വാട്‍സ്ആപ്പിലൂടെ മ്യൂച്വൽ ഫണ്ടിൽ നിക്ഷേപം നടത്താം; എളുപ്പവഴി ഇതാ

ഡൽഹി: കൊറോണ വൈറസിന്റെ പശ്ചാത്തലത്തിൽ ആളുകൾ കൂടുതലായും ഓൺലൈൻ ഇടപാടുകളാണ് തെരഞ്ഞെടുക്കുന്നത്. കുറഞ്ഞ പരിശ്രമവും സമയ ലാഭവുമാണ് ആളുകളെ ഓൺലൈൻ ഇടപാടിലേക്ക് ആകർഷിക്കുന്നത്. കൂടാതെ പുറത്തേക്ക് ഇറങ്ങാതെ എളുപ്പത്തിൽ ഇടപാടുകൾ നടത്താനുമാകും. നിലവിലെ സാഹചര്യം കണക്കിലെടുത്ത് മ്യൂച്വൽ ഫണ്ട് കമ്പനികൾ വാട്‍സ്ആപ്പിലൂടെ അവരുടെ പദ്ധതികളിൽ നിക്ഷേപം നടത്താൻ ഉപഭോക്താക്കൾക്ക് അവസമൊരുക്കുന്നുണ്ട്. എച്ച്ഡിഎഫ്സി മ്യൂച്വൽ ഫണ്ട്, ആദിത്യ ബിർള സൺ ലൈഫ് മ്യൂച്വൽ ഫണ്ട്, കൊട്ടക് മ്യൂച്വൽ ഫണ്ട്, ഐസിഐസിഐ പ്രുഡൻഷ്യൽ മ്യൂച്വൽ ഫണ്ട്, മോത്തിലാൽ ഓസ്വാൾ മ്യൂച്വൽ ഫണ്ട് തുടങ്ങിയ സ്ഥാപനങ്ങൾ
വാട്‍സ്‍ആപ്പ് വഴി നിക്ഷേപം നടത്താൻ ഉപഭോക്താക്കൾക്ക് സൗകര്യമൊരുക്കിയിട്ടുണ്ട്.

വാട്‍സ്ആപ്പ് വഴി മ്യൂച്വൽ ഫണ്ടിൽ എങ്ങനെ നിക്ഷേപിക്കാം?

നിക്ഷേപം നടത്താൻ ആഗ്രഹിക്കുന്ന വ്യക്തി അയാളുടെ മൊബൈൽ‌ ഫോണിൽ നിക്ഷേപം നടത്താനുദ്ദേശിക്കുന്ന കമ്പനിയുടെ ‌(എ‌എം‌സി) നിർദ്ദിഷ്ട വാട്ട്‌സ്ആപ്പ് നമ്പറുകൾ സേവ് ചെയ്തിരിക്കണം. ഇതിന് പിന്നാലെ സംഭാഷണം ആരംഭിക്കുന്നതിനായി ഒരു ‘ഹായ്’ സന്ദേശം അയയ്‌ക്കുകയും ഇത് തുടരുന്നതിനായി കമ്പനിയുടെ നിർദ്ദേശങ്ങൾ‌ പാലിക്കുകയും വേണം.

മ്യൂച്വൽ ഫണ്ട് ട്രാൻസ്ഫർ ഏജൻസിയായ കമ്പ്യൂട്ടർ ഏജ് മാനേജുമെന്റ് സർവീസസിന് (സി‌എ‌എം‌എസ്) വാട്ട്‌സ്ആപ്പ് അധിഷ്ഠിത ‘കാംസെർവ്’(CAMServ ) എന്ന സൗകര്യവും ഉണ്ട്. ഇത് വ്യക്തികളെ വിവിധ സാമ്പത്തിക, സാമ്പത്തികേതര ഇടപാടുകൾ നടത്താൻ സഹായിക്കും. നിക്ഷേപകർക്ക് +91 6384 863 848 എന്ന നമ്പറിൽ ബന്ധപ്പെടാനും കൂടുതൽ ആശയവിനിമയത്തിനായി 'ഹായ്' എന്ന് സന്ദേശം അയയ്ക്കാനും സാധിക്കും.

ആദ്യമായി മ്യൂച്വൽ ഫണ്ടിൽ നിക്ഷേപിക്കുന്നവർ ഈ വഴി തിരഞ്ഞെടുക്കേണ്ടതുണ്ടോ?

ഓൺ‌ലൈൻ വഴിയായാലും വാട്ട്‌സ്ആപ്പ് വഴിയായാലും ആദ്യമായി മ്യൂച്വൽ ഫണ്ടിൽ നിക്ഷേപിക്കുന്നവരെ സംബന്ധിച്ചിടത്തോളം വളരെ പ്രയാസകരമാണ്. പരിമിതമായ അറിവും പരിചയവുമില്ലാത്തതിനാൽ ഓൺലൈൻ വഴിയുള്ള നിക്ഷേപം തെറ്റായ തീരുമാനമെടുക്കുന്നതിന് ഇടയാക്കുമെന്ന് പോളിസി എക്സ്.കോമിന്റെ സിഇഒയും സ്ഥാപകനുമായ നേവൽ ഗോയൽ പറഞ്ഞു.

ആദ്യമായി മ്യൂച്വൽ ഫണ്ടിൽ നിക്ഷേപിക്കുന്നവർ തീർച്ചയായും ഒരു സാമ്പത്തിക ഉപദേഷ്ടാവിനെ സമീപിക്കേണ്ടതുണ്ട്. ഇതുകൂടാതെ നിക്ഷേപവുമായി ബന്ധപ്പെട്ട റിസ്ക് വിശകലനം ചെയ്യേണ്ടത് ആദ്യഘട്ടത്തിൽ വളരെ പ്രധാനമാണ്. നിക്ഷേപത്തിന്റെ ഉദ്ദേശ്യവും സവിശേഷതകളും മനസിലാക്കിയിട്ടുണ്ടെങ്കിൽ ഉപഭോക്താക്കൾക്ക് മുന്നോട്ട് പോകാമെന്നും അദ്ദേഹം കൂട്ടിച്ചേർത്തു.