നികുതി ഇളവ് ലഭിക്കുന്നതിനുള്ള നിക്ഷേപങ്ങളുടെ സമയപരിധി നീട്ടി

ഡൽഹി: കൊവിഡ്-19ന്റെ പശ്ചാത്തലത്തിൽ നടപ്പ് സാമ്പത്തിക വർഷത്തിൽ നികുതി ഇളവ് ലഭിക്കുന്നതിനുള്ള വിവിധ നിക്ഷേപങ്ങൾക്കുള്ള സമയപരിധി ആദായനികുതി വകുപ്പ് നീട്ടി. പുതിയ വിഞ്ജാപന പ്രകാരം ജൂലൈ 31 വരെ നികുതി ഇളവ് ലഭിക്കുന്നതിനായി നിക്ഷേപങ്ങൾ നടത്താം. ഈ സമയപരിധിക്കകം നടത്തുന്ന നിക്ഷേപങ്ങള്‍ നികുതി ഇളവുകൾക്കായി പരിഗണിക്കും. നേരത്തെ ജൂൺ 30 ആയിരുന്നു അവസാന സമയപരിധിയായി നിശ്ചയിച്ചിരുന്നത്.

ആദായനികുതി (ഐടി) വകുപ്പ് വ്യാഴാഴ്ച ട്വിറ്ററിലൂടെയാണ് നികുതി ലാഭിക്കൽ നിക്ഷേപങ്ങളുടെയും പേയ്‌മെന്റുകളുടെയും സമയപരിധി നീട്ടിയ വിവരം അറിയിച്ചത്. നിലവിലെ സാഹചര്യം കണക്കിലെടുത്താണ് സമയപരിധി നീട്ടിയതെന്ന് ആദായനികുതി വകുപ്പ് ട്വീറ്റിൽ അറിയിച്ചു. 2019-20 സാമ്പത്തിക വർഷത്തെ നികുതി ലാഭിക്കൽ നിക്ഷേപങ്ങൾ / പേയ്മെന്റുകൾ 2020 ജൂലൈ 31 വരെ നടത്താം. ഇത് നികുതിദായകരെ സഹായിക്കുമെന്ന് പ്രതീക്ഷിക്കുന്നതായും വകുപ്പ് അധികൃതർ വ്യക്തമാക്കി.

Also Read: റോഡപകടത്തിൽപ്പെട്ടവർക്ക് രണ്ടരലക്ഷം രൂപ വരെ പണരഹിതമായ ചികിത്സ; പദ്ധതിയുമായി കേന്ദ്രസർക്കാർ

രാജ്യത്ത് കൊറോണ വൈറസ് പൊട്ടിപ്പുറപ്പെട്ട സാഹചര്യത്തിൽ, വിവിധ നിക്ഷേപങ്ങൾക്കും കിഴിവുകൾക്കുമുള്ള സമയപരിധി ആദായ വകുപ്പ് നീട്ടിയിട്ടുണ്ട്. ഫെബ്രുവരി, മാർച്ച് മാസങ്ങളിലെ ടിഡിഎസ് റിട്ടേൺ സമർപ്പിക്കുന്നതിനും എഫ്, പിപിഎഫ്, എൻ‌എസ്‌സി എന്നിവ ഫയൽ ചെയ്യുന്നതിനുമുള്ള സമയപരിധി ജൂലൈ 31 വരെ നീട്ടിയിട്ടുണ്ട്.

സെക്ഷൻ 54, 54 ജി എന്നിവ പ്രകാരം പുതിയ വീടിന് ലഭിക്കുന്ന കിഴിവ് ക്ലെയിം ചെയ്യുന്നതിന് 2020 സെപ്റ്റംബർ 30 വരെ നിക്ഷേപം നടത്താം. വിവാദ് സേ വിശ്വസിന്റെയും സമയപരിധി നീട്ടിയിട്ടുണ്ട്. പുതിയ അറിയിപ്പ് പ്രകാരം 2020 ഡിസംബർ 31 ആണ് അവസാന തീയതി.