Gold Rate in Kerala: സ്വര്‍ണ വിലയിൽ വൻ വര്‍ധനവ്; പവന് ഇന്ന് കൂടിയത് 200 രൂപ

കൊച്ചി: സംസ്ഥാനത്ത് സ്വര്‍ണ വിലയില്‍ വൻ വര്‍ധനവ്. പവന് 200 രൂപയാണ് ഇന്ന് വര്‍ധിച്ചിരിക്കുന്നത്. പവന് 23,000 രൂപയിലാണ് ഇന്ന് വ്യാപാരം പുരോഗമിക്കുന്നത്. ഗ്രാമിന് 25 രൂപ വര്‍ധിച്ച് 2,875 രൂപയിലാണ് ഇന്നത്തെ വ്യാപാരം നടക്കുന്നത്. ഈ മാസത്തെ ഏറ്റവും കുറഞ്ഞ നിരക്കിലായിരുന്നു ഇന്നലത്തെ വ്യാപാരം നടന്നത്.

ഈ മാസം ആദ്യം സ്വര്‍ണ വില കുത്തനെ വര്‍ധിച്ചിരുന്നു. തുടര്‍ന്ന് ദീപാവലി ദിവസം പവന് 23,720 രൂപയിലായിരുന്നു വ്യാപാരം നടന്നത്. തുടര്‍ന്ന് സ്വര്‍ണ വില നിരന്തരം കുറയുകയും ചെയ്തിരുന്നു. 22,800 രൂപ വരെ ഈ മാസം സ്വര്‍ണ വില എത്തി.

അതേസമയം വെള്ളി വില മാറ്റമില്ലാതെ തുടരുകയാണ്. ഗ്രാമിന് 41.30 എന്ന നിരക്കിലാണ് വെള്ളി വ്യാപാരം നടക്കുന്നത്. ഒരു കിലോയ്ക്ക് 41,300 രൂപയിലാണ് വ്യാപാരം പുരോഗമിക്കുന്നത്. കഴിഞ്ഞ ദിവസങ്ങളിലും വെള്ളി വിലയിൽ വ്യതിയാനം നേരിട്ടിരുന്നു.