സ്വര്‍ണം കുതിപ്പു തുടരുന്നു; മാസത്തെ ഉയര്‍ന്ന നിലയിലേക്ക്

കൊച്ചി: സ്വര്‍ണം വീണ്ടും കുതിപ്പു തുടരുകയാണ്. ഇന്നലെ പവന് 160 രൂപ വര്‍ധിച്ച് 35,800ലെത്തിയ സ്വര്‍ണം വരും ദിവസം തന്നെ മാസത്തെ പതിയ റെക്കോഡ് സ്ഥാപിച്ചേക്കുമെന്നാണു വിലയിരുത്തല്‍. ഇന്ത്യന്‍ ഓഹരി സൂചികകള്‍ സ്ഥിരത കൈവരിക്കുന്നതിന്റെ ഭാഗമായി തിരുത്തല്‍ നടപടികളിലേക്കു കടന്നതാണു സ്വര്‍ണത്തിനു നേട്ടമാകുന്നത്.

ഈ മാസം 15ന് പവന് രേഖപ്പെടുത്തിയ 35,840 രൂപയാണ് മാസത്തെ ഉയര്‍ന്ന നിരക്ക്. നിലവില്‍ പവന് 35,800 രൂപയും ഗ്രാമിന് 4,475 രൂപയുമാണ്. 15ന് ശേഷം സ്വര്‍ണവില പ്രാദേശിക വിപണിയില്‍ കുറഞ്ഞിട്ടില്ല. കൂടുകയാണ്. ഈ മാസം ഒന്നിന് പവന് 34,720 രൂപയായിരുന്നു. അതായത് ഈ മാസം മാത്രം 1,080 രൂപ വര്‍ധിച്ചിട്ടുണ്ട്. രാജ്യാന്തര വിപണിയില്‍ ട്രോയ് ഔണ്‍സിന് 1,792.45 ഡോളറിലാണ് വ്യാപാരം നടക്കുന്നത്.

ഒക്ടോബറില്‍ വില ഉയര്‍ന്നത് സ്വര്‍ണ നിക്ഷേപകര്‍ക്ക് പ്രതീക്ഷ നല്‍കിയിരുന്നു. പണപ്പെരുപ്പം ഉയരുന്നതിനാല്‍ വില താല്‍ക്കാലികമായി ഇടിഞ്ഞാലും സ്വര്‍ണ വില ഉയരാനുള്ള സാധ്യതകള്‍ നിരീക്ഷകര്‍ ചൂണ്ടിക്കാട്ടുന്നുണ്ട്. സെപ്റ്റംബര്‍ നാലു മുതല്‍ ആറു വരെ ഒരു പവന്‍ സ്വര്‍ണത്തിന് 35,600 രൂപയായിരുന്നു വില. ഇതായിരുന്നു സെപ്റ്റംബറിലെ ഏറ്റവും ഉയര്‍ന്ന നിരക്ക്. പിന്നീട് വില കുറഞ്ഞു. സെപ്റ്റംബര്‍ 30ന് കഴിഞ്ഞ അഞ്ച് മാസങ്ങള്‍ക്കിടയിലെ ഏറ്റവും താഴ്ന്ന നിരക്കില്‍ ആയിരുന്നു സ്വര്‍ണ വില. പവന് 34,440 രൂപയായിരുന്നു വില. കഴിഞ്ഞ മാസം പവന് 1,000 രൂപയാണ് കുറഞ്ഞത് . ഓഹരികള്‍ കരുത്താര്‍ജിച്ചതും യുഎസ് ബോണ്ടുകളില്‍ നിന്നുള്ള വരുമാനം ഉയര്‍ന്നതും കഴിഞ്ഞ മാസം സ്വര്‍ണത്തിന് മങ്ങലേല്‍പ്പിച്ചിരുന്നു . ഡോളറിന്റെ വിനിമയ മൂല്യം ഉയര്‍ന്നതും സ്വര്‍ണത്തിന് തിരിച്ചടിയായി മാറിയിരുന്നു.

ആഗസ്റ്റ് ഒന്ന്, രണ്ട് തിയതികളില്‍ ആഗസ്റ്റിലെ ഏറ്റവും ഉയര്‍ന്ന നിരക്കിലായിരുന്നു സ്വര്‍ണ വില . ഒരു പവന്‍ സ്വര്‍ണത്തിന് 36,000 രൂപയായിരുന്നു വില. ഒരു ഗ്രാം സ്വര്‍ണത്തിന് 4,500 രൂപയും. പിന്നീട് ആഗസ്റ്റ് ഒന്‍പതിന് സ്വര്‍ണ വില പവന് 34,680 രൂപയായി കുറഞ്ഞിരുന്നു. ഇതാണ് ആഗസ്റ്റിലെ ഏറ്റവും കുറഞ്ഞ നിരക്ക്.

Also Read: ഗീത ഗോപിനാഥ് ജോലി ഉപേക്ഷിക്കുന്നു








വെള്ളി വില

വെള്ളി വിലയിലും ഇന്നു മാറ്റമില്ല. ഒരു ഗ്രാം വെള്ളിക്ക് 69.90 രൂപയിലാണ് വ്യാപാരം നടക്കുന്നത്. എട്ട് ഗ്രാം വെള്ളിയ്ക്ക് 559.20 രൂപയാണ് വില. പത്ത് ഗ്രാം വെള്ളിക്ക് 699 രൂപയും ഒരു കിലോഗ്രാമിന് 69,900 രൂപയുമാണ് വില. ഇന്നലെ കിലോഗ്രാമിന് 69,800 രൂപയായിരുന്നു വില.