്. ഐഡന്റിന്റി വെളിപ്പെടുത്തരുതെന്ന് പ്രത്യേക നിർദ്ദേശമുള്ളതിനാൽ കമ്പനി അദ്ദേഹത്തെക്കുറിച്ചുള്ള കൂടുതൽ വിവരങ്ങൾ പുറത്തുവിട്ടില്ല. കൊറോണ വൈറസ് പകർച്ചവ്യാധിക്കിടെ യുഎസിലെയും ഇസ്രായേലിലെയും 150 ജീവനക്കാരെ പിന്തുണയ്ക്കാൻ ഈ അവസരം വിനിയോഗിക്കാനായതിൽ സന്തോഷമുണ്ടെന്നും അദ്ദേഹം പറഞ്ഞു.