വനിത ജീവനക്കാർക്ക് ആർത്തവ അവധി അനുവദിച്ച്​ സൊ​മാറ്റോ

ഡൽഹി: വനിത ജീവനക്കാർക്ക് വർഷത്തിൽ 10 ദിവസത്തെ ആർത്തവ അവധി അനുവദിച്ച് ഓൺലൈൻ ഭക്ഷ്യവിതരണ കമ്പനിയായ സൊമാറ്റോ. പീരിയഡ് അവധിക്ക് അപേക്ഷിക്കുന്നതിൽ നാണക്കേടോ മടി കാണിക്കേണ്ടതില്ലെന്ന് സൊമാറ്റോ ചീഫ് എക്സിക്യൂട്ടീവ് ദീപിന്ദർ ഗോയൽ പറഞ്ഞു. ശനിയാഴ്ച ജീവനക്കാർക്ക് അയച്ച ഇമെയിലിൽ ആണ് അദ്ദേഹം ഇക്കാര്യം അറിയിച്ചത്. ആർത്തവ അവധിയിലാണെന്ന് ഓഫീസ് ഗ്രൂപ്പുകളിലും ഇമെയിലിലും ജീവനക്കാർക്ക് യാതൊരു മടിയുമില്ലാതെ പറയാമെന്നും ദീപിന്ദർ ഗോയൽ വ്യക്തമാക്കി.

ഇത് ജീവിതത്തിന്റെ ഒരു ഭാഗമാണ്. ഈസമയത്ത് സ്ത്രീകൾ കടന്നുപോകുന്നതെങ്ങനെയാണെന്ന് പൂർണ്ണമായി മനസ്സിലാകുന്നില്ലെങ്കിലും അവർക്ക് വിശ്രമം ആവശ്യമാണെന്ന് അറിയാം. ധാരാളം സ്ത്രീകൾക്ക് ആർത്തവം വളരെ വേദനാജനകമാണ്. സോമാറ്റോയിൽ ഒരു യഥാർത്ഥ സഹകരണ സംസ്കാരം വളർത്തിയെടുക്കാൻ ആഗ്രഹിക്കുന്നുവെങ്കിൽ അവരെ പിന്തുണയ്ക്കേണ്ടതുണ്ടെന്നും അദ്ദേഹം പറഞ്ഞു.

Also Read: ലോകത്തെ നാലാമത്തെ വലിയ സമ്പന്നനായി മുകേഷ് അംബാനി

ഗുരുഗ്രാം ആസ്ഥാനമാക്കി 2008ൽ പ്രവർത്തനമാരംഭിച്ച സൊമാറ്റോ ഇന്ത്യയിലെ ഏറ്റവും അറിയപ്പെടുന്ന കമ്പനികളിൽ ഒന്നാണ്. അയ്യായിരത്തിലധികം പേരാണ് സൊമാറ്റോയിൽ ജോലി ചെയ്യുന്നത്. ഇന്ത്യയിൽ ലക്ഷണക്കണക്കിന് സ്ത്രീകളും പെൺകുട്ടികളും ആർത്തവസമയത്ത് കടുത്ത വിവേചനങ്ങളും അവഗണന മൂലമുള്ള ആരോഗ്യപ്രശ്നങ്ങളും നേരിടുന്നുണ്ട്.