രാജ്യാന്തര നിലവാരത്തിൽ ഇൻക്യുബേറ്റര്‍
രാജ്യത്തൊട്ടാകെയുള്ള സ്റ്റാര്‍ട്ടപ്പുകൾ നവീകരിക്കാനും പുതിയ സംരംഭകത്വ സംസ്കാരം വളർത്തിയെടുക്കുന്നതിനുള്ള ഇന്ത്യൻ സർക്കാരിന്റെ പ്രധാന പദ്ധതിയാണ് അടൽ ഇന്നൊവേഷൻ മിഷൻ. സർവകലാശാലകളിലും ബിസിനസുകളിലും സംരംഭകത്വം പ്രോത്സാഹിപ്പിക്കുക എന്ന ലക്ഷ്യത്തോടെ രാജ്യാന്തര നിലവാരത്തിൽ ഇൻക്യുബേറ്ററുകൾ സ്ഥാപിക്കുന്ന പദ്ധതിയാണിത്..
രാജ്യത്തെ എല്ലാ സ്റ്റാർട്ടപ്പുകളുടെ വളര്‍ച്ച ലക്ഷ്യമിട്ടുള്ളതാണ് പദ്ധതി. സര്‍വകലാശാലകളിലും എൻ‌ജി‌ഒ, എസ്‌എം‌ഇ, തുടങ്ങിയ ഇടങ്ങളിലും ലോകോത്തര അടൽ ഇൻകുബേറ്ററുകൾ സ്ഥാപിക്കാൻ സഹായം ലഭിക്കും. 10 കോടി രൂപ വരെയാണ് ഗ്രാൻറ് ലഭിക്കുക. അടൽ ഇന്നവേഷൻ മിഷനു കീഴിലാണ് ഗ്രാൻ്റ് ലഭിക്കുക. പരമാവധി 5 വര്‍ഷം വരെയായിരിക്കും സഹായം
ബിസിനസ് കൂട്ടായ്മയ്ക്ക് ഇ-ബിസ് പോര്‍ട്ടൽ
രാജ്യത്ത് ബിസിനസ് വളര്‍ച്ച ലക്ഷ്യമിട്ടുള്ള ഇൻറർനെറ്റ് പ്ലാറ്റ്‌ഫോമാണിത്. പൊതു-സ്വകാര്യ പങ്കാളിത്തത്തോടെ ഇൻഫോസിസ് ആണ് ഇ-ബിസ് പോർട്ടൽ സൃഷ്ടിച്ചത്. ഇന്ത്യൻ നിക്ഷേപകർക്കും ബിസിനസ്സ് സമൂഹത്തിനുമിടയിലുള്ള ആശയവിനിമയ ഉപാധിയായി ഇത് പ്രവർത്തിക്കുന്നു. ആന്ധ്രാപ്രദേശ്, ദില്ലി, ഹരിയാന, മഹാരാഷ്ട്ര, തമിഴ്‌നാട് എന്നിവയാണ് സേവനങ്ങൾ ആരംഭിച്ച അഞ്ച് ഇന്ത്യൻ സംസ്ഥാനങ്ങൾ. മറ്റു സംസ്ഥാനങ്ങളിലേക്കും ഈ സർക്കാർ പദ്ധതിയുടെ സേവനങ്ങൾ വിപുലീകരിക്കും.
ശാസ്ത്ര സാങ്കേതിക വിദ്യാരംഗത്ത് സഹായം
കംപ്യൂട്ടര്‍ സോഫ്റ്റ്‍വെയര്‍ കയറ്റുമതി ലക്ഷ്യമിട്ട് സോഫ്റ്റ്‍ വെയര്‍ ടെക്നോളജി പാര്‍ക്ക് സര്‍ക്കാര്‍ സ്ഥാപിച്ചിട്ടുണ്ട്. പദ്ധതിക്ക് കീഴിൽ കയറ്റുമതി അധിഷ്ഠിത സംരംഭങ്ങൾക്കാണ് സഹായം ലഭിക്കുക. രാജ്യത്തെ നാഷണൽ സയൻസ് ആൻഡ് ടെക്നോളജി എന്റർപ്രണർഷിപ്പ് ഡവലപ്മെന്റ് ബോർഡ്, സയൻസ് ആൻഡ് ടെക്നോളജി വകുപ്പ് എന്നിവ ചേര്‍ന്ന് ന്യൂ ജനറേഷൻ ഇന്നൊവേഷൻ ആന്റ് എന്റർപ്രണർഷിപ്പ് ഡവലപ്മെന്റ് സെന്റർ ഉദ്ഘാടനം ചെയ്തിരുന്നു.സ്റ്റാര്‍ട്ടപ്പുകൾക്ക് മാർഗനിർദ്ദേശം, സഹായം എന്നിവ ഈ സ്ഥാപനത്തിലൂടെ ലഭിക്കും., ഈ രംഗത്ത് സംരംഭങ്ങൾ പടുത്തുയര്‍ത്താൻ ആഗ്രഹിക്കുന്ന വിദ്യാർത്ഥികൾക്ക് ഈ സാധ്യതകൾ പ്രയോജനപ്പെടുത്താം