ചെക്ക് ഇടപാടുകൾ നടത്താറുണ്ടോ? പോസിറ്റീവ് പേ എന്താണെന്ന് അറിഞ്ഞിരിയ്ക്കണം

കൊച്ചി: ചെക്ക് തട്ടിപ്പു തടയാൻ 50,000രൂപയ്ക്കു മുകളിലുള്ള ചെക്ക് കൈമാറുന്നതിന് പ്രത്യേക വ്യവസ്ഥയുമായി ആര്‍ബിഐ. പോസിറ്റീവ് പേ എന്ന സംവിധാനമാണ് ഇതിന് ഇനി ബാധകമാക്കുക. ചെക്ക് നൽകുന്നയാൾ വിവരം അറിയിച്ചാൽ മാത്രമേ ബാങ്ക് ഇനി ചെക്കുകൾ ക്ലിയര്‍ ചെയ്യൂ.

ചെക്കുകളുടെ സുരക്ഷിതത്വം ഉറപ്പാക്കാനും ചെക്ക് ഉപയോഗിച്ച് വ്യാപകമാകുന്ന തട്ടിപ്പുകൾ തടയാനുമാണ് ആര്‍ബിഐയുടെ പ്രത്യേക നടപടി. മൊത്തം ചെക്കുകളുടെ 20 ശതമാനത്തോളം 50,000 രൂപയ്ക്ക് മുകളിൽ മൂല്യം ഉള്ളതാണ്.

Also Read: ബാങ്ക് ലോൺ അടയ്ക്കാൻ നിവൃത്തിയില്ലേ? ലോൺ കാലാവധി ബാങ്കുകൾക്ക് തീരുമാനിയ്ക്കാം

പോസിറ്റീവ് പേയ്ക്ക് കീഴിൽ നിലവിൽ ചെക്ക് ഇടപാടുകൾ ഇങ്ങനെ

പോസിറ്റീവ് പേ വ്യവസ്ഥയ്ക്ക് കീഴിൽ ചെക്ക് മാറാൻ ചെക്ക് നമ്പര്‍, ചെക്ക് ഡേറ്റ്, ചെക്ക് ഉടമയുടെ പേര്, അക്കൗണ്ട് വിവരങ്ങൾ എന്നിവയ്ക്ക് ഒപ്പം ചെക്കിൻെറ ഫ്രണ്ട്, റിവേഴ്സ് ചിത്രങ്ങൾ എന്നിവ ബാങ്കിന് നൽകണം. ഇതിന് ശേഷമേ ചെക്ക് നൽകേണ്ടയാൾക്ക് ഇത് കൈമാറാനാകൂ. പോസിറ്റീവ് സംവിധാനം വഴി ബാങ്കിൽ ചെക്ക് ഉടമ നൽകിയിരിക്കുന്ന വിവരങ്ങൾ പരിശോധിച്ച് മാത്രമേ ചെക്ക് മാറി പണം ആക്കാൻ എത്തുന്നയാൾക്ക് പണം നൽകൂ.

നിലവിൽ ഇതേ സംവിധാനം ഐസിഐസിഐ ബാങ്ക് അവതരിപ്പിച്ചിട്ടുണ്ട്. ബാങ്കിൽ നൽകിയ വിവരങ്ങളും ചെക്ക് കൈമാറുന്ന ഇടപാടുകാരൻ നൽകുന്ന വിവരങ്ങളും കൃത്യമാണെങ്കിൽ മാത്രമേ ബാങ്ക് പണം നൽകൂ. വിവരങ്ങളിൽ കൃത്യതക്കുറവുണ്ടെങ്കിൽ വിവരം ചെക്ക് ഉടമയെ അറിയിക്കും.