ബാങ്കിങ് ഇടപാടുകൾക്കായി പുതിയൊരു മെഷീൻ; എ‌ഡി‌ഡബ്ല്യുഎം വഴി എങ്ങനെ പണം പിൻവലിക്കാം?

കൊച്ചി: ബാങ്കിൽ പോകാതെ ബാങ്കിങ് ഇടപാടുകൾ എളുപ്പത്തിൽ നടത്താൻ എസ്ബിഐ അവതരിപ്പിച്ച പുതിയ സംവിധാനമാണ് ഓട്ടോമേറ്റഡ് ഡെപ്പോസിറ്റ് ആൻഡ് വിത്ത്ഡ്രോവൽ മെഷീൻ (എ‌ഡി‌ഡബ്ല്യുഎം). എടിഎം പോലുള്ള യന്ത്രമാണിതെങ്കിലും എടിഎമ്മിനേക്കാൾ കൂടുതൽ സേവനം ഈ മെഷീൻ വഴി ഉപഭോക്താക്കൾക്ക് ലഭിക്കും. പണം നിക്ഷേപിക്കാനും പിൻവലിക്കാനും മാത്രമല്ല ബാലൻസ് പരിശോധന, ലോൺ അക്കൗണ്ടിൽ പണം നിക്ഷേപിക്കൽ, മിനി സ്റ്റേറ്റ്മെന്റ്, പാസ്‍വേർഡ് മാറ്റൽ തുടങ്ങിയ നിരവധി സേവനങ്ങളും മെഷീനിൽ ലഭ്യമാണ്. ബാങ്കിൽ കയറി ഇറങ്ങുന്നതും നീണ്ടനിരയിൽ നിൽക്കുന്നതും ഒഴിവാക്കാനാകും എന്നതാണ് എ‌ഡി‌ഡബ്ല്യുഎം കൊണ്ടുള്ള പ്രധാനഗുണം.

ഡെബിറ്റ് കാർഡ് ഉപയോഗിച്ച് എ‌ഡി‌ഡബ്ല്യുഎം വഴി ഉപഭോക്താവിന് സ്വന്തം അക്കൗണ്ടിലേക്കും മറ്റൊരാളുടെ എസ്‌ബി‌ഐ അക്കൗണ്ടിലേക്കും തൽക്ഷണം പണമയക്കാം. ഇടപാടിന് ശേഷം രസീതും അപ്‌ഡേറ്റ് ചെയ്ത അക്കൗണ്ട് ബാലൻസും ലഭിക്കും. ഇതുകൂടാതെ പി‌പി‌എഫ്, ആർ‌ഡി, ലോൺ അക്കൗണ്ടുകളിലേക്കും പണം നിക്ഷേപിക്കാം. ഡെബിറ്റ് കാർഡില്ലാതെ 49,900 രൂപവരെയും ഡെബിറ്റ് കാർഡ് ഉപയോഗിച്ച് 2 ലക്ഷം രൂപവരെയും നിക്ഷേപിക്കാം. എസ്‌ബി‌ഐ ഡെബിറ്റ് കാർഡ് ഉപയോഗിച്ച് സ്വന്തം അക്കൗണ്ടിലേക്ക് പണം നിക്ഷേപിക്കുന്നതിന് നിരക്കുകൾ നൽകേണ്ടതില്ല.

Also Read: ബാങ്കിലും പോകേണ്ട, നീണ്ട ക്യൂവിലും നിൽക്കേണ്ട; ഇനി എല്ലാം ഈ മെഷീൻ നോക്കിക്കോളും

എസ്‌ബി‌ഐ എ‌ഡി‌ഡബ്ല്യുഎമ്മിൽ നിന്ന് എങ്ങനെ പണം പിൻവലിക്കാം?

1. ഡെബിറ്റ് കാർഡുമായി തൊട്ടടുത്ത എസ്‌ബി‌ഐ എ‌ഡി‌ഡബ്ല്യുഎം സന്ദർ‍ശിക്കുക.
2. ഡെബിറ്റ് കാർഡ് മെഷീനിലേക്ക് ഇടുക.
3. ബാങ്കിങ് ഓപ്ഷൻ തിരഞ്ഞെടുക്കുക.
4. ഭാഷ തിരഞ്ഞെടുത്ത് നെക്സറ്റ് ബട്ടൺ അമർത്തുക.
5. എടിഎം പിൻ നമ്പർ നൽകുക.
6. ക്യാഷ് പിൻവലിക്കൽ ഓപ്ഷൻ തിരഞ്ഞെടുക്കുക.
7. പിൻവലിക്കേണ്ട തുക ടൈപ്പ് ചെയ്യുക.