പണത്തിന് അത്യാവശ്യം വന്നോ? സ്ഥിരനിക്ഷേപത്തിൽ നിന്ന് വായ്പ എടുക്കുന്നത് ഉചിതമാണോ എന്നറിയാം

സ്ഥിര നിക്ഷേപങ്ങൾ ഏറ്റവും പരമ്പരാഗതവും വിശ്വസനീയവുമായ നിക്ഷേപ മാർഗങ്ങളിൽ ഒന്നാണ്. തടസ്സരഹിതമായ പ്രക്രിയ, ഉറപ്പുള്ള ഫിക്സഡ് റിട്ടേണുകൾ, മറ്റ് നിരവധി ഘടകങ്ങൾ എന്നിവ സ്ഥിരനിക്ഷേപങ്ങൾ അഥവാ ഫിക്സഡ് ഡിപ്പോസിറ്റുകളെ ആകർഷകമായ നിക്ഷേപ ഓപ്ഷനാക്കി മാറ്റുന്നു. എന്നിരുന്നാലും, ഫിക്സഡ് ഡിപ്പോസിറ്റുകൾ ഒരു നിക്ഷേപ മാർഗം എന്നതിലുപരി മറ്റു പല ആവശ്യങ്ങൾക്കും ഉപകരിക്കുമെന്നത് വളരെ കുറച്ച് പേർക്ക് മാത്രമേ അറിയുകയുള്ളു.

നിങ്ങൾക്ക് പണത്തിന് അടിയന്തിര ആവശ്യമുണ്ടെങ്കിൽ, പലരും പരിഗണിക്കുന്ന ഓപ്ഷനുകളിലൊന്ന് വിവിധ ആസ്തികളിൽ നിന്ന് വായ്പ ലഭ്യമാക്കുന്നതാണ്. എന്നാൽ നിങ്ങളുടെ ഫിക്സഡ് ഡിപ്പോസിറ്റിന്മേൽ വായ്പ ലഭിക്കുമെന്നത് നിങ്ങൾക്കറിയാമോ?


സ്ഥിരനിക്ഷേപം ഈടായി പണയം വെച്ച് വായ്പയെടുക്കാവുന്നതാണ്. സ്ഥിര നിക്ഷേപത്തിന്മേൽ വായ്പയെടുക്കുന്നത് സ്വാഭാവികമായും സുരക്ഷിതമായ ഓപ്ഷനാണ്. ചില സാമ്പത്തിക അടിയന്തരാവസ്ഥ നേരിടുന്നതിന്, മറ്റ് വായ്പാ രൂപങ്ങളെ അപേക്ഷിച്ച് ബാങ്കുകൾ താരതമ്യേന കുറഞ്ഞ പലിശ നിരക്ക് ഈടാക്കുന്നതിനാൽ സ്ഥിരനിക്ഷേപം ഒരു ഈടായി പരിഗണിക്കാൻ പല സാമ്പത്തിക ഉപദേഷ്ടാക്കളും നിർദ്ദേശിക്കുന്നു. ഈ വായ്പ പ്രധാനമായും ഓവർഡ്രാഫ്റ്റ് രൂപത്തിലാണ് ബാങ്ക് വിതരണം ചെയ്യുന്നത്.

സ്ഥിരനിക്ഷേപത്തിനുമേൽ ലഭ്യമാകുന്ന വായ്പ തുക എത്രയാണ്?
ഒരു വ്യക്തിക്ക് സ്ഥിരനിക്ഷേപത്തിന്മേൽ ലഭ്യമാകുന്ന വായ്പ തുക ഫിക്സഡ് ഡെപ്പോസിറ്റ് തുകയെ ആശ്രയിച്ചിരിക്കുന്നു. ഇത് നിക്ഷേപ തുകയുടെ 90 ശതമാനം മുതൽ 95 ശതമാനം വരെ പോകാം.

സ്ഥിരനിക്ഷേപങ്ങൾക്കെതിരെ ആർക്കൊക്കെ വായ്പ ലഭിക്കും?
വ്യക്തിഗത അക്കൗണ്ട് ഉടമകൾക്കും, ജോയിന്റ് അക്കൗണ്ട് ഉടമകൾക്കും ഉൾപ്പെടെ എല്ലാ സ്ഥിര നിക്ഷേപക്കാർക്കും വായ്പക്കായി എഫ്ഡി ഈടായി ഉപയോഗിക്കാം. എന്നിരുന്നാലും, പ്രായപൂർത്തിയാകാത്തവരുടെ പേരിലുള്ള എഫ്ഡി ഈ സൗകര്യത്തിന് യോഗ്യമല്ല. കൂടാതെ, അഞ്ച് വർഷത്തെ നികുതി ലാഭിക്കുന്ന എഫ്ഡിയുള്ള നിക്ഷേപകർക്ക് ഇത്തരത്തിലുള്ള വായ്പയ്ക്ക് അപേക്ഷിക്കാനാകില്ല.

സ്ഥിരനിക്ഷേപത്തിന്മേലുള്ള വായ്പ - നേട്ടങ്ങൾ

• വ്യക്തിഗത വായ്പകൾ (ബാധകമായ എഫ്ഡി നിരക്കിനേക്കാൾ 0.5 ശതമാനം മുതൽ 2 ശതമാനം വരെ ഉയർന്നവ) പോലുള്ള മറ്റ് തരത്തിലുള്ള വായ്പകളുമായി താരതമ്യം ചെയ്യുമ്പോൾ സ്ഥിരനിക്ഷേപങ്ങൾക്ക് മേലുള്ള വായ്പയ്ക്ക് കുറഞ്ഞ പലിശ നിരക്കാണ് ബാങ്കുകൾ ഈടാക്കുന്നത്.

• നിങ്ങൾ സ്ഥിരനിക്ഷേപം അകാലത്തിൽ പിൻവലിക്കലിക്കേണ്ടതില്ല. അത് എഫ്‌ഡിയുടെ പലിശയിൽ നഷ്‌ടമുണ്ടാക്കും.

• സ്ഥിരനിക്ഷേപത്തിനെതിരെ വായ്പ എടുക്കുമ്പോൾ പ്രൊസസ്സിംഗ് ഫീ നൽകേണ്ടതില്ല.

• ആഭ്യന്തര, എൻആർഐ എന്നീ സ്ഥിരനിക്ഷേപങ്ങൾക്കെതിരെയും ഈ വായ്പ ലഭിക്കും.

• വായ്പ തിരിച്ചടവ് ഒറ്റത്തവണയായോ തവണകളായോ നടത്താം (എഫ്ഡി കാലാവധിക്ക് ശേഷമല്ലാതെ)

Also Read : ആധാർ-ലിങ്ക്ഡ് ഇടപാടുകൾ കൂടുതൽ സുരക്ഷിതമാക്കാൻ എയർടെൽ പേയ്‌മെന്റ് ബാങ്ക്
സ്ഥിരനിക്ഷേപത്തിന്മേൽ വായ്പ ലഭിക്കുമ്പോൾ ഒരു ഉപഭോക്താവിന്റെ എഫ്ഡി ഈടായി നൽകുന്നതിനാൽ, അങ്ങനെ സമാഹരിച്ച വായ്പ സുരക്ഷിതമാണ്. അതിനാൽ, സുരക്ഷിത വായ്പയ്ക്ക് ഈടാക്കുന്ന പലിശ കുറവാണ്. വായ്പയെടുക്കുന്നയാൾക്ക് തുക തിരിച്ചടയ്ക്കാൻ കഴിയുന്നില്ലെങ്കിൽ, ബാങ്കിന് അത് സ്ഥിരനിക്ഷേപ തുകയിൽ നിന്ന് എളുപ്പത്തിൽ തിരിച്ചെടുക്കാനാകും. സാധാരണയായി, ഈ തുക കാലാവധി പൂർത്തിയാകുമ്പോഴാണ് തീർപ്പാക്കപ്പെടുന്നത്.

Read Latest Business News and Malayalam News