ചില സര്ക്കാര് സേവനങ്ങള്ക്ക് ആധാര് ഇല്ലാതെ പറ്റില്ലെന്നുമായിട്ടുണ്ട്. മറ്റു ഔദ്യോഗിക രേഖകളെല്ലാം ആധാറുമായി ബന്ധിപ്പിക്കുന്ന നടപടികളും പുരോഗമിക്കുകയാണ്. ഓണ്ലൈന് വഴി മറ്റു രേഖകള് ആധാറുമായി ബന്ധിക്കുമ്പോഴാണ് വിവരങ്ങളിലെ വൈരുദ്ധ്യം ഇന്നു പലരും മനസിലാക്കുന്നതു തന്നെ. കാരണം വിവരങ്ങളില് മാറ്റമുമുണ്ടെങ്കില് ഇവ തമ്മില് ബന്ധിപ്പിക്കാന് സാധിക്കില്ല.
ഇതുകൊണ്ടാണ് ആധാര് കാര്ഡില് വിവരങ്ങള് ചേര്ക്കുമ്പോള് ശ്രദ്ധിക്കണമെന്ന് ആദ്യമേ പറഞ്ഞത്. ആധാറിലുള്ള വിവരങ്ങൾ തിരുത്തുക അത്ര എളുപ്പമല്ല. കൃത്യമായ രേഖകള് സമര്പ്പിച്ചാല് മാത്രമേ ഇതു സാധ്യമാകൂ. അതു മാത്രമല്ല, ചില വിവരങ്ങള് പുതുക്കുന്നതിനു ചില മാനദണ്ഡങ്ങളും പരിമിതിയുമുണ്ട്.
എത്ര തവണ വിവരങ്ങള് മാറ്റാനാകും?
ഒരു ഉപയോക്താവിനു ജീവിതകാലത്ത് രണ്ടു തവണ മാത്രമേ ആധാര് കാര്ഡിലെ പേര് തിരുത്താന് സാധിക്കൂവെന്ന് യുണിക് ഐഡന്റിഫിക്കേഷന് അതോരിറ്റി ഓഫ് ഇന്ത്യ (യു.ഐ.ഡി.എ.ഐ) വെബ്സൈറ്റില് വ്യക്തമാക്കുന്നുണ്ട്. അതുപോലെ ലിംഗഭേദവും ഒരിക്കല് മാത്രമേ മാറ്റാന് കഴിയൂ. ജനനത്തീയതി മാറ്റുന്നതിനും ഒരു തവണ മാത്രമാണ് അവസരമുള്ളത്. ജനനത്തീയതി മാറ്റുന്നതിനു നിരവധി നിബന്ധനകള് ബാധകമാണ്. ജനനത്തീയതി സ്ഥിരീകരിക്കാത്തവര്ക്കു മാത്രമാകും അപ്ഡേറ്റ് ചെയ്യാന് അവകാശമുണ്ടാകൂ.
തിരുത്തലുകള്ക്ക് ആവശ്യമായ രേഖകള് എന്തെല്ലാം?
പേരില് മാറ്റം വരുത്തുന്നതിന് ഇക്കാര്യം സാധൂകരിക്കുന്ന പാസ്പോര്ട്ട്, ഡ്രൈവിങ് ലൈസന്സ്, വോട്ടര് ഐഡി കാര്ഡ് മുതലായവയുടെ സ്കാന് ചെയ്ത പകര്പ്പ് സമര്പ്പിക്കണം. വിലാസം മാറ്റുന്നതിനു വിലാസത്തിന്റെ തെളിവ് രേഖകള് (ബാങ്ക് സ്റ്റേറ്റ്മെന്റ്/ പാസ്ബുക്ക്, റേഷന് കാര്ഡ്, വാട്ടര് ബില് മുതലായവ) സമര്പ്പിക്കണം. ലിംഗഭേദം അപ്ഡേറ്റ് ചെയ്യുന്നതിന് രേഖകളൊന്നും ആവശ്യമില്ല.
എങ്ങനെ ഓണ്ലൈനായി വിവരങ്ങള് അപ്ഡേറ്റ് ചെയ്യാം
1. യു.ഐ.ഡി.എ.ഐ. വെബ്സൈറ്റ് സന്ദര്ശിക്കുക- https://uidai.gov.in/
2. മൈ ആധാര് ടാബ് തെരഞ്ഞെടുക്കുക.
3. നിങ്ങളുടെ ആധാര് അപ്ഡേറ്റ് ചെയ്യുക എന്ന വിഭാഗം തെരഞ്ഞെടുത്ത്, അപ്ഡേറ്റ് ഡെമോഗ്രാഫിക്സ് ഡേറ്റ ഓണ്ലൈനില് ക്ലിക്ക് ചെയ്യുക.
4. തുടര്ന്നു വരുന്ന ജാലകത്തില് ആധാര് അപ്ഡേറ്റ് ചെയ്യാന് തുടരുക എന്നതില് ക്ലിക്ക് ചെയ്യുക.
5. ഇവിടെ, ഉപയോക്താക്കള് അവരുടെ ആധാര് നമ്പറും സ്ക്രീനിൽ കാണിച്ചിരിക്കുന്ന ക്യാപ്ചയും നല്കുക.
6. തുടര്ന്ന് രജിസ്റ്റര് ചെയ്ത മൊബൈലില് വരുന്ന ഒ.ടി.പി. നല്കി ലോഗിന് ചെയ്യുക. (ഓണ്ലൈന് അപ്ഡേഷനുകള്ക്ക് മൊബൈല് നമ്പര് രജിസ്റ്റര് ചെയ്തിരിക്കണം. മൊബൈല് നമ്പര് രജിസ്റ്റര് ചെയ്യാത്തവര് ആക്ഷയ വഴിയോ, ആധാര് സേവന കേന്ദ്രങ്ങള് വഴിയോ ഇതു ചെയ്യുക).
7. അപ്ഡേറ്റ് ഡെമോഗ്രാഫിക്സ് ഡേറ്റ തെരഞ്ഞെടുക്കുക. പ്രസക്തമായ എല്ലാ വിശദാംശങ്ങളും ചേര്ത്ത് ആവശ്യമായ രേഖകള് അപ്ലോഡ് ചെയ്യുക.
8. തുടര്ന്ന് പണമടയ്ക്കുന്നതോടെ നടപടിക്രമങ്ങള് പൂര്ത്തിയാകും.