നല്ല സ്കോറുള്ളവർക്ക് പുതിയ വായ്പകൾ അനുവദിച്ചു കിട്ടുക എന്നത് എളുപ്പമുള്ള കാര്യമാണ്. ഇതു പോലെ തന്നെ കുറഞ്ഞ ക്രെഡിറ്റ് സ്കോർ വായ്പകൾ ലഭിക്കാൻ തടസ്സം സൃഷ്ടിക്കുകയും ചെയ്യും. സമയം തെറ്റിയുള്ള തിരിച്ചടവ്, തിരിച്ചടവ് മുടക്കൽ എന്നിവയാണ് കുറഞ്ഞ ക്രെഡിറ്റ് സ്കോറിന് കാരണം. ഇത് പുതിയതായി വായ്പ തരുന്നത് റിസ്കാണെന്ന് ധനകാര്യ സ്ഥാപനം കരുതാൻ കാരണമാകും. അവർ ചിലപ്പോൾ നിങ്ങൾക്ക് വായ്പ നൽകാം, അല്ലെങ്കിൽ വളരെ ഉയർന്ന പലിശയും, കർശനമായ വ്യവസ്ഥകളും ഏർപ്പെടുത്താം.
കാര്യങ്ങൾ ഇങ്ങനെയൊക്കെയാണെങ്കിലും നിങ്ങൾക്ക് ക്രെഡിറ്റ് സ്കോർ മോശമാണെങ്കിൽ ഭയപ്പെടേണ്ടതില്ല. ഇത് ലോകം അവസാനിക്കുന്ന കാര്യമല്ല. ഏതു പ്രശ്നത്തിനും പരിഹാരം ഉള്ളതു പോലെ ഇവിടെയുമുണ്ട്. അല്പം ശ്രദ്ധ വെച്ചാൽ നിങ്ങൾക്ക് മോശം ക്രെഡിറ്റ് സ്കോർ വർധിപ്പിക്കാൻ സാധിക്കും. ഇവിടെ അതിനുള്ള വഴികൾ വെളിപ്പെടുത്തുകയാണ്.
ഒരു മോശം ക്രെഡിറ്റ് സ്കോർ
നിങ്ങളുടെ ക്രെഡിറ്റ് സ്കോർ 300-550 റേഞ്ചിൽ താഴ്ന്നു നിൽക്കുകയാണെങ്കിൽ അത് ഒരു മോശപ്പെട്ട ക്രെഡിറ്റ് സ്കോറാണ്. നിങ്ങൾ ഈ ഒരു റേഞ്ചിലാണ് ഉള്ളതെങ്കിൽ ഇത് നിങ്ങൾ കറക്ട് ചെയ്യുകയും, നിങ്ങലുടെ ക്രെഡിറ്റ് ഹിസ്റ്ററി മെച്ചപ്പെടുത്തി കൊണ്ടുവരാൻ പടിപടിയായി ശ്രമിക്കുകയും വേണം. ഇത് ഒരു രാത്രി കൊണ്ട് സംഭവിക്കുന്ന കാര്യമല്ല. സാമ്പത്തിക സ്ഥിരത പുലർത്തുകയും, അച്ചടക്കത്തോടെ തിരിച്ചടവുകൾ നടത്തുകയും ചെയ്യേണ്ടി വരും. ഇതിന് ചിലപ്പോൾ വർഷങ്ങൾ വരെ എടുത്തേക്കാം.
കുറഞ്ഞ ക്രെഡിറ്റ് സ്കോറിനുള്ള കാരണങ്ങൾ പരിശോധിക്കാം
രോഗം പരിഹരിക്കുന്നതിന് കാരണമാണ് ആദ്യം തിരിച്ചറിയേണ്ടത്. ഇവിടെയും അതു തന്നെ ചെയ്യണം. നിങ്ങൾക്ക് എന്തു കൊണ്ടാണ് ക്രെഡിറ്റ് സ്കോർ കുറഞ്ഞതെന്ന് പരിശോധിക്കുന്നത് നിർണായകമാണ്. ക്രെഡിറ്റ് റേറ്റിങ് ഏജൻസികളിൽ നിന്ന് നിങ്ങൾക്ക് ഇത്തരം ഡാറ്റ ലഭിക്കും. ബാങ്ക് ബസാർ പോലെയുള്ള വെബ്സൈറ്റുകളും സൗജന്യമായി ക്രെഡിറ്റ് റിപ്പോർട്ട് ലഭിക്കാൻ ഉപയോഗിക്കാം.
നിങ്ങളുടെ ക്രെഡിറ്റ് സ്കോർ താഴാൻ പലപ്പോഴും ഒന്നിലധികം കാരണങ്ങൾ ഉണ്ടാകും. ലോൺ തിരിച്ചടവ് തെറ്റിയതോ, ക്രെഡിറ്റ് കാർഡ് ബിൽ അടവ് വൈകിയതോ കാരണങ്ങളാവാം. ഉയർന്ന ക്രെഡിറ്റ് യൂട്ടിലൈസേഷൻ റേഷ്യോ (സിയുആർ), അൺസെക്വേർഡ് ലോൺ ലഭിക്കുമോ എന്നറിയാനായി പലതവണ നടത്തിയ അന്വേഷണങ്ങൾ, വായ്പ നൽകിയ സ്ഥാപനം ക്രെഡിറ്റ് ഇൻഫർമേഷൻ ബ്യൂറോയ്ക്ക് നൽകിയ തെറ്റായ വിവരങ്ങൾ, കോ-ബോറോവർ വായ്പ അടവിൽ തെറ്റു വരുത്തിയത് എന്നിവയെല്ലാം ക്രെഡിറ്റ് സ്കോർ കുറയാനുള്ള കാരണങ്ങളിൽ ചിലതാണ്.
വായ്പക്കാരനെ മോശം ക്രെഡിറ്റ് സ്കോർ എങ്ങനെ ബാധിക്കുന്നു ?
വായ്പ എടുക്കാൻ ഉദ്ദേശിക്കുന്ന വ്യക്തിയുടെ സാമ്പത്തികത്തിന്റെ ഫ്ലെക്സിബിലിറ്റി താഴ്ന്ന സ്കോർ ഇല്ലാതാക്കുന്നു. സാമ്പത്തിക പ്ലാനുകളെ തകിടം മറിക്കുന്നു. നിലവിൽ കാർ വായ്പ, ഭവന വായ്പ പോലെയുള്ള വായപകൾ ഉണ്ടെങ്കിൽ ബാങ്കുകൾ കുറഞ്ഞ ക്രെഡിറ്റ് സ്കോർ കാരണം ലോൺ പീരിയഡിൽ പലിശ വർധിപ്പിക്കാനും സാധ്യതയുണ്ട്. ഒരു പുതിയ വായ്പ, ക്രെഡിറ്റ് കാർഡ് എന്നിവ ലഭിക്കുന്നതിനും തടസ്സമുണ്ടാവും.
കുറഞ്ഞ ക്രെഡിറ്റ് സ്കോർ ഉണ്ടെങ്കിൽ വായ്പ ലഭിക്കുമോ ?
ചില എൻബിഎഫ്സികൾ കുറഞ്ഞ ക്രെഡിറ്റ് സ്കോർ ഉള്ളവർക്കും വായ്പ നൽകാൻ തയ്യാറാവുമെങ്കിലും കനത്ത പലിശ ഈടാക്കാറുണ്ട്. വസ്തു വായ്പ, സ്വർണ്ണവായ്പ, സ്ഥിരനിക്ഷേപത്തിൻമേലുള്ള ലോൺ, എന്നിങ്ങനെ ഈട് വെച്ച് എടുക്കുന്ന സുരക്ഷിത വായ്പകൾ ബാങ്കുകളിൽ നിന്ന് പോലും ലഭിക്കാൻ കുറഞ്ഞ ക്രെഡിറ്റ് സ്കോർ തടസ്സമല്ല. ദീർഘ കാലയളവിൽ കുറഞ്ഞ പലിശയിൽ ഇത്തരം വായ്പകൾ ലഭിക്കും. ഇവ കൃത്യ സമയത്ത് തിരിച്ചടയ്ക്കുന്നത് മോശം ക്രെഡിറ്റ് സ്കോറിനെ ക്രമേണ വർധിപ്പിക്കാൻ സഹായിക്കും.
ഒരു മോശപ്പെട്ട ക്രെഡിറ്റ് സ്കോർ മെച്ചപ്പെടുത്താനുള്ള ചില മാർഗങ്ങൾ
- അച്ചടക്കമുള്ള ഒരു സാമ്പത്തിക സമീപനം ആവശ്യമാണ്
- വായ്പകൾ കൃത്യസമയത്ത് തിരിച്ചടയ്ക്കുക
- ഇഎംഐ മുടക്കം വരാതെ ശ്രദ്ധിക്കുക
- ക്രെഡിറ്റ് കാർഡുകളിലെ ക്യുമുലേറ്റീവ് സിയുആർ പരിധി 30% ലെവലിനു താഴെ നിർത്തുക
- അനാവശ്യമായി നിരവധി വായ്പകൾക്കായി ഒരേ സമയം അന്വേഷണം നടത്താതിരിക്കുക
- ക്രെഡിറ്റ് റിപ്പോർട്ടിൽ സംശയം തോന്നിയാൽ വായ്പ അനുവദിച്ച സ്ഥാപനത്തിനോട് ശരിയായ വിവരങ്ങൾ എത്രയും വേഗം ക്രെഡിറ്റ് ബ്യൂറോയ്ക്ക് നൽകാൻ ആവശ്യപ്പെടാം.
- ക്രെഡിറ്റ് സ്കോർ മെച്ചപ്പെടുന്നതു വരെ വായ്പ ആവശ്യമെങ്കിൽ, ഈട് വെച്ചുള്ള സുരക്ഷിത വായ്പകൾ, പരിഗണിക്കാം
ഒരു കുറഞ്ഞ ക്രെഡിറ്റ് സ്കോർ ഒരു സൂചകം മാത്രമാണ്. ഒരു വ്യക്തിക്ക് പല സാഹചര്യങ്ങളാൽ ക്രെഡിറ്റ് സ്കോറിൽ കുറവ് വരാം. അതിനർത്ഥം അയാൾ സാമ്പത്തികമായി നിസ്സഹായനാണെന്നല്ല. ക്രെഡിറ്റ് സ്കോർ എന്നത് വർധിപ്പിക്കാൻ സാധിക്കുന്ന ഒരു നമ്പർ മാത്രമാണ്. അത് അച്ചടക്കമുള്ള ആർക്കും സാധിക്കാവുന്നതേയുള്ളൂ.