യുപിഐ ഉപയോഗിച്ച് എൻപിഎസ് അക്കൗണ്ടിൽ നിക്ഷേപം നടത്താം, അറിയാം ഇക്കാര്യങ്ങൾ

കൊച്ചി: ഇന്ത്യയിലെ മികച്ച റിട്ടയർമെന്റ് നിക്ഷേപ പദ്ധതികളിലൊന്നാണ് ദേശീയ പെൻഷൻ പദ്ധതി (എൻ‌പി‌എസ്). ഇന്ത്യൻ പൗരന്മാർക്കും പ്രവാസികൾ അല്ലെങ്കിൽ എൻ‌ആർ‌ഐകൾക്കും ഓൺലൈനായും ഓഫ്‍ലൈനായും എൻ‌പി‌എസ് അക്കൗണ്ട് തുറക്കാനാകും. നിലവിൽ ചെക്ക്, ഇൻറർനെറ്റ് ബാങ്കിംഗ് വഴി എൻസിഎസ് അക്കൗണ്ടിൽ നിക്ഷേപം നടത്താനാകും. ഇതുകൂടാതെ വരിക്കാർക്ക് ഇപ്പോൾ യുപിഐ ഉപയോഗിച്ചും അക്കൗണ്ടിൽ നിക്ഷേപം നടത്താം. ഡിജിറ്റൽ ഇടപാടുകൾ വർധിച്ചതോടെയാണ് പി‌എഫ്‌ആർ‌ഡി‌എ യുപിഐ മോഡ് വഴിയുള്ള എൻ‌പി‌എസ് നിക്ഷേപത്തിന് സൗകര്യമൊരുക്കിയത്.

യുപിഐ ഉപയോഗിച്ച് എൻ‌പി‌എസ് അക്കൗണ്ടിലേക്ക് എങ്ങനെ നിക്ഷേപം നടത്താം?

• ആദ്യം യുപിഐ ഐഡി ആക്ടിവേറ്റ് ചെയ്യുക. സജീവമായ യുപിഐ ഐഡി ഇല്ലെങ്കിൽ ബാങ്കിന്റെ യുപിഐ ആപ്ലിക്കേഷൻ ഡൗൺലോഡ് ചെയ്ത് സജീവമാക്കാം. ആപ്ലിക്കേഷൻ ഉപയോഗിച്ച് നിങ്ങൾക്ക് ഇഷ്ടമുള്ള യുപിഐ ഐഡി സജ്ജമാക്കാനാകും.
• ലിങ്ക് ചെയ്ത ബാങ്ക് അക്കൗണ്ടുമായി യുപിഐ ഐഡി രജിസ്റ്റർ ചെയ്ത് കഴിഞ്ഞാൽ ഇടപാടുകൾ അംഗീകരിക്കുന്നതിന് എം‌പി‌എൻ സജ്ജീകരിക്കുക.
• തുടർന്ന് എൻ‌പി‌എസ് വെബ്സൈറ്റ് (Https://enps.nsdl.com/ അല്ലെങ്കിൽ https: //enps.kfi ntech.com/ ) സന്ദർശിച്ച് എൻ‌പി‌എസ് അക്കൗണ്ടിലേക്ക് കടക്കുക.
• പോർട്ടലിലേക്ക് ലോഗിൻ ചെയ്യുന്നതിന് പിആർഎൻഎൻ (സ്ഥിരമായ റിട്ടയർമെന്റ് അക്കൗണ്ട് നമ്പർ) നൽകുക.
• സ്ഥിരീകരണത്തിനായി രജിസ്റ്റർ ചെയ്ത മൊബൈൽ നമ്പറിലേക്ക് ഒടിപി അയയ്ക്കും.
• യുപിഐ വഴി നിക്ഷേപം നടത്തുന്നതിന് പേയ്‌മെന്റ് മോഡ് യുപിഐ ആയി തിരഞ്ഞെടുത്ത് യുപിഐ ഐഡി നൽകണം.
• പേയ്‌മെന്റുമായി ബന്ധപ്പെട്ട് യുപിഐ ആപ്ലിക്കേഷൻ / ബാങ്ക് അറിയിപ്പ് അയയ്ക്കും.
• എംപിഐഎൻ വീണ്ടും നൽകിയ ശേഷം യുപിഐ ഇടപാട് അഭ്യർത്ഥനയ്ക്ക് അംഗീകാരം ലഭിക്കും.

യുപിഐ വഴിയുള്ള ഓരോ എൻപിഎസ് നിക്ഷേപത്തിനും 10 രൂപ വരെ ഇടപാട് ചാർജ് ഈടാക്കാം. കൂടാതെ ജിഎസ്ടിയും ബാധകമായ നിരക്കിൽ ഈടാക്കും. ട്രാൻസാക്ഷൻ ചാർജുകളും ജിഎസ്ടിയും ഉൾപ്പെടെ യുപിഐ മോഡ് ഉപയോഗിച്ചുള്ള ഒരൊറ്റ ഇടപാടിൽ പരമാവധി 2,000 രൂപ വരെയാണ് നിക്ഷേപിക്കാനാകുക.