സ്വര്‍ണം പണയത്തിലാണോ? ആവശ്യമുള്ളപ്പോൾ തിരിച്ചെടുത്ത് ഉപയോഗിയ്ക്കാം

കൊച്ചി: പെട്ടെന്ന് അപ്രതീക്ഷിതമായി ഒരാവശ്യം വന്നാൽ കൈയിലുള്ള സ്വര്‍ണം പണയം വെച്ച് പണം കണ്ടെത്തുന്നവരാണ് അധികവും. ഇപ്പോൾ കൊവിഡ് കാലത്ത് ഗോൾഡ് ലോണുകൾക്ക് ഡിമാൻഡ് ഏറെയാണ്. കൈവശമുള്ള സ്വര്‍ണാഭരണങ്ങൾ പണയം വെച്ചാൽ ഒരത്യാവശ്യം വന്നാൽ ഉപയോഗിയ്ക്കാൻ ആകില്ല എന്ന വിഷമം മിക്കവര്‍ക്കുമുണ്ട്. ഗോൾഡ് ഓവര്‍ഡ്രാഫ്റ്റ് സ്കീമുകൾ നിങ്ങൾക്കായുള്ളതാണ്. മിക്ക ധനകാര്യ സ്ഥാപനങ്ങളും ഇപ്പോൾ ഇത്തരം സ്കീമുകൾ അവതരിപ്പിച്ചിട്ടുണ്ട് .

വായ്പാ തുക അടച്ചു തീര്‍ക്കാതെ തന്നെ പണയം വെച്ച സ്വര്‍ണം ആവശ്യം വരുമ്പോൾ എടുത്ത് ഉപയോഗിയ്ക്കാൻ അനുവദിയ്ക്കുന്ന സ്കീമുകൾ ഉണ്ട് . ഇതിന് ധനകാര്യ സ്ഥാപനങ്ങൾക്ക് പ്രത്യേക നിബന്ധനകൾ ഉണ്ടായിരിക്കും. സ്വര്‍ണത്തിൻെറ മൂല്യം അനുസരിച്ച് 60 ശതമാനം മുതൽ 80 ശതമാനം വരെ തുക ധനകാര്യസ്ഥാപനങ്ങൾ നൽകാറുണ്ട്.

Also Read: ഡിജിറ്റൽ ഗോൾഡ് വാങ്ങണോ? ഇക്കാര്യങ്ങൾ അറിഞ്ഞിരിയ്ക്കാം

താരതമ്യേന പലിശ നിരക്ക് കൂടുതലായ ഇത്തരം പദ്ധതികൾക്ക് കീഴിൽ സ്വര്‍ണാഭരണങ്ങൾ നൽകി ആവശ്യമായ തുക ലോണായി എടുക്കാം. ഒരു വര്‍ഷമായിരിക്കും മിക്ക സ്കീമുകളുടെയും കാലാവധി. വായ്പാ കാലവധിയിൽ എപ്പോൾ വേണമെങ്കിലും സ്വര്‍ണം എടുക്കുകയും തിരികെ നിക്ഷേപിയ്ക്കുകയും ചെയ്യാം.

ഡെബിറ്റ് കാര്‍ഡ് ഉപയോഗിച്ച് ബാങ്ക് എടിഎമ്മുകളിലൂടെ വായ്പാ തുക എപ്പോൾ വേണമെങ്കിലും പിൻവലിയ്ക്കാം. ഓവര്‍ഡ്രാഫ്റ്റ് സൗകര്യം അനുസരിച്ച് പിൻവലിച്ച തുകയ്ക്ക് മാത്രം പലിശ നൽകിയാൽ മതിയാകും.