എന്നാൽ ഇത് വലിയ കമ്പനികളിലെ ജോലിക്കാരുടെ കാര്യമല്ലേ? ഐടി ഫീൽഡിലെ വിഷയമല്ലേ എന്നു കരുതരുത്. ഈ പ്രവണത സമീപ ഭാവിയിൽ മറ്റ് കമ്പനികളിലേക്കും, സെക്ടറുകളിലേക്കും വ്യാപിച്ചേക്കാം. ഇപ്പോൾ തന്നെ ഈ ജോലിക്കാരെ പറഞ്ഞുവിട്ട് നഷ്ടം നികത്താനോ, ലാഭമുണ്ടാക്കാനോ പല കമ്പനികളും ശ്രമിക്കുന്നുണ്ട്.
തൊഴിൽ നഷ്ടമാവാൻ ഒരു സാഹചര്യം ഉണ്ടാവും എന്ന് കരുതി അതിനു വേണ്ടി സാമ്പത്തികമായി തയ്യാറായിരിക്കുക എന്നതാണ് സാമാന്യ യുക്തി. അതിനുള്ള ചില പ്രായോഗിക മാർഗങ്ങളാണ് താഴെ നൽകിയിരിക്കുന്നത്.
എമർജൻസി ഫണ്ട്
ആറ് മാസം മുതൽ ഒരു വർഷം വരെ നിങ്ങൾക്ക് ലഭിക്കുന്ന വരുമാനം എമർജൻസി ഫണ്ടായി ആദ്യം തന്നെ മാറ്റി വെക്കാം. ഏതെങ്കിലും കാരണവശാൽ നിങ്ങൾക്ക് ജോലി നഷ്ടപ്പെട്ടാൽ, മറ്റൊരു ജോലി കണ്ടെത്തുന്നതു വരെ, ഏതാനും മാസത്തേക്ക് നിങ്ങൾക്ക് ഈ ഫണ്ടിനെ ആശ്രയിക്കാവുന്നതാണ്. ലിക്വിഡ് ക്യാഷ് ആയോ, സേവിങ്സ് ഫണ്ടിലോ, ആവശ്യങ്ങൾക്ക് ഉപയോഗിക്കാൻ സാധിക്കുന്ന വിധത്തിൽ ഈ തുക സൂക്ഷിക്കാം.
ഇപ്പോഴത്തെ വരുമാനത്തിൽ നിന്നും ഇത്തരത്തിൽ ഒരു തുക എല്ലാ മാസവും എമർജൻസി ഫണ്ടായി മാറ്റി വെക്കാവുന്നതാണ്. തൊഴിൽ നഷ്ടത്തെ കരുതി മാത്രമല്ല ഭാവിയിൽ ഏതെങ്കിലും വിധത്തിൽ അടിയന്തിര സാഹചര്യമുണ്ടാവുകയാണെങ്കിൽ ഈ തുക നിങ്ങൾക്ക് സഹായകമാവും.
Also Read : ജോലിക്ക് ഉറപ്പില്ലാത്ത കാലം; ട്വിറ്ററിലെ പിരിച്ചുവിടൽ നൽകുന്ന പാഠമെന്ത് ?
ഹെൽത്ത് ഇൻഷുറൻസ്
നിങ്ങൾക്ക് തൊഴിലുടമ, ഹെൽത്ത് ഇൻഷുറൻസ് നൽകുന്നുണ്ടെങ്കിലും അതിനെ മാത്രം പൂർണമായി ആശ്രയിക്കരുത്. തൊഴിൽ നഷ്ടപ്പെടുന്ന സാഹചര്യത്തിൽ ഹെൽത്ത് ഇൻഷുറൻസും നഷ്ടമാകുമെന്ന് ഓർക്കാം. തൊഴിൽ നഷ്ടമായ സാഹചര്യത്തിൽ നിങ്ങൾക്ക് ആരോഗ്യപരമായ ഒരു ചിലവ് വന്നെങ്കിൽ അത് സ്വന്തം കയ്യിൽ നിന്ന് നൽകേണ്ടി വരുന്നു. ഇത് സാമ്പത്തിക സമ്മർദ്ദം വർധിപ്പിക്കും. ഇക്കാരണങ്ങളാൽ നിങ്ങൾക്കും, നിങ്ങളുടെ കുടുംബത്തിനും വേണ്ടി പേഴ്സണൽ ഹെൽത്ത് ഇൻഷുറൻസ് പോളിസി കരുതുക.
Also Read : നിങ്ങൾക്ക് എത്ര രൂപയുടെ ഹെൽത്ത് ഇൻഷുറൻസ് ആവശ്യമുണ്ട് ?
ബജറ്റ് തയ്യാറാക്കുക
ജീവിതച്ചിലവ് വർധിക്കുന്ന കാലമാണിത്. നിങ്ങളുടെ ചിലവുകൾ സൂക്ഷ്മതയോടെ വിലയിരുത്തേണ്ടത് ഇവിടെ ആവശ്യമാണ്. മാസബജറ്റിൽ ആവശ്യമായ മാറ്റങ്ങൾ വരുത്തുകയുമാവാം. ഭക്ഷണം, യൂട്ടിലിറ്റി ബില്ലുകൾ, ഇഎംഐ തുടങ്ങിയവ ഒഴിവാക്കാൻ സാധിക്കണമെന്നില്ല. ഇവ ട്രാക്ക് ചെയ്യുകയും, അതിന് അനുസരിച്ച് പ്രതിമാസ ചിലവുകൾ നിശ്ചയിക്കുകയും ചെയ്യാം. ചിലവുകൾ ക്രമീകരിക്കാനും,ട്രാക്ക് ചെയ്യാനും സഹായിക്കുന്ന നിരവധി ആപ്ലിക്കേഷനുകളും, വെബ്സൈറ്റുകളും ഇന്ന് ലഭ്യമാണ്.
ഇതര ചിലവുകൾ കുറയ്ക്കുക
നിങ്ങൾക്ക് സ്ഥിരവരുമാനമുണ്ടെങ്കിൽ സേവിങ്സിനും, വിനോദത്തിനും നിങ്ങൾ പണം ചിലവഴിച്ചേക്കാം. ഓപ്ഷണൽ ചിലവുകളായ പുറത്തു പോയി ഭക്ഷണം കഴിക്കുക, ഒരു സിനിമയ്ക്കു പോവുക, മാഗസിനുകൾ സബ്സ്ക്രൈബ് ചെയ്യുക തുടങ്ങിയവയ്ക്കും ചിലവുകളുണ്ടാവും. എന്നാൽ തൊഴിൽ നഷ്ടം സംഭവിച്ച അടിയന്തിര സാഹചര്യത്തിൽ ഇത്തരത്തിൽ സാധ്യമായ എല്ലാ ചിലവുകളും ഒഴിവാക്കേണ്ടതാണ്. സേവിങ്സും, നിക്ഷേപവും പോലും ഇത്തരത്തിൽ നിർത്തി വെയ്ക്കേണ്ടതാണ്.
എന്തു വില കൊടുത്തും പുതിയ കടബാധ്യതകൾ ഒഴിവാക്കാൻ നിങ്ങൾ ശ്രദ്ധ നൽകണം. വ്യക്തിഗത വായ്പകളോ, ക്രെഡിറ്റ് കാർഡ് ലോണുകളോ ബാധ്യതകളാവാതെ നോക്കണം. ഹ്രസ്വകാലാടിസ്ഥാനത്തിൽ പണം എളുപ്പത്തിൽ ലഭ്യമാവുമെന്ന തോന്നലുണ്ടായാലും, ഇവയുടെ പലിശ നിരക്കുകൾ താരതമ്യേന ഉയർന്നതായിരിക്കും. മാത്രമല്ല ജോലി നഷ്ടമായിരിക്കുന്ന സാഹചര്യത്തിൽ പുതിയ ബാധ്യതകൾ അറിഞ്ഞു കൊണ്ട് വരുത്തി വെയ്ക്കുന്നത് യുക്തമായ തീരുമാനം ആയിരിക്കുകയുമില്ല.
Read Latest Business News and Malayalam News