ഇ-വാഹനങ്ങൾ വാങ്ങുമ്പോൾ ഉയർന്ന വിലയാണ് പ്രധാന ഘടകമായി മാറുന്നത്. എന്നാൽ ഉയരുന്ന ഇന്ധനവില പരിഗണിച്ച് ഇ-വാഹനങ്ങളിലേക്ക് മാറാൻ തയ്യാറായി നിൽക്കുന്നവരുണ്ട്. പരിസ്ഥിതി സൗഹാർദപരമായതിനാൽ കേന്ദ്ര-സംസ്ഥാന സർക്കാരുകൾ നികുതി ആനുകൂല്യങ്ങളടക്കമുള്ള സൗകര്യങ്ങൾ നൽകി ഈ മേഖലയെ അകമഴിഞ്ഞ് പ്രോത്സാഹിപ്പിക്കാൻ ശ്രമിക്കുന്നുണ്ട്. ഇത്തരത്തിലുള്ള സാമ്പത്തിക ആനുകൂല്യങ്ങൾ ഇ-വാഹനങ്ങൾ വാങ്ങുമ്പോഴുള്ള ആകെ ചിലവിനെ കുറയ്ക്കുന്നു. പരമ്പരാഗത വാഹനങ്ങളുമായി താരതമ്യം ചെയ്യുമ്പോൾ താരതമ്യേന കുറഞ്ഞ മെയിന്റനൻസ് ചിലവാണ് ഇലക്ട്രിക് വാഹനങ്ങൾക്കുള്ളത്.
നിരവധി ബാങ്കുകൾ നികുതി ആനുകൂല്യങ്ങളടക്കമുള്ള ആകർഷകമായ ഫിനാൻസിങ് വാഗ്ദാനം ചെയ്യുന്നുണ്ട്. ഇ-വാഹനങ്ങൾ വാങ്ങുന്നതിനും, വായ്പ എടുക്കുന്നതിനും മുമ്പ് നിരവധി കാര്യങ്ങൾ പരിഗണിക്കാനുണ്ട്.
പലിശ നിരക്കുകൾ താരതമ്യം ചെയ്യുക
എല്ലായ്പ്പോഴും ഇലക്ട്രിക് വാഹനങ്ങളുടെയും, നോൺ ഇലക്ട്രിക് വാഹനങ്ങളുടെയും പലിശ നിരക്കുകൾ താരതമ്യം ചെയ്യുക. എത്ര രൂപ ലാഭിക്കാൻ കഴിയുമെന്ന് മനസ്സിലാക്കി മാത്രം തീരുമാനം എടുക്കുക. വിവിധ ബാങ്കുകളുടെ പലിശനിരക്കുകൾ മനസ്സിലാക്കി മികച്ച ഓഫർ നൽകുന്ന ബാങ്ക് തിരഞ്ഞെടുക്കാൻ ശ്രദ്ധിക്കാം.
തുടക്കത്തിലെ ചിലവും മെയിന്റനൻസ് ചിലവും
ഇ-വാഹനം വാങ്ങുമ്പോൾ തുടക്കത്തിൽ അടയ്ക്കേണ്ട തുക കൂടുതലായിരിക്കും. അതിനാൽ നിങ്ങളുടെ ബജറ്റിലേക്ക് നോക്കുക, എന്നിട്ട് നിങ്ങൾക്ക് അത് താങ്ങാൻ സാധിക്കുന്നുണ്ടോ എന്നു പരിശോധിക്കാം. ഇവിടെ ഇഎംഐ അടവ് പ്രത്യേകം കണക്കാക്കേണ്ടതാണ്. ഇത് വളരെ ഉയർന്ന തുക ആവാതിരിക്കാൻ പ്രത്യേകം ശ്രദ്ധിക്കേണ്ടതാണ്. കാരണം ഫണ്ടിന്റെ ദൗർലഭ്യം തിരിച്ചറിവ് മുടങ്ങാൻ ഇടയാക്കരുത്. വാഹനം വാങ്ങിയതിനു ശേഷമുള്ള മെയിന്റനൻസ് ചിലവുകളും, മറ്റ് ചാർജുകളും എത്രയാവുമെന്ന് കൂടി കണക്കു കൂട്ടി നോക്കേണ്ടതാണ്.
വാഹനത്തിന്റെ തിരഞ്ഞെടുപ്പ്
ഇന്ത്യയിൽ വളർന്നു വരുന്ന ഒരു മേഖലയാണ് ഇലക്ട്രിക് വാഹനങ്ങളുടേത്. അതിനാൽത്തന്നെ ഇത്തരം വാഹനങ്ങൾ വാങ്ങുന്നതിന് മുമ്പ് സാങ്കേതിക വിദ്യ, മൈലേജ്, ചാർജിങ് സമയം എന്നിവയെല്ലാം പരിഗണിക്കേണ്ടതാണ്. പബ്ലിക് ചാർജിങ് സ്റ്റേഷനുകളുടെ ലഭ്യതയും പരിഗണിക്കേണ്ട കാര്യമാണ്. ബജറ്റിനും, ഡ്രൈവിങ് ആവശ്യങ്ങളും ഇവിടെ പരിഗണിക്കേണ്ടതാണ്. വ്യത്യസ്ത വാഹനങ്ങളും കമ്പനികളുമെല്ലാം താരതമ്യം ചെയ്ത് മാത്രം തീരുമാനമെടുക്കാം.
ഓഫറുകളും ഡിസ്കൗണ്ടും
സർക്കാരും, വാഹന കമ്പനികളും നൽകുന്ന ഓഫറുകളും, ഡിസ്കൗണ്ടുകളും പരിശോധിച്ചു നോക്കാം. സാധാരണയായി ഇ-വാഹനങ്ങളുടെ രജിസ്ട്രേഷൻ ഫീസും റോഡ് ടാക്സും കുറവായിരിക്കും.
നല്ല തിരഞ്ഞെടുപ്പാണ് നടത്തുന്നതെങ്കിൽ ദീർഘകാലാടിസ്ഥാനത്തിൽ ഇ-വാഹനങ്ങൾ നേട്ടം തരാൻ സാധ്യതയുണ്ട്. എന്നാൽ അടിസ്ഥാന സൗകര്യങ്ങളുടെ ലഭ്യതയും, ഭാവിയിലെ കൂടുതൽ മെച്ചപ്പെട്ട സാങ്കേതിക വിദ്യയും, വില കുറയാനുള്ള സാധ്യതകളും പഠന വിധേയമാക്കേണ്ടതാണ്. ഇത്തരത്തിൽ എല്ലാ ഘടകങ്ങളും പരിശോധിച്ച് എടുക്കുന്ന തീരുമാനം മികച്ചതായിരിക്കുമെന്ന് ഉറപ്പാണ്.