സ്വന്തമായി ഒന്നിലധികം വീടുകളുണ്ടോ? നികുതി ആനുകൂല്യങ്ങൾ നേടാം, അറിയേണ്ട കാര്യങ്ങളിതാ

ഭവന വായ്പ എടുത്ത് വീടു വയ്ക്കുകയോ വീട് വാങ്ങിക്കുകയോ ചെയ്യുന്നത് പതിവാണ്. ഭവന വായ്പ ഉപയോഗിച്ച് ഒന്നിലധികം വീടുകൾ വാങ്ങുന്നവരും വയ്ക്കുന്നവരും ഉണ്ട്. ഇത് നികുതി ആനുകൂല്യങ്ങൾ നേടാൻ സഹായിക്കുന്നമെന്ന് അറിയാമോ?. ഒന്നിലധികം വീടുകളുള്ളവർക്ക് അവ സ്വന്തമായി താമസിക്കുന്നതിനോ അല്ലെങ്കിൽ വാടകയ്ക്ക് നൽകുകയോ ചെയ്യാവുന്നതാണ്. ഇതിലേതാണെങ്കിലും ഭവന വായ്പയ്ക്ക് നൽകുന്ന പലിശയുടെ നികുതി വ്യത്യസ്തമായിരിക്കും. പുതിയ ആദായനികുതി നിയമങ്ങൾ അനുസരിച്ച് രണ്ടാമത്തെ വസ്തുവിൻമേൽ നിങ്ങൾക്ക് എങ്ങനെ നികുതി ആനുകൂല്യങ്ങൾ ക്ലെയിം ചെയ്യാമെന്ന് നോക്കാം.

രണ്ട് വീടുകളും നികുതി ആനുകൂല്യങ്ങളും

സ്വന്തം ആവശ്യത്തിനായി ഒരു വ്യക്തി രണ്ട് വസ്തുക്കൾ കൈവശം വച്ചിരിക്കുകയാണെങ്കിൽ 1961ലെ ആദായനികുതി നിയമത്തിലെ സെക്ഷൻ 23 അനുസരിച്ച് ആ വ്യക്തിയുടെ മൊത്തം വാർഷിക മൂല്യം പൂജ്യമായി കണക്കാക്കപ്പെടും. 2019-20 സാമ്പത്തിക വർഷം മുതൽ രണ്ടാമത്തെ വസ്തുവിൽമേൽ ലഭിക്കുന്ന വാടകയ്ക്ക് നികുതി ഏർപ്പെടുത്തുന്നത് നിർത്തി. എന്നാൽ 2020ന് മുമ്പ് രണ്ടാമത്തെ വസ്തു സ്വന്തം ആവശ്യത്തിനായി ഉപയോഗിക്കുന്നില്ലെങ്കിൽ നികുതി ആവശ്യത്തിനായി വാടകയ്ക്ക് നൽകുന്നതായി കണക്കാക്കപ്പെട്ടിരുന്നു. അത്തരമൊരു സാഹചര്യത്തിൽ മൊത്ത വാടക വരുമാനം കണക്കാക്കുന്നതിന് ആ വസ്തുവിൽ നിന്ന് ലഭിക്കുന്ന വാടകയാണ് കണക്കിലെടുക്കാറുണ്ടായിരുന്നത്.

Also Read: വേണ്ട ചൈനീസ് ഉത്പന്നങ്ങൾ; 371 ചൈനീസ് ഉത്പന്നങ്ങളുടെ ഇറക്കുമതി നിരോധിയ്ക്കാൻ ഒരുങ്ങി സര്‍ക്കാര്‍

കൈവശം വച്ചിരിക്കുന്ന രണ്ട് വസ്തുവകകളും സ്വന്തം ആവശ്യത്തിന് ഉപയോഗിക്കുന്നതാണെങ്കിലും അല്ലെങ്കിൽ വാടകയ്ക്ക് നൽകിയിരിക്കുകയാണെങ്കിലും ഭവന വായ്പയുടെ പലിശയ്ക്ക് കിഴിവായി രണ്ട് ലക്ഷം രൂപ വരെ നിങ്ങൾക്ക് ക്ലെയിം ചെയ്യാവുന്നതാണ്. കൂടാതെ ആദായനികുതി നിയമത്തിലെ സെക്ഷൻ 80 സി പ്രകാരം ഭവന വായ്പയുടെ തിരിച്ചടവിന് 1.5 ലക്ഷം രൂപ വരെയും ക്ലെയിമും നേടാനാകും. എന്നിരുന്നാലും പുതിയ നികുതി വ്യവസ്ഥ പ്രകാരം ഭവന വായ്പയുടെ പലിശയും ഭവന വായ്പകളുടെ തിരിച്ചടവും നികുതിയിളവിന് അർഹമല്ല.

വീടും വാടകയും നികുതി ഇളവും

ഈ വർഷം രണ്ടാമത്തെ വസ്തു വിൽക്കുകയാണെങ്കിൽ ഇതുവരെ ലഭിച്ച വാടക വസ്തുവിന്റെ മൊത്ത വാർ‌ഷിക മൂല്യമായി കണക്കാക്കും. കൂടാതെ പഞ്ചായത്തിലോ മുനിസിപ്പാലിറ്റിയിലോ അടച്ച രണ്ടാമത്തെ വീടിന്റെ യഥാർത്ഥ നികുതി, വസ്തുവകകളുടെ ഭവന വായ്പയ്ക്ക് നൽകുന്ന പലിശ എന്നീ ചെലവുകൾ‌ കിഴിവായി ക്ലെയിം ചെയ്യുകയും ചെയ്യാം. മേൽപ്പറഞ്ഞ രണ്ട് ചെലവുകൾ കുറച്ചതിനുശേഷം ലഭിച്ച മൊത്തം വാടക ലാഭമാണെങ്കിൽ നികുതിദായകന്റെ മൊത്ത വരുമാനത്തിലേക്ക് ഇത് ചേർക്കുകയും അർഹമായ സ്ലാബ് അനുസരിച്ച് നികുതി ചുമത്തുകയും ചെയ്യും. സ്വന്തമായി കൈവശം വച്ചിരിക്കുന്ന സ്വത്തുക്കളുടെ കാര്യത്തിലാണെങ്കിൽ ഭവന വായ്പയ്ക്ക് അടച്ച പലിശയ്ക്ക് പരമാവധി രണ്ട് ലക്ഷം രൂപ വരെ കിഴിവ് ലഭിക്കും.