പുതുക്കിയ റിട്ടേൺ; പുതിയ ഫോമുമായി സർക്കാർ

പുതുക്കിയ ആദായനികുതി റിട്ടേൺ ഫയൽ ചെയ്യുന്നതിനു പുതിയ ഫോം പുറത്തിറക്കി ആദായ നികുതി വകുപ്പ്. പുതുക്കിയ റിട്ടേണിനൊപ്പം അതിനുള്ള കാരണവും നികുതിദായകർ വ്യക്തമാക്കണം. 2019- 20, 2020- 21 സാമ്പത്തിക വർഷങ്ങളിലെ പുതുക്കിയ ആദായ നികുതി റിട്ടേണുകൾ ഫയൽ ചെയ്യുന്നതിനായാണ് ഫോം പുറത്തിറക്കിയത്. ഐ.ടി.ആർ- യു എന്ന ഫോമാണ് പുതുതായി ലഭ്യമാക്കിയിരിക്കുന്നത്. ഐ.ടി.ആർ- യു ഫയൽ ചെയ്യുന്ന നികുതിദായകർക്ക്, ബന്ധപ്പെട്ട മൂല്യനിർണയ വർഷത്തിന്റെ അവസാനം തൊട്ട് രണ്ട് വർഷത്തിനുള്ളിൽ ഫയൽ ചെയ്യാവുന്നതാണ്.

Also Read: വർധിക്കുന്ന ചൂട് വരുമാന മാർഗമാകാം; മാസം ലക്ഷങ്ങൾ സമ്പാദിക്കാം

മുമ്പ് ഫയൽ ചെയ്തിട്ടില്ലാത്ത വരുമാനം, കൂട്ടിച്ചേർക്കുന്നതോ- ഒഴിവാക്കുന്നതോ ആയ വരുമാനം, തെറ്റായ മൂല്യനിർണയം, തെറ്റായ വിഭാഗങ്ങളിലെ ഉൾപ്പെടുത്തലുകൾ പോലുള്ള സാഹചര്യങ്ങളിൽ റിട്ടേൺ പുതുക്കാൻ വ്യക്തമായ കാരണം വേണം. ആഗിരണം ചെയ്യപ്പെടാത്ത മൂല്യത്തകർച്ച, 115 ജെ.ബി/ 115 ജെ.സി. സെക്ഷനുകൾക്കു കീഴിലെ നികുതി ക്രെഡിറ്റ്, തെറ്റായ നികുതി നിരക്ക്, നികുതിദായകർ നൽകിയ മറ്റേതെങ്കിലും കാരണങ്ങൾ എന്നിവയും പുതുക്കിയ ഫോം ഫയൽ ചെയ്യാനുള്ള കാരണങ്ങളിൽ ഉൾപ്പെടുന്നു.

Also Read: ഇന്ത്യ ഒരു വർഷം കൊണ്ട് സമ്പാദിച്ചത് രണ്ടു മാസം കൊണ്ട് കാലി!

2022- 23 ബജറ്റിൽ നികുതിദായകർക്ക് അവരുടെ ആദായനികുതി റിട്ടേണുകൾ (ഐ.ടി.ആർ) ഫയൽ ചെയ്ത് രണ്ട് വർഷത്തിനുള്ളിൽ പുതുക്കാനുള്ള സംവിധാനം നടപ്പാക്കുമെന്നു ധനമന്ത്രി നിർമലാ സീതാരാമൻ വ്യക്തമാക്കിയിരുന്നു. അതേസമയം നികുതിദായകന് ഒരു അസസ്‌മെന്റ് വർഷത്തിൽ ഒരു പുതുക്കിയ റിട്ടേൺ മാത്രമേ ഫയൽ ചെയ്യാൻ അനുവദിക്കൂ. റിട്ടേണുകളിലെ പിഴവുകളും മറ്റും തിരുത്താൻ അവസരം നൽകുന്നത് കൂടുതൽ ആളുകളെ ആകർഷിക്കാൻ സഹായിക്കുമെന്നാണു വിലയിരുത്തൽ.

സാധാരണക്കാരനും എളുപ്പത്തിൽ ഉപയോഗിക്കാവുന്ന തരത്തിലാണ് ഫോം രൂപകൽപ്പന ചെയ്തിരിക്കുന്നതെന്നു വിദഗ്ധർ വ്യക്തമാക്കുന്നു. സാധാരണ ഐ.ടി.ആർ. ഫോമുകളിൽ നിന്ന് വ്യത്യസ്തമായി വരുമാനത്തിന്റെ തകർച്ചയോ വിശദ വിവരങ്ങളോ സമർപ്പിക്കേണ്ടതില്ല. പുതുക്കിയ റിട്ടേൺ ഫയൽ ചെയ്യുന്നതിനുള്ള കൃത്യമായ കാരണം ഫോമിൽ തന്നെ സമർപ്പിക്കണം എന്നു മാത്രം.