സ്വർണവില കുറഞ്ഞു; മേയ് മാസത്തെ താഴ്ന്ന നിലയിൽ; വെള്ളി നിരക്കിലും ഇടിവ്

കൊച്ചി: സംസ്ഥാനത്ത് സ്വർണ വിലയിൽ വീണ്ടും ഇടിവ്. ചൊവ്വാഴ്ച കേരളാ വിപണിയിൽ, ഒരു പവൻ സ്വർണത്തിന് (8 ഗ്രാം, 22 കാരറ്റ്) 80 രൂപയാണ് കുറഞ്ഞത്. ഒരു പവൻ സ്വർണത്തിന്റെ വില 44,360 രൂപയിലേക്ക് താഴ്ന്നു. ഇതോടെ ഒരു ഗ്രാം സ്വർണത്തിൽ 10 രൂപയുടെ കുറവും രേഖപ്പെടുത്തി. ഒരു ഗ്രാം സ്വർണത്തിന് 5,545 രൂപയായി താഴ്ന്നു. നിലവിൽ, മേയ് മാസക്കാലയളവിലെ താഴ്ന്ന നിലവാരത്തിലാണ് സംസ്ഥാനത്തെ സ്വർണ വിലയുള്ളത്. കഴിഞ്ഞ മൂന്ന് ദിവസവും സ്വർണവില 44,440 രൂപയിൽ മാറ്റമില്ലാതെ തുടരുകയായിരുന്നു.

യുഎസ് കടമെടുപ്പ് പരിധി ഉയർത്തുന്നത് സംബന്ധിച്ച് നേരിട്ടിരുന്ന വെല്ലുവിളി ഒഴിവായതോടെ, രാജ്യാന്തര വിപണിയിലെ സ്വർണ വിലയിൽ തിരുത്തൽ നേരിടുകയാണ്. ഇതിന്റെ പ്രതിഫലനമാണ് ആഭ്യന്തര വിപണിയിലും ഉണ്ടായത്. അതേസമയം ഒരു മാസക്കാലയളവിൽ സംസ്ഥാനത്ത് സ്വർണ വിലയിൽ രേഖപ്പെടുത്തിയ കൂടിയ വില 45,760 രൂപയായിരുന്നു. മേയ് 5-നാണ് ഉയർന്ന വില കുറിച്ചത്. നിലവിൽ, മേയ് മാസത്തെ ഉയർന്ന നിരക്കിൽ നിന്നും 1,400 രൂപയുടെ ഇടിവാണ് സ്വർണ വിലയിൽ നേരിട്ടിരിക്കുന്നത്. സമാനമായി ഒരു ഗ്രാം സ്വർണത്തിൽ 175 രൂപയും കുറഞ്ഞിട്ടുണ്ട്.


ഇതിനിടെ മൾട്ടി കമ്മോഡിറ്റി എക്സ്ചേഞ്ചിൽ (MCX), ഗോൾഡ് ഫ്യൂച്ചർസിന്റെ വിലയിൽ ഇടിവോടെയാണ് ഇന്നത്തെ വ്യാപാരം ആരംഭിച്ചത്. രണ്ട് മാസത്തെ താഴ്ന്ന നിലവാരത്തിലേക്ക് ഗോൾഡ് ഫ്യൂച്ചർസിന്റെ വില എത്തിച്ചേർന്നു. 10 ഗ്രാമിന്റെ ഗോൾഡ് ഫ്യൂച്ചർസ് കോൺട്രാക്ടിൽ 59,401 രൂപയിലാണ് ചൊവ്വാഴ്ചത്തെ വ്യാപാരം ആരംഭിച്ചിരിക്കുന്നത്. അതേസമയം രാജ്യാന്തര വിപണിയിൽ ഒരു ട്രോയ് ഔൺസ് സ്വർണത്തിന്റെ വില 0.12 ശതമാനം താഴ്ന്ന് 1,941.50 ഡോളറിലാണ് വ്യാപാരം പുരോഗമിക്കുന്നത്.

വെള്ളി വില

സ്വർണത്തിന് പിന്നാലെ വെള്ളി വിലയിലും ചൊവ്വാഴ്ച ഇടിവ് രേഖപ്പെടുത്തി. ചെന്നൈ വിപണിയിൽ, ഒരു ഗ്രാം വെള്ളിക്ക് 73 രൂപയാണ് ഇന്നത്തേക്ക് നിശ്ചയിക്കപ്പെട്ടത്. ഇതോടെ 8 ഗ്രാം വെള്ളിക്ക് 584 രൂപയും 10 ഗ്രാം വെള്ളിയുടെ വില 730 രൂപയുമായി താഴ്ന്നു. ഒരു കിലോഗ്രാം വെള്ളിയുടെ നിരക്ക് 73,000 രൂപയായും താഴ്ന്നു.

അതേസമയം എംസിഎക്സിൽ സിൽവർ ഫ്യൂച്ചർസിലും ഇടിവ് നേരിട്ടാണ് ചൊവ്വാഴ്ചത്തെ വ്യാപാരം പുനരാരംഭിച്ചിരിക്കുന്നത്. ഇന്നത്തെ വ്യാപാരത്തിന്റെ തുടക്കത്തിൽ രേഖപ്പെടുത്തിയ ഉയർന്ന വില 71,000 രൂപയും താഴ്ന്ന വില 70,837 രൂപയുമാണ്. രാജ്യാന്തര വിപണിയിൽ ഒരു ഔൺസ് വെള്ളിയുടെ വില 0.35 ശതമാനം നഷ്ടത്തോടെ 23.06 ഡോളറിലാണ് വ്യാപാരം പുരോഗമിക്കുന്നത്.