ഇന്നത്തെ സ്വര്‍ണ വില

കൊച്ചി: ഇന്ന് സംസ്ഥാനത്ത് സ്വര്‍ണ വിലയിൽ മാറ്റമില്ല. തുടര്‍ച്ചയായ രണ്ടാം ദിവസവും പവന് 38,080 രൂപ കടന്നാണ് സ്വര്‍ണ വില. ഒരു പവൻ സ്വര്‍ണത്തിന് 38,080 രൂപയും ഗ്രാമിന് 4,760 രൂപയുമാണ് വില. രാജ്യാന്തര വിപണിയിൽ സ്വര്‍ണ വില ഉയര്‍ന്നു. ഔൺസിന് 1,907.68 ഡോളറിൽ ആണ് വ്യാപാരം. നവംബര്‍ ഒന്ന്, രണ്ട് തിയതികളിൽ 37,680 രൂപയ്ക്കായിരുന്നു സ്വര്‍ണ വ്യാപാരം. രണ്ടു ദിവസം കൊണ്ട് പവന് 400 രൂപയുടെ വര്‍ധനയാണ് ഉണ്ടായിരിക്കുന്നത്.

ഒക്ടോബര്‍ 1 മുതൽ 31വരെ സ്വര്‍ണ വിലയിൽ 400 രൂപയുടെ വര്‍ധനയാണ് ഉണ്ടായത്. അതേസമയം സെപ്റ്റംബറിൽ 440 രൂപ കുറഞ്ഞിരുന്നു. ഒക്ടോബർ 27ന് ആണ് സ്വര്‍ണ വില ഒക്ടോബറിലെ ഏറ്റവും ഉയര്‍ന്ന നിരക്കിൽ എത്തിയത്. ഒരു പവന് 37,880 രൂപയായിരുന്നു വില. സെപ്തംബർ 15,16,21 ദിവസങ്ങളിലാണ് സ്വർണ വില സെപ്റ്റംബറിലെ ഏറ്റവും ഉയർന്ന നിരക്കിലെത്തിയത്. പവന് 38,160 രൂപയായിരുന്നു വില. ഗ്രാമിന് 4,770 രൂപയും.

Also Read: പ്രായം പത്തു വയസ്സിൽ താഴെ ; കുട്ടി സംരംഭകരുടെ വരുമാനം ലക്ഷങ്ങൾ

പ്രതിസന്ധിഘട്ടത്തിൽ സ്വര്‍ണത്തെ ആശ്രയിച്ച നിക്ഷേപകര്‍ സ്വര്‍ണം വിറ്റ് ലാഭം എടുക്കുന്നതാണ് ഇടയ്ക്ക് വില ഇടിവിലേയ്ക്ക് നയിച്ചത്. അതേസമയം അടുത്ത ഒരു വര്‍ഷത്തിനുള്ളിൽ സ്വര്‍ണ വിലയിൽ 10-15 ശതമാനം വരെ വര്‍ധന ഉണ്ടായേക്കാം എന്ന് വിദഗ്ധര്‍ ചൂണ്ടിക്കാട്ടുന്നു.

വെള്ളി വില കുറഞ്ഞു. ഇന്ന് ഒരു ഗ്രാം വെള്ളിയ്ക്ക് 61.70 രൂപയാണ് വില. എട്ടുഗ്രാമിന് 493.60 രൂപയും കിലോഗ്രാമിന് 61,700 രൂപയുമാണ് വില.