ആദായ നികുതി റിട്ടേൺ; ഫോം 16ന്റെ പ്രാധാന്യത്തെക്കുറിച്ച് അറിയാം

ആദായനികുതി റിട്ടേണുകൾ (ഐടിആർ) ഫയൽ ചെയ്യുമ്പോൾ നികുതിദായകർ ഉപയോഗിക്കേണ്ട അത്യാവശ്യ കാര്യങ്ങളിൽ ഒന്നാണ് ഫോം 16. ഇത് അടിസ്ഥാനപരമായി സ്രോതസ്സിൽ നിന്ന് കുറച്ച നികുതിയുടെ (ടിഡിഎസ്) സർട്ടിഫിക്കറ്റാണ്. ജീവനക്കാരുടെ പേരിൽ തൊഴിലുടമ നൽകുന്നതാണ് ഈ ഫോം. ഒരു വർഷത്തെ ആദായനികുതിയുമായി ബന്ധപ്പെട്ട എല്ലാ വിവരങ്ങളും ബാധകമായ ആദായനികുതി റിട്ടേൺ ഫോമിൽ പൂരിപ്പിച്ചിട്ടുണ്ടെന്നും, നൽകിയിരിക്കുന്ന വിവരങ്ങൾ ശരിയാണെന്നും ഉറപ്പാക്കാൻ വ്യക്തികൾ തൊഴിലുടമയിൽ നിന്ന് ലഭിക്കുന്ന അവരുടെ ഫോം 16 പരിശോധിക്കേണ്ടത് പ്രധാനമാണ്.

നികുതി കുറച്ച ആളും നികുതിദായകരും തമ്മിലുള്ള വിവിധ ഇടപാടുകളിൽ പ്രതിഫലിച്ച ടിഡിഎസിന്റെ വിശദാംശങ്ങൾ ഈ ഫോം നൽകുന്നു. 1961ലെ ആദായനികുതി നിയമത്തിന്റെ 203-ാം വകുപ്പിന് കീഴിലാണ് ഇത് ഇഷ്യൂ ചെയ്‌തിരിക്കുന്നത്. കൂടാതെ കുറച്ച നികുതി ജീവനക്കാരന്റെ പാൻ നമ്പറിൽ സർക്കാരിൽ നിക്ഷേപിക്കുന്നു.


ടിഡിഎസ് സർട്ടിഫിക്കറ്റിൽ നിന്ന് ജീവനക്കാരന് ലഭിച്ച ശമ്പളത്തുകയുടെ വിശദമായ സംഗ്രഹവും അതിൽ നിന്ന് കുറച്ച നികുതിയും ലഭിക്കും. ശമ്പളത്തിൽ നിന്ന് നികുതി വെട്ടിക്കുറച്ചിട്ടുണ്ടെങ്കിൽ തൊഴിലുടമകൾ ഒരു ജീവനക്കാരന് ടിഡിഎസ് സർട്ടിഫിക്കറ്റ് നിർബന്ധമായും നൽകണം.

ഫോം 16 ന് രണ്ട് ഭാഗങ്ങളാണുള്ളത്, പാർട്ട് എ, പാർട്ട് ബി. പാർട്ട് എ, തൊഴിലുടമയുടെയും ജീവനക്കാരന്റെയും വിശദാംശങ്ങൾ കൂടാതെ, സാമ്പത്തിക വർഷത്തിലെ ഓരോ പാദത്തിലും ശമ്പളത്തിൽ നിന്നുള്ള ടിഡിഎസ് വിശദാംശങ്ങളും അടങ്ങിയിരിക്കുന്നു. തൊഴിലുടമയുടെയും ജീവനക്കാരന്റെയും പേരും വിലാസവും കൂടാതെ ഒരു ജീവനക്കാരന് ശമ്പളമായി നൽകിയതോ ക്രെഡിറ്റ് ചെയ്തതോ ആയ തുകയുടെ വിശദാംശങ്ങൾ പാർട്ട്‌ ബിയിൽ അടങ്ങിയിരിക്കുന്നു.

ആദായ നികുതി വകുപ്പിന്റെ ഔദ്യോഗിക വെബ്സൈറ്റിൽ നിന്ന് ശമ്പളമുള്ള ജീവനക്കാർക്ക് ഫോം 16 ഡൗൺലോഡ് ചെയ്യാവുന്നതാണ്. ഇതിന്റെ നടപടിക്രമങ്ങൾ അറിയാം.

സ്റ്റെപ്പ് 1 : ആദായനികുതി വകുപ്പിന്റെ ഔദ്യോഗിക വെബ്സൈറ്റ് https://www.incometaxindia.gov.in സന്ദർശിക്കുക

സ്റ്റെപ്പ് 2 : ഹോം പേജിൽ നിന്നും 'forms/download' വിഭാഗം കണ്ടെത്താം. ആ വിഭാഗത്തിൽ, നിന്ന് 'income tax forms' ഓപ്ഷൻ കണ്ടെത്തി അതിൽ ക്ലിക്ക് ചെയ്യുക.

സ്റ്റെപ്പ് 3 : പേജിന്റെ അവസാനത്തിൽ 'frequently used forms' എന്നതിന് താഴെ ഫോം 16 കാണാം.

സ്റ്റെപ്പ് 4 : ഈ ഘട്ടത്തിൽ, 'ഫോം 16' എന്നതിന് കീഴിൽ, നിങ്ങൾക്ക് 'PDF', 'Fillable Form' ഓപ്ഷനുകൾ കാണാം. അതിൽ, വേണ്ട ഓപ്ഷനിൽ ക്ലിക്കുചെയ്യുക. ഫോം ഡൗൺലോഡ് ചെയ്യാൻ കഴിയുന്ന ഒരു പേജിലേക്ക് റീഡയറക്‌ട് ചെയ്യപ്പെടും.

Also Read : ആദായനികുതി റിട്ടേൺ; മെയ് മാസത്തിലെ ഈ 4 തീയതികൾ ഓർത്തിരിക്കാം
ഫോം 26 എഎസ്
ഒരു നികുതിദായകന്റെ വിവിധ വരുമാന സ്രോതസ്സുകളിൽ നിന്ന് ടിഡിഎസ് അല്ലെങ്കിൽ ടിസിഎസ് ആയി കുറച്ച തുകയുടെ വിശദാംശങ്ങൾ 26 എഎസ് ഫോം നൽകുന്നു. മുൻകൂർ നികുതിയും സ്വയം വിലയിരുത്തിയ നികുതി വിശദാംശങ്ങളും നികുതിദായകൻ നടത്തുന്ന ഉയർന്ന മൂല്യമുള്ള ഇടപാടുകളും ഇത് പ്രതിഫലിപ്പിക്കുന്നു.

Read Latest Business News and Malayalam News