Gold Rate in Kerala: സ്വര്‍ണ വില റെക്കോര്‍ഡ് നിരക്കിൽ തുടരുന്നു

കൊച്ചി: സംസ്ഥാനത്ത് സ്വര്‍ണ വില റെക്കോര്‍ഡ് നിരക്കിൽ തുടരുന്നു. ഇന്നലെ പവന് 200 രൂപ വര്‍ധിച്ച് 24,600 രൂപയിലെത്തിയിരുന്നു. ഇതേ നിരക്കിലാണ് ഇന്നും വ്യാപാരം പുരോഗമിക്കുന്നത്. നാല് ദിവസങ്ങളായി മാറ്റമില്ലാതെ തുടര്‍ന്ന ശേഷമാണ് ഇന്നലെ സ്വര്‍ണ വില വര്‍ധിച്ചത്. ആറ് ദിവസങ്ങൾക്ക് മുൻപും സ്വര്‍ണ വിലയിൽ റെക്കോര്‍ഡ് വര്‍ധനവ് രേഖപ്പെടുത്തിയിരുന്നു. പവന് അന്ന് കൂടിയത് 400 രൂപയാണ്. ഈ മാസത്തെ ഏറ്റവും ഉയര്‍ന്ന നിരക്കിലാണ് ഇന്നത്തെ വ്യാപാരം പുരോഗമിക്കുന്നത്. ഗ്രാമിന് 25 രൂപ കൂടി 3,075 രൂപയിലാണ് വ്യാപാരം.

ഈ മാസത്തിനുള്ളിൽ തന്നെ സ്വര്‍ണ വില 1240 രൂപയാണ് കൂടിയത്. ഈ മാസം സ്വര്‍ണ വിലയിൽ ഏറ്റവും കൂടുതൽ കുതിപ്പാണ് രേഖപ്പെടുത്തിയിട്ടുള്ളത്. 23,440 രൂപയാണ് ഈ മാസത്തെ ഏറ്റവും കുറഞ്ഞ സ്വര്‍ണ വില. 24,600 രൂപയാണ് ഈ മാസത്തെ ഏറ്റവും ഉയര്‍ന്ന സ്വര്‍ണ വില നിരക്ക്.

അതേസമയം വെള്ളി വിലയിൽ നേരിയ ഇടിവ് ഉണ്ടായിട്ടുണ്ട്. ഗ്രാമിന് 41.40 രൂപയിലാണ് വ്യാപാരം നടക്കുന്നത്. കിലോയ്ക്ക് 41,400 രൂപയാണ് വില.