വിദ്യാഭ്യാസ വായ്പയ്ക്ക് നല്ലത് ബാങ്കോ അതോ എൻബിഎഫ്സിയോ ?

വിദ്യാഭ്യാസത്തിന്റെ ചിലവ് കൂടിയതോടെ വിദ്യാഭ്യാസ വായ്പയെ ആശ്രയിക്കുന്നവരുടെ എണ്ണം വലിയ തോതിലാണ് വർധിച്ചത്. പ്രാദേശികമായോ, അന്താരാഷ്ട്രതലത്തിലോ അക്രഡിറ്റേഷനുള്ള എല്ലാ വിദ്യാഭ്യാസ സ്ഥാപനങ്ങളിലും പഠിക്കുന്നതിന് ആവശ്യമായ ലോണുകൾ എല്ലാ ബാങ്കുകളും നൽകുന്നുണ്ട്.എന്നാൽ അടുത്ത കാലത്തായി നോൺ പെർഫോമിങ് അസറ്റുകൾ വർധിച്ചു വരുന്നത് ബാങ്കുകൾ ഇത്തരം വായ്പകൾ നൽകുന്നതിൽ കൂടുതൽ മുൻകരുതൽ എടുക്കാൻ കാരണമായി. ഇത് യഥാർത്ഥത്തിൽ എൻബിഎഫ്സികൾക്ക് കൂടുതൽ അവസരം തുറന്നു നൽകുകയാണ് ചെയ്തതെന്നു പറയാം. വിദ്യാർത്ഥികൾക്ക് അനുയോജ്യമായ നിരവധി സ്കീമുകൾ വിവിധ എൻബിഎഫ്സികൾ മുന്നോട്ടു വെച്ചിട്ടുണ്ട്.

എൻബിഎഫ്സികൾ ബാങ്കുകളിൽ നിന്നും എങ്ങനെ വ്യത്യാസപ്പെട്ടിരിക്കുന്നു എന്നാണ് ഇനി പരിശോധിക്കുന്നത്.

ബാങ്കുകളെ അപേക്ഷിച്ച് എൻബിഎഫ്സികളിൽ പലതും കൂടിയ പലിശയാണ് ഈടാക്കുന്നത്. എന്നാൽ ഇവയുടെ നടപടിക്രമങ്ങൾ താരതമ്യേന ലളിതമാണെന്നു പറയാം. ഒരു വർഷം 11 മുതൽ 15 ശതമാനം വരെ പലിശയാണ് വിദ്യാഭ്യാസ വായ്പയ്ക്ക് എൻബിഎഫ്സികളിൽ പലതും ഈടാക്കുന്നതെങ്കിൽ ബാങ്കുകളിൽ ഇത് 8.45 ശതമാനം മുതൽ 12 ശതമാനം വരെയാണ്.

എന്നാൽ ബാങ്കുകളിലും, എൻബിഎഫ്സികളിലും പല ഘടകങ്ങളുമായി ബന്ധപ്പെട്ട് പലിശനിരക്കുകളിൽ വ്യത്യാസം വരാം. വായ്പാ തുക, കാലാവധി, പഠിക്കുന്ന കോഴ്സ്, പഠിക്കുന്ന സ്ഥലം എന്നിവയെല്ലാമാണ് ആ ഘടകങ്ങൾ.

നിങ്ങൾ ഒരു കോഴ്സ് പഠിക്കാനാഗ്രഹിക്കുന്നു. എന്നാൽ പൊതു-സ്വകാര്യ മേഖലാ ബാങ്കുകൾ അവയെ അംഗീകരിച്ചിട്ടില്ല എന്ന സാഹചര്യം പരിഗണിക്കാം. ഇവിടെ വായ്പ ലഭിക്കാനുള്ള മികച്ച ഓപ്ഷൻ എൻബിഎഫ്സികളാണ്. അഡ്മിഷൻ കിട്ടാൻ വേണ്ടി വളരെ തിരക്കുള്ള സമയമാണെങ്കിലോ, കുറഞ്ഞ സമയത്തിനുള്ളിൽ ഫണ്ട് അറേഞ്ച് ചെയ്യാൻ കഴിയുന്നില്ലെങ്കിലോ എൻബിഎഫ്സികളെ ആശ്രയിക്കാം. ഇവിടങ്ങളിൽ പേപ്പർ വർക്കുകൾ കുറവും, ലോൺ നടപടിക്രമങ്ങൾ വേഗത്തിലുമാണ് നടക്കുന്നു എന്നതാണ് കാരണം. വായ്പ ലഭിക്കാനുള്ള യോഗ്യതകളിൽ ചില ഇളവുകളും എൻബിഎഫ്സികളിൽ നിന്ന് പ്രതീക്ഷിക്കാം.

ദീർഘമായ കാലത്തേയ്ക്കുള്ള വായ്പയാണ് നിങ്ങളുദ്ദേശിക്കുന്നതെങ്കിൽ ബാങ്കുകൾ മികച്ച തിരഞ്ഞെടുപ്പാണ്. അതായത് 15 വർഷം വരെയുള്ള കാലയളവാണെങ്കിൽ ബാങ്കുകളാണ് മികച്ചതെന്നു പറയാം. കോഴ്സ് പൂർത്തിയാക്കിയതിനു ശേഷം എത്രത്തോളം വരുമാനം ലഭിക്കും എന്ന് ഇവിടെ കണക്കു കൂട്ടി വെയ്ക്കാൻ സാധിക്കും. പലിശ നിരക്കുകൾ കുറവാണ്, കൂടുതൽ തിരിച്ചടവ് കാലാവധി ലഭിക്കും എന്നീ മെച്ചങ്ങളുമുണ്ട്. ആദ്യമായി ലഭിക്കുന്ന ജോലിയിലെ വരുമാനം കുറവാണെങ്കിൽത്തന്നെയും തിരിച്ചടവ് മാനേജ് ചെയ്തു പോകാമെന്നതും നേട്ടമായി കാണണം.

കാലാവധിക്കു മുമ്പ് വായ്പ അടച്ചു തീർത്താൽ ബാങ്കുകൾ പ്രീ-ക്ലോഷർ പെനാൽറ്റി എന്ന പേരിലുള്ള പിഴകൾ പൊതുവെ ഈടാക്കാറില്ല. എന്നാൽ എൻബിഎഫ്സികൾ ഇത്തരം പിഴത്തുക ഈടാക്കാൻ സാധ്യതയുണ്ട്.

വായ്പ തരുന്ന ധനകാര്യ സ്ഥാപനത്തെ വളരെ ബുദ്ധിപൂർവ്വം തിരഞ്ഞെടുക്കുകയാണ് ചെയ്യേണ്ടത്. വായ്പ എടുക്കുന്ന വ്യക്തിയുടെ ആവശ്യങ്ങൾ, വായ്പാ തുകയുടെ വലിപ്പം തുടങ്ങിയ ഘടകങ്ങളും ഈട്, രേഖകൾ എന്നിവ നിലവിൽ ലഭ്യമായുണ്ടോ എന്നതും തിരിച്ചടവ് ശേഷി, സമയം എന്നിവയും വിലയിരുത്തി ഉചിതമായ തീരുമാനം എടുക്കാവുന്നതാണ്.

വിദ്യാഭ്യാസ വായ്പ ഇന്ന് ഒരു പുതുമയല്ല. എന്നാൽ ബാങ്കുകളെയാണോ അതോ ധനകാര്യസ്ഥാപനങ്ങളെയാണോ ആശ്രയിക്കേണ്ടതെന്ന സംശയം പലർക്കുമുണ്ട്. അതിനുള്ള ഉത്തരം കണ്ടെത്താൻ ശ്രമിക്കുകയാണിവിടെ.