തട്ടിപ്പുകൾ പലവിധം
ജാഗ്രത പുലർത്തിയില്ലെങ്കിൽ എളുപ്പത്തിൽ സൈബർ കുറ്റകൃത്യങ്ങൾക്ക് ഇരയാകും. സംഭാഷണത്തിൽ സംശയം തോന്നാത്ത ആളുകളെ തെറ്റിദ്ധരിപ്പിക്കാൻ ഇപ്പോൾ തട്ടിപ്പുകാർ കൂടുതലായി ഉപയോഗിക്കുന്നത് ക്യുആർ കോഡുകളാണ്. വിവിധ പേയ്‌മെൻറുകൾ നടത്തുന്നതിന് പേടിഎം,ഭീം ആപ്പുകൾ നമ്മൾ ദിവസേന ഉപയോഗിക്കാറുണ്ട്. ഡിജിറ്റൽ പേയ്‌മെൻറുകൾ ദൈനം ദിന ജീവിതത്തിൻെറ ഭാഗമായതോടെ സൈബർ കുറ്റകൃത്യങ്ങളും പെരുകി. പലപ്പോഴും വിവിധ ക്യുആർ കോഡുകൾ സ്കാൻ ചെയ്യുന്നതിലൂടെ തങ്ങളുടെ അക്കൗണ്ടിൽ നിന്ന് പണം പിൻവലിക്കാൻ തട്ടിപ്പുകാർക്ക് നമ്മൾ അധികാരം നൽകുക കൂടെയാണ് ചെയ്യുന്നത് എന്നോര്‍ക്കാം.
വേണം, ജാഗ്രത
ഏതെങ്കിലും പേയ്‌മെൻറ് ആപ്പ് ഉപയോഗിച്ച് ക്യൂആര്‍ കോഡുകൾ സ്കാൻ ചെയ്യുമ്പോൾ ജാഗ്രത പാലിക്കുക. ഒരു പ്രത്യേക അക്കൗണ്ടിലേക്ക് പണം ട്രാൻസ്ഫർ ചെയ്യുന്നതിനായി ക്യൂആര്‍ കോഡുകളിൽ അക്കൗണ്ട് വിശദാംശങ്ങൾ ഉൾക്കൊണ്ടിട്ടുണ്ടാകും. നമുക്ക് പണം ലഭിക്കാൻ ഒരിക്കലും ക്യുആർ കോഡ് സ്കാൻ ചെയ്യരുത്. പെയ്മൻറുകൾക്കൊഴികെ പണം ലഭിക്കുന്നതുമായി ബന്ധപ്പെട്ട ഇടപാടുകൾക്ക് ബാർകോഡുകൾ, ക്യുആർ കോഡുകൾ എന്നിവ സ്കാൻ ചെയ്യുകയോ മൊബൈൽ ബാങ്കിംഗ് പിൻ ,പാസ്‌വേഡുകൾ മുതലായവ നൽകുകയോ ചെയ്യേണ്ടതില്ല എന്നോര്‍ക്കാം.
Also Read: ഹോം ലോൺ എടുത്തിട്ടുണ്ടോ? നിരക്ക് വര്‍ധന വായ്പാ തിരിച്ചടവിനെ എങ്ങനെ ബാധിക്കും?
വാട്ട്‌സ്ആപ്പിലോ മറ്റേതെങ്കിലും ആപ്പിലോ ഒരു ക്യുആർ കോഡിൻെറ ചിത്രം ലഭിച്ചെന്നു കരുതുക. ബാങ്ക് അക്കൗണ്ടിൽ സൗജന്യ ക്യാഷ് റിവാർഡുകൾ ലഭിക്കുന്നതിന് കോഡ് സ്കാൻ ചെയ്യാനും തുക നൽകാനും തട്ടിപ്പുകാര്‍ ആവശ്യപ്പെട്ടേക്കാം. പിന്നാലെ യുപിഐ പിൻ നൽകാൻ ആവശ്യപ്പെടും. പിൻ നൽകിക്കഴിഞ്ഞാൻ ഏതാനും സെക്കൻഡുകൾക്കുള്ളിൽ അക്കൗണ്ടിൽ നിന്ന് മുഴുവൻ പണവും നഷ്ടമായേക്കാം. ഡൽഹി മുഖ്യമന്ത്രി അരവിന്ദ് കെജ്‌രിവാളിൻെറ മകൾ പഴയ ഒരു സോഫ വിൽക്കാൻ ശ്രമിക്കുന്നതിനിടെ 34,000 രൂപയാണ് അടുത്തിടെ നഷ്ടമായത്.