‘അനന്ത വിജയം’ വിറ്റു; കിട്ടിയ 5 ലക്ഷം രൂപ നെയ്യാറ്റിൻക്കരയിലെ കുട്ടികൾക്ക് സമ്മാനിച്ച് ദമ്പതികൾ

തിരുവനന്തപുരം: മോതിരം വിറ്റ് കിട്ടിയ അഞ്ച് ലക്ഷം രൂപ നെയ്യാറ്റിൻകരയിൽ പൊള്ളലേറ്റ് മരിച്ച രാജൻ-അമ്പിളി ദമ്പതികളുടെ മക്കൾക്ക് സമ്മാനിക്കാനൊരുങ്ങി ദമ്പതികൾ. എഴുത്തുകാരി ലക്ഷ്മി രാജീവും ഭർത്താവ് രാജീവുമാണ് ഈ സൻമനസ്സിന് പിന്നിൽ. ‘അനന്ത വിജയം’ എന്ന വിലപ്പിടിപ്പുള്ള അപൂർവ്വ മോതിരമാണ് ദമ്പതികൾ വിറ്റത്.

രാജന്റെയും അമ്പിളിയുടെയും മക്കൾ അനാഥരായ പശ്ചാത്തലത്തിൽ മോതിരം വിൽക്കാനും ആ തുക കുട്ടികൾക്ക് കൈമാറാനുമായിരുന്നു ലക്ഷ്മി രാജീവിന്റെ തീരുമാനം. ഇതേക്കുറിച്ച് നാല് ദിവസം മുൻപ് ലക്ഷ്മി ഫേയ്സ്ബുക്കിൽ പോസ്റ്റിട്ടിരുന്നു. കോഴിക്കോട് സുരഭി മാൾ ഉടമ പ്രഭ ഗോപാലൻ ആണ് അഞ്ച് ലക്ഷം നൽകി മോതിരം വാങ്ങിയത്. മന്ത്രി കടകംപള്ളി സുരേന്ദ്രന്റെ സാന്നിധ്യത്തിൽ ഇന്ന് ലക്ഷ്മി രാജീവും ഗണേഷും കുട്ടികളുടെ താമസ സ്ഥലത്തെത്തി ചെക് കൈമാറും.

Also Read: പണക്കാരനാകണമോ? വീട്ടിൽനിന്ന് ഇതൊക്കെ ഒഴിവാക്കാം !

പൂജപ്പുര സ്വദേശി ഗണേഷ് സുബ്രഹ്മണ്യമാണ് മോതിരം നിർമിച്ചത്. ശ്രീപത്മനാഭ സ്വാമിയെ മോതിരത്തിൽ ആലേഖനം ചെയ്തിട്ടുണ്ട്. എന്നാൽ ഇത് ലെൻസ് വച്ച് നോക്കിയാലേ കാണാൻ സാധിക്കുകയുള്ളൂ. ഇതേ രൂപത്തിലുള്ള മോതിരം ഉത്രാടം തിരുനാൾ മാർത്താണ്ഡ വർമയ്ക്കും നടൻ മോഹൻലാലിനും ഗണേഷ് നിർമിച്ച് നൽകിയിട്ടുണ്ട്. ലക്ഷ്മി രാജീവിനാണ് മൂന്നാമതായി ഗണേഷ് അനന്ത വിജയം നിർമ്മിച്ച് നൽകുന്നത്. മൂന്ന് വർഷം മുൻപായിരുന്നു ലക്ഷ്മിക്ക് ഗണേഷ് മോതിരം സമ്മാനിച്ചത്.