നിങ്ങൾ എവിടെ നിന്നു വായപ എടുത്താലും ആ വിവരങ്ങൾ ക്രെഡിറ്റ് റേറ്റിങ് ഏജൻസികൾക്ക് കൈമാറുകയാണ് ധനകാര്യ സ്ഥാപനങ്ങൾ ചെയ്യുന്നത്. ഇത് പരിശോധിക്കുന്നതിലൂടെ ഒരു വ്യക്തി കൃത്യമായി വായ്പ അടയ്ക്കുന്ന ആളാണോ എന്നറിയാൻ സാധിക്കും. ഇത് നോക്കിയാൽ അറിയാം ഭാവിയിൽ അടവ് തെറ്റാൻ സാധ്യതയുണ്ടോ ഇല്ലയോ എന്ന്.
നല്ല ഒരു ക്രെഡിറ്റ് സ്കോർ ഉണ്ടായിരിക്കേണ്ടതിന്റെ നാല് ഗുണങ്ങൾ ഇവിടെ പരിശോധിക്കുകയാണ്.
1. ഫിനാൻഷ്യൽ ഐഡന്റിറ്റി
ഒരു ക്രെഡിറ്റ് സ്കോർ നിങ്ങളുടെ ഫിനാൻഷ്യൽ ഐഡന്റിറ്റിയാണ്. 300 മുതൽ 850 വരെയുള്ള ഒരു മൂന്ന് ഡിജിറ്റ് നമ്പറാണിത്. ഇത് നിങ്ങളുടെ ക്രെഡിറ്റ് ഹിസ്റ്ററിയുടെ ചുരുക്കമാണെന്ന് പറയാം. നിങ്ങളുടെ പഴയ കാലത്തെ കടമെടുപ്പുകളും, തിരിച്ചടവുകളുമാണ് ഇവിടെ പ്രതിഫലിക്കുന്നത്. എപ്പോഴൊക്കെ വായ്പയ്ക്ക് അപേക്ഷിച്ചാലും അപ്പോഴൊക്കെ പരിശോധിക്കുന്ന അതിപ്രധാനമായ കാര്യമാണിത്. ബാങ്കുകൾ നിങ്ങൾ വായ്പയുടെ അടവ് തെറ്റിച്ച ആളല്ലെന്ന് മനസ്സിലാക്കുന്നത് ഈ നമ്പറിന്റെ അടിസ്ഥാനത്തിലാണ്.
കുറഞ്ഞ ക്രെഡിറ്റ് സ്കോർ നിങ്ങൾക്ക് വായ്പ ലഭിക്കാനുള്ള സാധ്യതകൾ കുറയ്ക്കുകയാണ് ചെയ്യുക. ഇനി അഥവാ വായ്പ അനുവദിച്ചാൽത്തന്നെ ഉയർന്ന പലിശ നിരക്ക് പോലെയുള്ള കർശന വ്യവസ്ഥകളും ബാധകമായേക്കാം. നിങ്ങളുടെ തിരിച്ചടവ് ശേഷിയിൽ വായ്പ തരുന്ന സ്ഥാപനത്തിന് സംശയമുണ്ടാക്കുകയാണ് യഥാർത്ഥത്തിൽ കുറഞ്ഞ ക്രെഡിറ്റ് സ്കോർ ചെയ്യുന്നത്. കൃത്യമായി തിരിച്ച‌ടവുകൾ നടത്തി ക്രെഡിറ്റ് സ്കോർ ഉയർത്തിക്കൊണ്ടു വരാവുന്നതുമാണ്. എന്നാൽ ഒരു നല്ല ക്രെഡിറ്റ് സ്കോർ ഉള്ളതിന് ഒരുപാട് മെച്ചങ്ങളുണ്ട്. പെട്ടെന്ന് ലളിതമായി വായ്പ ലഭിക്കാൻ ഇത് സഹായിക്കും. പലിശ നിരക്കുകൾ കുറയ്ക്കാനും, കൂടുതൽ വായ്പ ആവശ്യപ്പെടാനും, ഉയർന്ന വായ്പാ പരിധികൾ അനുവദിച്ചു കിട്ടാനും നല്ല ക്രെഡിറ്റ് സ്കോർ സഹായകമാണ്.
2. കുറഞ്ഞ പലിശനിരക്ക്
പലിശനിരക്ക് നിങ്ങളുടെ ക്രെഡിറ്റ് സ്കോറുമായി നേരിട്ട് ബന്ധപ്പെട്ടിരിക്കുന്നു. അതായത് നിങ്ങൾക്ക് നല്ല ഒരു ക്രെഡിറ്റ് സ്കോറുണ്ടെങ്കിൽ ധനകാര്യസ്ഥാപനങ്ങൾ നിങ്ങൾക്ക് കൂടുതൽ ലാഭരകരമായ പലിശനിരക്കിൽ വായ്പ അനുവദിക്കുന്നതാണ്. ഏത് തരം വായ്പകൾക്കും കുറഞ്ഞ പലിശ നിരക്ക് ലഭ്യമാക്കുവാൻ മികച്ച ക്രെഡിറ്റ് സ്കോർ സഹായിക്കും.
3. ക്രെഡിറ്റ് കാർഡുകൾ ലഭിക്കാനും, ലോൺ കിട്ടാനും കൂടുതൽ സാധ്യത
മോശപ്പെട്ട ക്രെഡിറ്റ് ഹിസ്റ്ററിയാണ് നിങ്ങൾക്കുള്ളതെങ്കിൽ പുതിയ ഒരു ക്രെഡിറ്റ് കാർഡ് ലഭിക്കുക, ഒരു വായ്പ അനുവദിച്ചു കിട്ടുക എന്നിവയൊക്കെ പ്രയാസമായി മാറും. വളരെ നല്ല ഒരു ക്രെഡിറ്റ് ഹിസ്റ്ററി ഉണ്ട് എന്നതു കൊണ്ടു മാത്രം വായ്പ അനുവദിച്ചു കിട്ടും എന്നല്ല ഇവിടെ അർത്ഥം. അതിനുള്ള സാധ്യത കൂടുതലാണെന്നാണ് അർത്ഥമാക്കുന്നത്. പൊതുവായി പറഞ്ഞാൽ നിങ്ങൾക്ക് 700 നു മുകളിൽ ക്രെഡിറ്റ് സ്കോറുണ്ടെങ്കിൽ നിങ്ങൾക്ക് ആത്മവിശ്വാസത്തോടെ ഒരു ക്രെഡിറ്റ് കാർഡിനോ, വായ്പയ്ക്കോ അപേക്ഷിക്കാം.
4. കൂടുതൽ വായ്പകൾക്കായി ചർച്ചകൾ നടത്താം
ക്രെഡിറ്റ് ഹിസ്റ്ററി മികച്ചതായി നിലനിർത്തുന്നത് ഒരു വ്യക്തിയുടെ സാമ്പത്തിക അച്ചടക്കത്തേയും കൂടിയാണ് കാണിക്കുന്നത്. ഇത് നിങ്ങളെ ഒരു പ്രൈം കാൻഡിഡേറ്റ് ആക്കി മാറ്റുകയാണ് ചെയ്യുന്നത്. ഇത് കൂടുതൽ തുക അനുവദിച്ചു കിട്ടുക, കുറഞ്ഞ പലിശനിരക്കിൽ വായ്പ ലഭ്യമാക്കുക, മറ്റ് ആനുകൂല്യങ്ങൾക്കായി ആവശ്യപ്പെടാനുള്ള അവസരം നേടുക എന്നിവയെല്ലാം മറ്റ് മെച്ചങ്ങളാണ്.
ഒരേ സമയം ഒന്നിലധികം വായ്പയ്ക്ക് അപേക്ഷിക്കാതിരിക്കാൻ നിങ്ങൾ ശ്രദ്ധിക്കേണ്ടതാണ്. ക്രെഡിറ്റ് ഹിസ്റ്ററിയിൽ എന്തെങ്കിലും പിഴവുകളുണ്ടോ എന്നറിയാനായി ഇടയ്ക്ക് ഇത് പരിശോധിക്കാവുന്നതാണ്.