പപ്പായ ഇലയുടെ തണ്ടിൽ നിന്ന് ഉഗ്രൻ സ്ട്രോ; മികച്ച ഇക്കോഫ്രണ്ട്ലി ഉത്പന്നവുമായി ഒരു സ്റ്റാർട്ടപ്പ്

കൊച്ചി: ഒറ്റ ഉപയോഗത്തിനു ശേഷം പ്രകൃതിയിലേക്ക് വലിച്ചെറിയുന്ന പ്ലാസ്റ്റിക് സ്ട്രോയ്ക്ക് പകരം ഉഗ്രൻ ഒരു പരിസ്ഥിതി സൗഹാർദ്ദ സ്ട്രോയുമായി എത്തിയിരിക്കുകയാണ് കേരളത്തിൽ നിന്നൊരു സ്റ്റാർട്ടപ്പ്. പപ്പായ ഇലയുടെ തണ്ടിൽ നിന്ന് ആരോഗ്യകരമായ സ്ട്രോകൾ നിർമിച്ച് വിപണിയിൽ എത്തിക്കുന്നത് ഗ്രീനിക്ക് എന്ന സ്റ്റാർട്ടപ്പാണ്.

ഫാരിഖ്, പ്രവീൺ എന്നീ യുവ സംരംഭകരാണ് കണ്ടു പിടിത്തത്തിന് പിന്നിൽ. ശാസ്ത്രജ്ഞരുടെ സഹായത്തോടെ
ഇവർ സ്വയം വികസിപ്പിച്ചെടുത്തതാണ് ഇതിനായുള്ള സാങ്കേതിക വിദ്യ. പപ്പായ ഇലതണ്ട് ശുദ്ധീകരിച്ച് ആറ് മാസം വരെ കേടുകൂടാതെ ഇരിയ്ക്കുന്ന വിധത്തിലുള്ളതാണ് സാങ്കേതിക വിദ്യ.


ലോകത്ത് കൂടുതൽ പപ്പായ ഉത്പാദിപ്പിക്കുന്ന രാജ്യമായ ഇന്ത്യയിൽ പപ്പായ കൃഷി കൂടുതൽ ആദായകരമാക്കുന്നത് കൂടെയാണ് ഈ കണ്ടുപിടിത്തം. നിലവിൽ തിരുവനന്തപുരം കേന്ദ്രീകരിച്ചാണ് ഈ സ്റ്റാർട്ടപ്പിൻറെ പ്രവർത്തനം. കേരളം,കർണാടക തുടങ്ങിയ വിപണികളിൽ ഉത്പന്നം എത്തിയ്ക്കുന്നതിനൊപ്പം മിഡിൽ ഈസ്റ്റ് രാജ്യങ്ങളിലേക്ക് കയറ്റുമതി ചെയ്യാനും ഇവർക്ക് പദ്ധതിയുണ്ട്. ഒരു പാക്കറ്റിൽ 50-100 സ്ട്രോകൾ ആണ് ഉണ്ടാവുക. ഒരു സ്ട്രോയ്ക്ക് 1-1.50 രൂപയാണ് വില.




കഴിഞ്ഞ ഏഴു വർഷങ്ങളായി ബിസിനസ് രംഗത്തുള്ള ഈ ചങ്ങാതിമാർക്ക് പ്ലാസ്റ്റിക് നിരോധനം ആണ് ഉത്പന്നങ്ങൾ വാണിജ്യാടിസ്ഥാനത്തിൽ കൂടുതൽ വിപണിയിൽ എത്തിയ്ക്കാനുള്ള കരുത്ത് നൽകിയത്. ഇലകൊണ്ടുള്ള പ്ലേറ്റുകൾ, കപ്പുകൾ തുടങ്ങിയ ഉത്പന്നങ്ങളും ഗ്രീൻകിക്ക് പുറത്തിറക്കുന്നുണ്ട്. പപ്പായ കർഷകർക്കും സംരംഭകർക്കും ഒക്കെ സാങ്കേതിക വിദ്യ കൈമാറാനും ഇരുവരും തയ്യാറാണ്.