തകർന്നടിഞ്ഞ് ബിറ്റ്‌കോയിൻ; മൂല്യം 16 മാസത്തെ താഴ്ചയിൽ

ഓഹരി വിപണികൾക്കൊപ്പം കൂപ്പുകുത്തി ക്രിപ്‌റ്റോ വിപണിയും. ലോകത്തിലെ ഏറ്റവും വലിയ ക്രിപ്റ്റോകറൻസിയായ ബിറ്റ്കോയിന്റെ മൂല്യം ഇന്നു രണ്ടു ശതമാനത്തോളം ഇടിഞ്ഞു. നിലവിൽ 28,379.26 ഡോളറിലാണ് ബിറ്റ്‌കോയിൻ വ്യാപാരം പുരോഗമിക്കുന്നത്. ഡിജിറ്റൽ കറൻസിയുടെ 16 മാസത്തിനിടയിലെ ഏറ്റവും കുറഞ്ഞ മൂല്യമാണിത്. ഒരു മാസത്തിലേറെയായി മേഖല നഷ്ടം തുടരുകയാണ്. ആഗോളതലത്തിൽ ചുരുങ്ങിയ സമയംകൊണ്ട് ക്രിപ്‌റ്റോ നിക്ഷേപങ്ങളുടെ മൂല്യം 800 ബില്യൺ ഡോളർ ഇടിഞ്ഞ് 1.4 ട്രില്യൺ ഡോളറിലെത്തി.

Also Read: വീണ്ടും ട്വിസ്റ്റ്; ട്വിറ്റര്‍ തലപ്പത്ത് ജാക്ക് ഡോര്‍സിയോ? മൗനം വെടിഞ്ഞ് മുന്‍ സി.ഇ.ഒ

ക്രിപ്‌റ്റോ വിപണിയുടെ 40 ശതമാനത്തോളം വരുന്ന ബിറ്റ്കോയിനുകൾ ചൊവ്വാഴ്ച 10 മാസത്തെ ഏറ്റവും താഴ്ന്ന നിലയിലെത്തിയിരുന്നു. എന്നാൽ ഇത് പിന്നീട് 31,540 ഡോളറിലേക്ക് കുതിച്ചു. കഴിഞ്ഞ വർഷം നവംബർ 10 ന് കറൻസി അതിന്റെ എക്കാലത്തെയും ഉയർന്ന മൂല്യമായ 69,000 ഡോളർ രേഖപ്പെടുത്തിയിരുന്നു. അതുപ്രകാരം നിലവിലെ മൂല്യം 54 ശതമാനത്തോളം താഴെയാണ്. ഉയർന്ന ക്രൂഡ് ഓയിൽ വിലയും വിതരണ ശൃംഖലയിലെ തടസങ്ങളും കാരണം പണപ്പെരുപ്പം തടയുന്നതിനുള്ള പലിശ നിരക്ക് വർധനയെത്തുടർന്ന് ലോകമെമ്പാടുമുള്ള ഇക്വിറ്റി മാർക്കറ്റുകളെപ്പോലെ ക്രിപ്റ്റോകറൻസികളും ഇടിയുകയാണ്. ഇക്കഴിഞ്ഞ ഏപ്രിൽ രണ്ടിന്, മൊത്തം ക്രിപ്റ്റോ മാർക്കറ്റ് മൂല്യം 2.2 ട്രില്യൺ ഡോളറായിരുന്നു. കഴിഞ്ഞ വർഷം നവംബറിലെ മൂല്യമായ 2.9 ട്രില്യൺ ഡോളറിലും താഴെയാണിത്.

Also Read: ഓഫീസിൽ തിരിച്ചെത്താൻ ആവശ്യപ്പെട്ടതിന് പുലിവാൽ പിടിച്ച് ഇന്ത്യൻ കമ്പനി; ജോലി ഉപേക്ഷിച്ചത് 800 ജീവനക്കാർ

'വിശാലമായ സാമ്പത്തിക സാഹചര്യങ്ങളുമായി ബിറ്റ്‌കോയിൻ വളരെ ബന്ധപ്പെട്ടിരിക്കുന്നു. അതിന്റെ മുന്നോട്ടുള്ള പാത താൽക്കാലികമായെങ്കിലും കല്ലുകൾ നിറഞ്ഞതായിരിക്കും.'- ബ്ലോക്ക്‌ചെയിൻ ഡേറ്റ പ്രൊവൈഡർ ഗ്ലാസ്‌നോഡ് വ്യക്തമാക്കി. ബിറ്റ്‌കോയിനു പുറമേ മറ്റു ക്രിപ്‌റ്റോ കറൻസികളും വലിയ സമ്മർദമാണ് നേരിടുന്നത്. റഷ്യ- യുക്രൈൻ യുദ്ധം, പണപ്പെരുപ്പം, സ്വർണത്തിന്റെ കുതിപ്പ്, ഓഹരി വിപണികളുടെ ഇടിവ് തുടങ്ങിയ കാരണങ്ങളെല്ലാം ക്രിപ്‌റ്റോ വിപണികൾക്കു വെല്ലുവിളിയാണ്. രാജ്യത്ത് ക്രിപ്‌റ്റോ ബില്ല് അനന്തമായി നീളുന്നത് നിക്ഷേപകരെ അകറ്റുന്നുണ്ട്. അതിനിടെ ബജറ്റിൽ ഏർപ്പെടുത്തിയ അധിക നികുതിയും വെല്ലുവിളി തന്നെ. അ‌തേസമയം മൂല്യമിടിഞ്ഞ സാഹചര്യത്തിൽ നിക്ഷേപങ്ങൾ വർധിപ്പിക്കാൻ ഉപദേശിക്കുന്നവരും ഏറെയാണ്. നിലവിൽ പുതുനിക്ഷേപങ്ങൾക്കു മികച്ച സമയമാണെന്നാണു ക്രിപ്റ്റോ വിദഗ്ധരുടെ വാദം.