സംസ്ഥാനത്ത് കെട്ടിട നികുതി മാത്രമല്ല, വിനോദ നികുതിയും വര്‍ധിക്കും

കെട്ടിട നികുതി വര്‍ധന ഉള്‍പ്പെടെ നികുതി, ലൈസന്‍സ് ഫീസുകള്‍ വര്‍ധിപ്പിക്കാന്‍ സര്‍ക്കാര്‍ തീരുമാനിച്ചു. സംസ്ഥാന സര്‍ക്കാരിന്‍റെയും തദ്ദേശ ഭരണ സ്ഥാപനങ്ങളുടെയും വരുമാനം ഉയര്‍ത്താന്‍ ലക്ഷ്യമിട്ടാണ് തീരുമാനം. നിലവില്‍ 023 മാര്‍ച്ച് 31നകം നികുതി പരിഷ്‌കരിക്കുമെന്ന് സര്‍ക്കാര്‍ വൃത്തങ്ങള്‍ അറിയിച്ചു.

50 ചതുരശ്ര മീറ്ററിന് മുകളിലുള്ള വീടുകളെ വസ്തു നികുതിയുടെ പരിധിയില്‍ കൊണ്ട് വന്ന് കെട്ടിട നികുതി നിരക്കിന്‍റെ പകുതി നിരക്കില്‍ വസ്‌തു നികുതി ഈടാക്കാനും തീരുമാനമായിട്ടുണ്ട്. 2022 ഏപ്രിലില്‍ നിര്‍മിച്ച 3000 ചതുരശ്ര അടിയില്‍ കൂടുതല്‍ തറക്ക് വിസ്തീര്‍ണമുള്ള ഉപയോഗിക്കുന്ന വസ്തുക്കള്‍ക്ക് അടിസ്ഥാന നികുതിയുടെ 15 ശതമാനം തുക അധിക നികുതിയായി ഈടാക്കും.

മുനിസിപ്പല്‍ പരിധിയിലുള്ള കെട്ടിടങ്ങള്‍ പൊളിച്ച് മാറ്റിയാല്‍ അത് മുനിസിപ്പാലിറ്റികളെ അറിയിക്കണമെന്നും നിര്‍ദേശമുണ്ട്. അല്ലാത്ത പക്ഷം കെട്ടിടം നിലനില്‍ക്കുന്നതിന്റെ രേഖകള്‍ മുനിസിപ്പാലിറ്റി രേഖകളില്‍ ഉള്ളതു വരെ നികുതി ചുമത്തും. റോഡുകളുടെ വശങ്ങളില്‍ വാണിജ്യ ആവശ്യങ്ങള്‍ക്കായി വച്ചിട്ടുള്ള പരസ്യ ബോര്‍ഡുകള്‍ക്കും ഇനി ലൈസന്‍സ് ഫീസ് ഏര്‍പ്പെടുത്തും. വിനോദ നികുതി നിയമം ഭേദഗതി ചെയ്ത് വിനോദ നികുതി 10 ശതമാനമായി ഉയര്‍ത്തിയേക്കും.

പൊതു വിദ്യാലയങ്ങള്‍, ആശുപത്രികള്‍, അങ്കണവാടികള്‍ എന്നിവിടങ്ങളില്‍ കൂടുതല്‍ മെച്ചപ്പെട്ട സൗകര്യങ്ങള്‍ ഉണ്ടാക്കിയെടുക്കുന്നതിനും പാവപ്പെട്ടവരെ സഹായിക്കുന്നതിനും ഡൊണേഷന്‍ കാമ്പയിനുകള്‍ സംഘടിപ്പിക്കാനും സര്‍ക്കാര്‍ തീരുമാനിച്ചിട്ടുണ്ട്.