റേഷൻ കാർഡിൽ പുതിയ അം​ഗത്തിന്റ പേര് ഓൺലൈനായി ചേർക്കാനാകുമോ?

കൊച്ചി: റേഷൻ കാർഡിൽ കുടുംബത്തിലെ എല്ലാ അംഗങ്ങളുടെയും പേരുവിവരങ്ങൾ നിർബന്ധമായും ചേർത്തിരിക്കണം. ഈ വിവരങ്ങൾ അടിസ്ഥാനമാക്കിയാണ് റേഷൻ വിതരണം ഉൾപ്പടെയുള്ളവ നടക്കുന്നത്. സർക്കാർ പദ്ധതികളിൽ നിന്നുള്ള ആനുകൂല്യം ലഭിക്കുന്നതിന് റേഷൻ കാർഡിലെ വിവരങ്ങൾ ആവശ്യമാണ്. നിയമപരമായി അംഗീകരിച്ച തിരിച്ചറിയൽ, വിലാസ തെളിവ് കൂടിയാണിവ. കുടുംബത്തിൽ പുതുതായി എത്തിയ അംഗങ്ങളുടെ പേരുവിവരങ്ങളും റേഷൻ കാർഡിൽ ഉൾപ്പെടുത്തേണ്ടതുണ്ട്.

എല്ലാവരുടേയും പേര് ചേ‌ർക്കണം

വിവാഹശേഷം വീട്ടിലെത്തിയ വധു, പുതുതായി പിറന്നക്കുഞ്ഞുങ്ങൾ, ദത്തെടുത്തവർ എന്നിവർ‌ ഇതിൽ ഉൾപ്പെടും. നിലവിൽ അക്ഷയകേന്ദ്രം വഴിയും പുതിയ അംഗത്തിന്റെ പേര് റേഷൻ കാർഡിൽ ചേർക്കാനാകും. വിവാഹശേഷം വധുവിന്റെ പേര് റേഷൻ കാർഡിൽ ചേർക്കണമെങ്കിൽ ആദ്യം ആധാർ കാ‍ർഡ് അപ്ഡേറ്റ് ചെയ്യണം. ഭർത്താവിന്റെ പേര് നൽകിയാണ് ആധാർ കാർഡ് അപ്ഡേറ്റ് ചെയ്യേണ്ടത്. ഇതിന് ശേഷം ആധാർ കാർഡിന്റെ പകർപ്പിനൊപ്പം പേര് ചേർക്കുന്നതിനുള്ള അപേക്ഷ തയ്യാറാക്കി ഭക്ഷ്യവകുപ്പ് ഓഫീസർക്ക് അയയ്ക്കണം.

ഓൺലൈനായി ചേർക്കാം

കുട്ടികളുടെ കാര്യത്തിലും ഇങ്ങനെ തന്നെയാണ് ചെയ്യേണ്ടത്. കുട്ടികളുടെ പേരിൽ‌ ആധാർ കാർഡ് എടുത്തതിന് ശേഷം റേഷൻ കാർഡിൽ പേര് ചേർക്കുന്നതിനായി അപേക്ഷ നൽകാം.ആധാർ കാർഡ് ഇല്ലാത്തവരുടെ പേര് റേഷൻ കാർഡിൽ ചേർക്കില്ല. ആധാർ കാർഡ് ലഭിക്കാൻ കുട്ടിയുടെ ജനന സർട്ടിഫിക്കറ്റ് ആവശ്യമാണ്. പുതിയ അംഗത്തിന്റെ പേര് ചേർക്കണമെങ്കിൽ നേരത്തെ സപ്ലൈകോയെ സമീപിക്കണമായിരുന്നു. എന്നാൽ ഇന്ന് സ്ഥിതി മാറി. മിക്ക സംസ്ഥാനങ്ങളിലും ആളുകൾക്ക് ഇപ്പോൾ‌ പുതിയ അംഗത്തിന്റെ പേര് ഓൺലൈനായി ചേർക്കാം.

ഓൺലൈനായി എങ്ങനെ ചേർക്കാം?

ഇതിനായി സംസ്ഥാന ഭക്ഷ്യവിതരണ വകുപ്പിന്റെ ഔദ്യോഗിക വെബ്‌സൈറ്റ് സന്ദർശിക്കണം. ഓൺലൈനായി പേര് ചേർക്കേണ്ട സൗകര്യം ഭക്ഷ്യവിതരണ വകുപ്പ് അനുവദിച്ചിട്ടുണ്ടെങ്കിൽ അതുപയോഗിച്ച് സ്വന്തമായി വീട്ടിലിരുന്ന് തന്നെ ആളുകൾക്ക് വേണ്ടപ്പെട്ടവരുടെ പേര് ചേർക്കാം. ഉത്തർപ്രദേശ് സർക്കാർ ജനങ്ങൾക്കായി ഈ ഓൺലൈനായി സൗകര്യം ആരംഭിച്ചിട്ടുണ്ട്. https://fcs.up.gov.in/FoodPortal.aspx എന്ന വെബ്സൈറ്റ് വഴി ആളുകൾക്ക് പുതിയ അംഗത്തിന്റെ പേരുവിവരങ്ങൾ വീട്ടിലിരുന്ന് കൊണ്ട് ഓൺലൈൈനായി ചേർക്കാനാകും.