പ്രവാസികൾ ഇന്ത്യയിൽനിന്ന് ലഭിക്കുന്ന ഏതൊക്കെ വരുമാനത്തിന് ആദായ നികുതി നൽകണം?

പ്രവാസികൾ അഥവാ എൻആർഐ പദവി ഉള്ളയാളുകൾ ഇന്ത്യയിൽനിന്ന് ലഭിക്കുന്ന വരുമാനത്തിന് ആദായനികുതി നൽകണം. നാട്ടിൽനിന്നുള്ള വരുമാനം രണ്ട് ലക്ഷം രൂപയിൽ കൂടുതലാണെങ്കിൽ ആദായനികുതി റിട്ടേൺ (ഐടിആർ) സമർപ്പിക്കേണ്ടതുണ്ട്. ആദായനികുതി 10,000 രൂപ കവിയുകയാണെങ്കിൽ മുൻ‌കൂർ നികുതിയും അടയ്ക്കണം. വർക്ക് ഫ്രം ഹോം, വാടക, പെൻഷൻ, നിക്ഷേപങ്ങൾ, കച്ചവടം, മൂലധന നിക്ഷേപം എന്നിവയിൽ നിന്നുള്ള വരുമാനങ്ങൾക്കെല്ലാം നികുതി ഈടാക്കുന്നതായിരിക്കും.

വിദേശത്തുനിന്ന് ലഭിച്ച ശമ്പളം ഇന്ത്യയിലെ ബാങ്ക് അക്കൗണ്ടിലേക്ക് നേരിട്ട് എത്തുകയാണെങ്കിൽ അത് ഇന്ത്യയിലെ വരുമാനമായി കണക്കാക്കും. അതുപോലെ വിദേശ കമ്പനികൾക്ക് വേണ്ടി ഇന്ത്യയിലെ വീട്ടിലിരുന്ന് ജോലി ചെയ്താൽ ആ സേവനത്തിനും നികുതി അടയ്ക്കണം. അതായത് പ്രവാസികൾ ഇന്ത്യയിലിരുന്ന് വർക്ക് ഫ്രം ഹോം ആയി ചെയ്ത ജോലിക്ക് ലഭിക്കുന്ന വേതനം എവിടെനിന്ന് ലഭിച്ചാലും അത് ഇന്ത്യയിൽനിന്നുള്ള വരുമാനമായി കണക്കാക്കും.

Also Read: ലാൻഡ് ‌ലൈനിൽനിന്ന് മൊബൈലിലേക്ക് വിളിക്കാൻ ഇനിമുതൽ ഈ നമ്പർ ചേർക്കണം

രാജ്യത്ത് നിങ്ങൾക്കുള്ള വസ്തുവകകളിൽനിന്ന് ലഭിക്കുന്ന വാടക വരുമാനത്തിനും ആദായനികുതി നൽകണം. വാടകയായി ലഭിക്കുന്ന തുകയിൽ നിന്നും 30 ശതമാനം കിഴിച്ചുള്ള വരുമാനത്തിനാണ് നികുതി നൽകേണ്ടത്. ഇതിൽനിന്ന് കെട്ടിടനികുതി, ഹൗസിങ് ലോൺ പലിശ, വായ്പ തിരിച്ചടവ് തുടങ്ങിയ കുറയ്ക്കാം. എന്നിട്ട് ബാക്കി വരുന്ന തുകയുടെ 30 ശതമാനമാണ് വരുമാന നികുതിയായി അടയ്ക്കേണ്ടത്.

നാട്ടിൽനിന്ന് പെൻഷൻ ലഭിക്കുന്നവർ അതിന് ആനുപാതികമായി നികുതി നൽകണം. വിദേശത്തെ വരുമാനവും എൻആർഇ, എഫ്‌സിഎൻആർ നിക്ഷേപങ്ങളിലെ പലിശ എന്നിവ പൂർണ്ണമായും നികുതിയിൽനിന്ന് ഒഴിവാക്കിയിട്ടുണ്ട്. എന്നാൽ മറ്റ് നിക്ഷേപങ്ങളിലെ പലിശയ്ക്ക് നികുതി നൽകേണ്ടതുണ്ട്. എൻആർഒ അക്കൗണ്ടിൽനിന്ന് ലഭിക്കുന്ന പലിശ നികുതിവിധേയമാണ്. കച്ചവടം, മൂലധന നിക്ഷേപം എന്നിവയിൽനിന്നുള്ള വരുമാനത്തിനും നികുതി അടയ്ക്കേണ്ടതുണ്ട്.