മോറട്ടോറിയം; വായ്പകൾ നീട്ടി തിരിച്ചടവ് കുറയ്ക്കുന്നത് ക്രെഡിറ്റ് സ്കോര്‍ കുറയ്ക്കും, നഷ്ടവും ഉണ്ടായേക്കാം

കൊച്ചി: ആഗസ്റ്റ് 31ന് വായ്പാ മോറട്ടോറിയം അവസാനിച്ചതിന് ശേഷം വീണ്ടും അധിക മോറട്ടോറിയം പ്രയോജനപ്പെടുത്താൻ ആഗ്രഹിയ്ക്കുന്നുണ്ടോ? ആര്‍ബിഐ നിര്‍ദേശ പ്രകാരം കൊവിഡ് കാലത്ത് ലഭിച്ച അതേ മോറട്ടോറിയം പ്രയോജനപ്പെടുത്താൻ ആകില്ലെങ്കിലും ലോൺ കാലാവധി നീട്ടാം. രണ്ടു വര്‍ഷം വരെയാണ് ലോൺ കാലാവധി നീട്ടി തിരിച്ചടവു തുക കുറയ്ക്കാൻ ആകുക. എന്നാൽ ഇങ്ങനെ ചെയ്യുന്നത് നിങ്ങളുടെ ക്രെഡിറ്റ് സ്കോറിനെ ബാധിയ്ക്കും.

ഭാവിയിൽ വായ്പാ സാധ്യത കുറയ്ക്കാനും ഇടയാക്കിയേക്കും. എന്നാൽ കൊവിഡ് പ്രതിസന്ധിയെ തുടര്‍ന്ന് സര്‍ക്കാര്‍ ആറു മാസമായി വര്‍ധിപ്പിച്ചു നൽകിയ മോറട്ടോറിയം പ്രയോജനപ്പെടുത്തിയവരുടെ ക്രെഡിറ്റ് സ്കോര്‍ കുറയ്ക്കരുതെന്ന് സര്‍ക്കാര്‍ നിര്‍ദേശം നൽകിയികിയിരുന്നു. അതേസമയം വായ്പാ പുനക്രമീകരണത്തിന് ഈ നിര്‍ദേശം നൽകിയിട്ടില്ല എന്നതു ശ്രദ്ധേയമാണ്.

Also Read: ലോൺ എടുത്തിട്ടുണ്ടോ? ഈ മാസം മുതൽ പലിശ നിരക്കുകൾ കുറഞ്ഞേക്കും

സ്റ്റാൻഡേര്‍ഡ് വായ്പകൾ ആയിട്ടായിരിയ്ക്കും പുതിയ വായ്പകൾ പരിഗണിയ്ക്കുക. നേരത്തെ വായ്പാ മോറട്ടോറിയം എടുത്തവര്‍ക്കും അല്ലാത്തവര്‍ക്കും ലോണുകൾ പുനക്രമീകരിയ്ക്കാൻ ആകും. അതുപോലെ വായ്പകൾ പുനക്രമീകരിയ്ക്കുന്നതിന് എസ്ബിഐ ഉൾപ്പെടെ അധിക പ്രോസസിങ് ചാര്‍ജ് ഈടാക്കുന്നുണ്ട്.

വാര്‍ഷികാടിസ്ഥാനത്തിൽ ആണ് ഇത് ഈടാക്കുക. രണ്ടു വര്‍ഷം വായ്പ നീട്ടുന്നുണ്ടെങ്കിൽ രണ്ടു വര്‍ഷവും അധിക ചാര്‍ജ് നൽകേണ്ടി വന്നേക്കും. പുനക്രമീകരിച്ച വായ്പകൾ രണ്ടു വര്‍ഷം കഴിഞ്ഞാൽ പഴയതു പോലെയാകുകയും വായ്പാ തുക വീണ്ടും ഉയരുകയും ചെയ്യും.

അതുകൊണ്ടു തന്നെ മറ്റു നിവൃത്തി ഇല്ലെങ്കിൽ മാത്രം വായ്പകൾ പുനക്രമീകരിയ്ക്കുന്നതാകും എന്നാണ് പേഴ്സണൽ ഫിനാൻസ് വിദഗ്ധര്‍ ചൂണ്ടിക്കാട്ടുന്നത്. വായ്പാ പുനക്രമീകരണത്തിന് ബാങ്കുകൾ ഈടാക്കുന്ന ചാര്‍ജ് അധിക ബാധ്യതയാണ്.