മാസ ബജറ്റിലേക്കു നോക്കുമ്പോൾ വൈദ്യുതി ബിൽ ഇന്ന് വലിയ ചിലവ് വരുന്ന ഒരു മേഖലയാണ്. വൈദ്യുതി ബിൽ അടയ്ക്കുന്നത് ഒരു പരിധിയിൽ കൂടുതൽ നീട്ടി വെയ്ക്കാനും സാധിക്കില്ല. എന്നാൽ ചില കാര്യങ്ങളിൽ ശ്രദ്ധ വെച്ചാൽ വലിയ ഒരു അളവ് വരെ വൈദ്യുതി ബില്ലിൽ കുറവ് വരുത്താൻ സാധിക്കും.
സോളാർ ഊർജ്ജം
വർഷത്തിൽ 300 ദിവസവും സൂര്യപ്രകാശം നല്ലരീതിയിൽ ലഭിക്കുന്ന അപൂർവ രാജ്യങ്ങളിൽ ഒന്നാണ് ഇന്ത്യ. പുനരുപയോഗിക്കാവുന്ന ഈ ഊർജ്ജ സ്രോതസ്സിനെ ഇന്നും പലരും ഉപയോഗപ്പെടുത്തുന്നില്ല എന്നതാണ് യാഥാർത്ഥ്യം.
ഒരു വീടിന്റെ റൂഫ് ടോപ്പിൽ ഘടിപ്പിക്കാവുന്ന വിവിധ തരത്തിലുള്ള സോളാർ പാനലുകൾ ഇന്ന് ലഭ്യമാണ്.ഇവയുടെ തുടക്കത്തിലുള്ള ചിലവിനെ ഒരു ഒറ്റത്തവണ നിക്ഷേപമായി മാത്രമാണ് കാണേണ്ടത്. ദീർഘ കാലാടിസ്ഥാനത്തിൽ നൽകേണ്ടി വരുന്ന വൈദ്യുതി ചിലവുമായി താരതമ്യം ചെയ്യുമ്പോൾ ഇത് ലാഭകരമാണെന്ന് കാണാം. സർക്കാരിന്റെ അകമഴിഞ്ഞ പിന്തുണയുള്ളതു കൊണ്ട് സബ്സിഡി നിരക്കിലും ഇവ ലഭ്യമാണ്. 50,000 രൂപയ്ക്ക് മികച്ച ഒരു സോളാർ പാനൽ സ്ഥാപിക്കാനുള്ള സ്കീമുകൾ ഇന്നു ലഭ്യമാണ്.
കമ്പ്യൂട്ടറുകൾ / ടിവി
ഉപയോഗമില്ലാത്തപ്പോൾ കമ്പ്യൂട്ടറും, ടിവിയും ഓഫ് ചെയ്തു വെയ്ക്കുക
കമ്പ്യൂട്ടറുകൾ, മോണിട്ടറുകൾ, കോപ്പിയറുകൾ എന്നിവ ഉപയോഗമില്ലാത്തപ്പോൾ സ്ലീപ് മോഡിൽ വെയ്ക്കുക. ഇത് ഊർജ്ജ ഉപഭോഗം 40 ശതമാനം വരെ കുറയ്ക്കും.
ബാറ്ററി ചാർജറുകളുടെ പ്ലഗ്ഗുകൾ ആവശ്യമില്ലാത്തപ്പോൾ ഊരി മാറ്റുക. സ്വിച്ച് ഓൺ ആയിരിക്കുമ്പോൾ ഇവയിലേക്കുള്ള അനാവശ്യ വൈദ്യുതി നഷ്ടം ഇത്തരത്തിൽ ഒഴിവാക്കാം.
ലൈറ്റുകൾ
കുറഞ്ഞ ഊർജ്ജം മാത്രമുപയോഗിക്കുന്ന ലൈറ്റുകളും, ഊർജ്ജക്ഷമത കൂടിയ വേരിയന്റുകൾ ഹോം അപ്ലയൻസുകളിലും ഉപയോഗിക്കാം. റഫ്രിജറേറ്ററുകളും, എയർ കണ്ടീഷണറുകളുമെല്ലാം വാങ്ങുമ്പോൾ ഇക്കാര്യങ്ങൾ ശ്രദ്ധിച്ചാൽ വൈദ്യുതി ചിലവിൽ വലിയ വ്യത്യാസം അനുഭവപ്പെടും.
വലിയ ബിൽഡേഴ്സിന്റെ മിക്ക പ്രോജക്ടുകളിലും സോളാർ ഊർജ്ജ സംവിധാനങ്ങളും, മഴവെള്ള സംഭരണ സംവിധാനങ്ങളും ഒരുക്കിയിരിക്കും. ആവശ്യത്തിനുള്ള സൂര്യപ്രകാശവും, വായു സഞ്ചാരവും ഉറപ്പു വരുത്തുന്ന ഡിസൈനുകളായിരിക്കും ഇവ. ലൈറ്റുകളുടെയും, കൂളിങ് അപ്ലയൻസുകളുടെയും ഉപഭോഗം ഇതിലൂടെ കുറയ്ക്കാൻ സാധിക്കുന്നു. ഇത്തരം മാർഗങ്ങൾ പുതിയ ഒരു വീട് പണിയുമ്പോഴും
സ്വീകരിക്കാവുന്നതാണ്.
വൈദ്യുതി ലാഭിക്കാനുള്ള ചില ടിപ്പുകൾ
- ആവശ്യമില്ലാത്തപ്പോൾ ലൈറ്റുകൾ ഓഫാക്കിയിടുക
- ലൈറ്റിങ് സർക്യൂട്ടുകൾ ഓൺ / ഓഫ് ചെയ്യുന്നതിന് ഇൻഫ്രാറെഡ് സെൻസറുകൾ, മോഷൻ സെൻസറുകൾ, ഓട്ടോമാറ്റിക് ടൈമേഴ്സ്, ഡിമ്മേഴ്സ്, സോളാർ സെല്ലുകൾ എന്നിവയെല്ലാം കഴിയുന്നിടത്തൊക്കെ ഉപയോഗിക്കാം.
- ടാസ്ക് ലൈറ്റിങ് എന്ന രീതി ഉപയോഗിക്കാം. ഉദാഹരണത്തിന് വായനയ്ക്ക് മാത്രമായി മുറി മുഴുവനുമുള്ള ലൈറ്റിങ്ങിനു പകരം റീഡിങ് ലാമ്പുകൾ ഉപയോഗിക്കാം.
- ടേബിൾ ലൈറ്റുകളും, ലാമ്പുകളും സ്ഥിരമായി തുടച്ചു വൃത്തിയാക്കി സൂക്ഷിക്കുക. പൊടി നിറഞ്ഞതും, വൃത്തിഹീനമായതുമായ ലൈറ്റുകൾ പ്രകാശ തീവ്രത കുറയ്ക്കുന്നു. പ്രകാശത്തിന്റെ 50 ശതമാനം വരെ ഇത്തരത്തിൽ കുറയുന്നു. ഇത് അധിക ലൈറ്റുകളുടെ ഉപയോഗത്തിലേക്കു നയിക്കും.
- സാധാരണ ബൾബുകളേക്കാൾ ഫ്ലൂറസെന്റ് ട്യൂബ് ലൈറ്റുകളും, സിഎഫ്എല്ലുകളും അഞ്ചിരട്ടി വരെ കാര്യക്ഷമതയുള്ളവയാണ്. പകരമായി ഇവ ഉപയോഗിച്ചാൽ 70 ശതമാനം വരെ വൈദ്യുതി ലാഭിക്കാൻ കഴിയും.