നിങ്ങളുടെ സാമ്പത്തിക കാര്യങ്ങളിൽ ഒരു നോമിനി ആവശ്യമാകുന്നത് എന്തുകൊണ്ട് ?

സമ്പത്ത് സൃഷ്ടിക്കുക എന്നത് ഒരു ദീർഘകാലത്തെ നടപടിക്രമമാണെന്ന് പറയാം. ഒരു വ്യക്തിയുടെ കാലശേഷം, അദ്ദേഹം ഒരു ജീവിതം കൊണ്ട് നേടിയെടുത്ത സമ്പത്ത്, യഥാർത്ഥ വ്യക്തിയിലേക്കു തന്നെയാണോ പോകുന്നത് എന്ന് ഉറപ്പാക്കേണ്ടതാണ്. ഇവിടെയാണ് നോമിനേഷൻ പ്രധാനമാകുന്നത്. ഇതിലൂടെ ഒരു വ്യക്തിയുടെ മരണ ശേഷം ഒന്നോ അതിലധികമോ വ്യക്തികൾക്ക് മരണമടഞ്ഞ വ്യക്തിയുടെ സ്വത്ത് ഉപയോഗിക്കാൻ സാധിക്കും. ഉദാഹരണത്തിന് ഒരു വ്യക്തിക്ക് ലൈഫ് ഇൻഷുറൻസ് പോളിസിയുണ്ടെന്ന് കരുതുക. ഇവിടെ, പോളിസിയിൽ നൽകിയിരിക്കുന്ന നോമിനിക്കാണ് ആ വ്യക്തിയുടെ മരണശേഷം ക്ലെയിം അനുവദിച്ചു കിട്ടുന്നത്.

സമാനമായി, ബാങ്ക് എഫ്ഡി, ആർഡി, സേവിങ്സ് അക്കൗണ്ടുകൾ, പിപിഎഫ്, മ്യൂച്വൽ ഫണ്ട്, സ്റ്റോക്ക് തുടങ്ങിയവയിൽ നോമിനിയായി നിശ്ചയിച്ചിരിക്കുന്ന വ്യക്തികൾക്കാണ് തുക/ആസ്തി ലഭിക്കുക. അർഹതയില്ലാത്ത/തെറ്റായ നോമിനിയാണ് നിർദേശിക്കപ്പെട്ടിരിക്കുന്നതെങ്കിൽ സമ്പത്തിനോ, ആസ്തികൾക്കോ റിസ്കുണ്ട്. അവ ദുരുപയോഗം ചെയ്യാൻ ഇവിടെ സാധ്യതയുണ്ട്. ഒരു നോമിനി ഉണ്ടായിരിക്കേണ്ടത് ആവശ്യമായത് എന്തു കൊണ്ടെന്നും, എങ്ങനെ ഒരു നോമിനിയെ ശ്രദ്ധാപൂർവ്വം തിരഞ്ഞെടുക്കാമെന്നും വിശദമാക്കുകയാണ് ഇവിടെ.

Also Read : സാമ്പത്തിക കാര്യത്തിൽ സ്മാർട്ട് ആകാം; അറിഞ്ഞിരിക്കാം ചില മികച്ച വഴികൾ

ഒരു നോമിനി പ്രധാനമാകുന്നത് എന്തു കൊണ്ട് ?
ആസ്തികളുടെ ഉടമസ്ഥൻ മരണപ്പെട്ടാൽ അവയുടെ കസ്റ്റോഡിയനാണ് ഒരു നോമിനി. ഉടമസ്ഥന്റെ മരണശേഷം, യോഗ്യതയുള്ള ആസ്തികൾ ലഭിക്കാൻ നോമിനിക്ക് നിയമപരമായ അവകാശമുണ്ട്. ഇവിടെ നിയമപരമായ പിന്തുടർച്ചാവകാശമല്ല നോമിനികൾക്കുള്ളത്. ഗാർഡിയൻസ് എന്ന നിലയിലാണ്, യഥാർത്ഥ നിയമാവകാശം ലഭിക്കുന്നതു വരെ നോമിനികകൾ കണക്കാക്കപ്പെടുന്നത്.

ഒരു വ്യക്തിയുടെ വിവിധ തരം അക്കൗണ്ടുകൾക്കും, ആസ്തികൾക്കും ഒന്നോ അതിലധികമോ നോമിനികൾ ആകാവുന്നതാണ്. ഉദാഹരണത്തിന് ഒരു വ്യക്തിക്ക് വിവിധ എഫ്ഡികൾ, സേവിങ്സ് അക്കൗണ്ടുകൾ, പിപിഎഫ്, മ്യൂച്വൽ ഫണ്ടുകൾ, ലൈഫ് ഇൻഷുറൻസ് തുടങ്ങിയവയുണ്ടാകും. ഇത്തരത്തിലുള്ള ആസ്തികളുടെ തരം അനുസരിച്ച് ഒന്നോ, അതിലധികമോ നോമിനികളെ നിശ്ചയിക്കാവുന്നതാണ്. ഉദാഹരണത്തിന് മ്യൂച്വൽ ഫണ്ടുകൾ, ഇൻഷുറൻസ് പോളിസികൾ എന്നിവയ്ക്ക് ഒന്നിലധികം നോമിനികളെ നിശ്ചയിക്കാവുന്നതാണ്. ആസ്തിയുടെ ഉടമ നിശ്ചയിച്ചിരിക്കുന്ന പ്രകാരം, ഒന്നിലധികം നോമിനികൾക്ക് ആസ്തികളുടെ വിഹിതം ലഭിക്കും. എന്നാൽ സാധാരണ ഗതിയിൽ ബാങ്ക് അക്കൗണ്ടുകളിൽ ഒരു സിംഗിൾ നോമിനിയെ നൽകാനാണ് അനുവാദമുള്ളത്.

Also Read : നിങ്ങളുടെ സിബിൽ സ്കോർ കുറയാതെ നിലനിർത്താൻ ചില മാർഗങ്ങൾ

ആരായിരിക്കണം ഒരു നോമിനി ?
ഏത് വ്യക്തികളെയും നോമിനിയായി നിശ്ചയിക്കാം. അത് ജീവിത പങ്കാളിയാവാം, രക്ഷിതാക്കളാവാം, ബന്ധുക്കൾ, സുഹൃത്തുക്കൾ തുടങ്ങിയവരുമാവാം. പ്രോപർട്ടിയുടെയോ, ആസ്തിയുടെയോ നിയമപരമായ പിന്തുടർച്ചാവകാശമുള്ള വ്യക്തിയായിരിക്കണം നോമിനി എന്നത് നിർബന്ധമല്ല. നോമിനി, നിയമപരമായ പിന്തുടർച്ചാവകാശമുള്ള വ്യക്തിയല്ലെങ്കിൽ അവർ ആസ്തിയുടെ കസ്റ്റോഡിയൻസ് എന്ന നിലയിലാണ് നിയമത്തിന്റെ മുന്നൽ കണക്കാക്കപ്പെടുന്നത്.

ഒരു ബാങ്ക് അക്കൗണ്ടിൽ ഒരു നോമിനിയെ നിർദേശിക്കാൻ മാത്രമെ അനുവാദമുള്ളു എങ്കിൽ, സേവിങ്സ്,റെക്കറിങ്,എഫ്ഡി മുതലായ വിവിധ തരം അക്കൗണ്ടുകൾക്കായി വ്യത്യസ്ത നോമിനികളെ നിർദേശിക്കാവുന്നതാണ്.

മ്യൂച്വൽ ഫണ്ടുകളിൽ ഒരു ഫോളിയോയിൽ പരമാവധി മൂന്നു നോമിനികളെ നിർദേശിക്കാൻ അവസരമുണ്ട്. സിംഗിൾ ഫോളിയോയിൽ ഒന്നിലധികം സ്കീമുകൾ ഉണ്ടെങ്കിൽ, എല്ലാ സ്കീമുകളിലും ഒരേ നോമിനേഷൻ വിവരങ്ങളാണ് ഉണ്ടായിരിക്കുക.

നോമിനിയുടെ അഭാവം ഒരു വ്യക്തിയുടെ സമ്പത്ത്/ആസ്തിയെ റിസ്കുള്ളതാക്കുന്നു. നോമിനിയെ നിശ്ചയിക്കുന്നതിലൂടെ ആസ്തികളുടെ ഉടമ ആഗ്രഹിക്കുന്ന വ്യക്തികളിലേക്ക് സമ്പത്ത്/ആസ്തി കൈമാറ്റം ചെയ്യപ്പെടുന്നു.

സെറ്റിൽമെന്റ് സമയത്ത് ഏറ്റവും പുതിയതായി ചേർത്തിരിക്കുന്ന നോമിനിയെ ആണ് പരിഗണിക്കുക. എല്ലാ നിക്ഷേപങ്ങൾക്കും, ആസ്തികൾക്കും നോമിനിയെ നിശ്ചയിച്ചിട്ടുണ്ടെന്ന് ഉറപ്പാക്കുക. സ്ഥിരമായി ഇവ റിവ്യൂ ചെയ്യുകയും, ആവശ്യമായ മാറ്റങ്ങൾ വരുത്തുകയും ചെയ്യുക.

Read Latest Business News and Malayalam News