Todays Gold Rate: സംസ്ഥാനത്ത് സ്വര്‍ണവില മാറ്റമില്ലാതെ തുടരുന്നു; പവന് 27,480 രൂപ

കൊച്ചി: സംസ്ഥാനത്ത് സ്വര്‍ണവില മാറ്റമില്ലാതെ തുടരുന്നു. പവന് (22 ക്യാരറ്റ്) 27,480 രൂപയിലാണ് വ്യാപാരം. ഒരു ഗ്രാം സ്വര്‍ണത്തിന് 3,435 രൂപ എന്ന നിരക്കിലാണ് വ്യാപാരം നടക്കുന്നത്. 24 ക്യാരറ്റ് സ്വര്‍ണത്തിന് 29,896 രൂപയാണ്. ആഗോള വിപണിയിൽ മാറ്റമില്ലാത്തതാണ് ആഭ്യന്തര വിപണിയിലും പ്രതിഫലിച്ചത്. സംസ്ഥാനത്ത് തുടര്‍ച്ചയായ മൂന്നാം ദിനമാണ് സ്വര്‍ണവ്യാപാരം 27,480 രൂപയിൽ നടക്കുന്നത്. ഈ മാസത്തെ ഉയര്‍ന്നനിരക്ക് 27,480 രൂപയും കുറഞ്ഞ നിരക്ക് 25,680 രൂപയുമാണ്. കഴിഞ്ഞ മാസത്തെ ഏറ്റവും ഉയര്‍ന്ന നിരക്ക് 26,120 രൂപയും കുറഞ്ഞ നിരക്ക് 24,920 രൂപയുമാണ്. രണ്ടാം മോദി സര്‍ക്കാരിൻ്റെ ആദ്യ ബജറ്റിൽ സ്വര്‍ണത്തിൻ്റെ ഇറക്കുമതി തീരുവ 2.5 ശതമാനം ഉയര്‍ത്തി 12.5 ശതമാനമാക്കിയിരുന്നു. ഇതേത്തുടര്‍ന്നാണ് സ്വര്‍ണവില കുത്തനെ ഉയര്‍ന്നത്. നേരത്തെ 10 ശതമാനമായിരുന്നു സ്വര്‍ണത്തിൻ്റെ ഇറക്കുമതി തീരുവ.

ഡൽഹിയിൽ സ്വർണം പവന് (22 ക്യാരറ്റ്) 29,280 രൂപയിലും 24 ക്യാരറ്റിന് 30,240 രൂപയിലുമാണ് വ്യാപാരം നടക്കുന്നത്. ആഗോള വിപണിയിൽ ഒരു ഗ്രാം സ്വർണത്തിന് 48.24 ഡോളറിൽ വ്യാപാരം തുടരുകയാണ്. അമേരിക്കയിലെ സാമ്പത്തിക നികുതി തര്‍ക്കങ്ങളും ഓഹരി വിപണിയിലെ അസ്ഥിരതയും സ്വര്‍ണവില കൂടാൻ സാധ്യതയുണ്ടെന്ന് ബിസിനസ് വൃത്തങ്ങള്‍ വ്യക്തമാക്കിയിരുന്നു. രാജ്യത്ത് സ്വര്‍ണവില വര്‍ധിച്ചതോടെ സ്വര്‍ണം വിൽക്കുന്നവരുടെ എണ്ണത്തിലും വര്‍ധനവ് രേഖപ്പെടുത്തിയെന്ന റിപ്പോര്‍ട്ടുകളുമുണ്ട്. സ്വര്‍ണം വിൽക്കുന്നവരുടെ എണ്ണത്തിൽ 10-15 ശതമാനം വര്‍ധനവാണ് രേഖപ്പെടുത്തിയിരിക്കുന്നത്.

സംസ്ഥാനത്ത് വെള്ളിവില മാറ്റമില്ലാതെ തുടരുകയാണ്. വെള്ളി ഗ്രാമിന് 44.52 രൂപ എന്ന നിരക്കിലാണ് ഇന്ന് വ്യാപാരം നടക്കുന്നത്. ഒരു കിലോ വെള്ളിക്ക് 44,520 രൂപ എന്ന നിരക്കിലാണ് വ്യാപാരം.