സ്വര്‍ണത്തിനു പുറമെ ഉയര്‍ന്ന് വെള്ളി വില; മൂന്ന് ദിവസം കൊണ്ട് 10 ശതമാനം വര്‍ധന

കൊച്ചി: സ്വര്‍ണത്തിനൊപ്പം വെള്ളി വിലയും കുതിച്ചുയരുമോ? മൂന്നു ദിവസം കൊണ്ട് വെള്ളി വിലയിൽ 10 ശതമാനത്തോളം വര്‍ധന ഉണ്ടായിട്ടുണ്ട്. ഇന്ന് റെക്കോര്‍ഡ് നിലവാരത്തിലായിരുന്നു ഫ്യൂച്ചര്‍ വ്യാപാരം. ഒരു കിലോഗ്രാമിന് 74,194 രൂപയായിരുന്നു വില. രാവിലെ 74,411 രൂപ എന്ന എക്കാലത്തെയും ഉയര്‍ന്ന നിരക്കിലായിരുന്നു വ്യാപാരം.

കൊറോണയെ തുടര്‍ന്ന് സുരക്ഷിത നിക്ഷേപത്തെ ആശ്രയിക്കുന്നവര്‍ കൂടുന്നതാണ് സ്വര്‍ണ വില ഉയര്‍ത്തിയത് . ഇതു വെള്ളി വിലയും ഉയര്‍ത്തിയേക്കും. ജൂലൈയിൽ വെള്ളി വില നാലു വര്‍ഷത്തെ ഉയരത്തിൽ എത്തിയിരുന്നു. സ്വര്‍ണ വിലയിൽ ഈ വര്‍ഷം 35ശതമാനമാണ് വര്‍ധനയുണ്ടായിരിക്കുന്നത്.

Also Read: സ്വര്‍ണ വില ഉയരുന്നു; ഗോൾഡ് സ്കീമുകൾ ആകര്‍ഷമാക്കാൻ ഒരുങ്ങി സര്‍ക്കാര്‍

അടുത്ത 12 മാസങ്ങൾക്കുള്ളിൽ വെള്ളി വില വീണ്ടും കുതിച്ചുയര്‍ന്നേക്കും എന്നാണ് ഈ രംഗത്തെ വിദ്ഗ്ധര്‍ കരുതുന്നത്. ഔൺസിന് 50 ഡോളര്‍ എന്ന നിലവാരത്തിലേയ്ക്ക് സമീപ ഭാവിയിൽ തന്നെ വെള്ളി വില ഉയര്‍ന്നേക്കും എന്നാണ് കണക്കാക്കുന്നത്.

ഏതാനും മാസങ്ങൾക്കുള്ളിൽ 30 ഡോളര്‍ വരെയായി വില ഉയരും. ഡോളറിൻെറ മൂല്യം ഇടിയുമ്പോൾ പ്ലാറ്റിനം ഉൾപ്പെടെയുള്ള ലോഹങ്ങൾക്കും വില കയറിയേക്കും. റെക്കോര്‍ഡ് നിലവാരത്തിലാണ് ഇന്ന് സ്വര്‍ണത്തിൻെറ ട്രേഡിങ് നടന്നത്.