സ്വയം തൊഴിൽ സംരംഭകർ ആദായ നികുതി റിട്ടേൺ സമർപ്പിക്കണമോ? അറിയാം ഇക്കാര്യങ്ങൾ

കൊച്ചി: വീട്ടിലിരുന്നും അല്ലാതെയും സ്വയം തൊഴിൽ ചെയ്യുന്ന സംരംഭകർ ആദായ നികുതി റിട്ടേൺ (ഐടിആർ) സമർപ്പിക്കേണ്ടതുണ്ട്. രണ്ടര ലക്ഷം രൂപയ്ക്ക് മുകളിൽ മൊത്ത വാർഷിക വരുമാനം ഉള്ളവരാണ് ആദായനികുതി റിട്ടേൺ സമർപ്പിക്കേണ്ടത്. ബിസിനസിൽനിന്നുള്ള ലാഭം കണക്കാക്കി ആ ലാഭം ബിസിനസ് വരുമാനമായി കാണിച്ചുകൊണ്ട് നികുതി റിട്ടേൺ ഫയൽ ചെയ്യാം. ഇതിന് ദിവസേനയുള്ള വരവ് ചെലവ് കണക്കുകൾ കൃത്യമായി സൂക്ഷിക്കേണ്ടതുണ്ട്.

ബില്ലുകൾ, രസീതുകൾ, വൗച്ചറുകൾ, മറ്റു രേഖകൾ എന്നിവ ഉൾപ്പെടുന്നതാണ് വരവ് ചെലവ് കണക്കിനായി സൂക്ഷിക്കേണ്ടത്. ബിസിനസിൽനിന്നുള്ള ലാഭം വിറ്റുവരവിന്റെ എട്ട് ശതമാനത്തിൽ താഴെയാണെങ്കിൽ കണക്കുകൾ ചാർട്ടേഡ് അക്കൗണ്ടന്റ് ഓഡിറ്റ് ചെയ്യണം. വിറ്റുവരവ് ഒരു കോടി രൂപയ്ക്ക് മുകളിൽ വരുന്നുണ്ടെങ്കിൽ കണക്കുകൾ ചാർട്ടേഡ് അക്കൗണ്ടന്റിനെ കൊണ്ട് ഓഡിറ്റ് ചെയ്യിച്ച് ആ ഓഡിറ്റ് റിപ്പോർട്ട് റിട്ടേണിന് പുറമേ ഫയൽ ചെയ്യേണ്ടതുണ്ട്.

ആദായനികുതി നിയമത്തിലെ വകുപ്പ് 44AD പ്രകാരം ബിസിനസിൽ നിന്നുള്ള ലാഭം ഏകദേശം എത്രയെന്ന് അനുമാനിച്ചും ആദായനികുതി റിട്ടേൺ ഫയൽ ചെയ്യാം. അതായത് ലാഭം സംബന്ധിച്ച് വിശദമായ കണക്കുകൾ സൂക്ഷിക്കേണ്ട ആവശ്യമില്ല. റിട്ടേൺ സമർപ്പിക്കേണ്ട അവസാന തീയതിക്ക് മുമ്പ് വരെ ബാങ്കിൽ വരുന്ന ഒരു വർഷത്തെ വിറ്റുവരവിന്റെ മിനിമം ആറ് ശതമാനമെങ്കിലും ലാഭമായി കണക്കാക്കിയാണ് റിട്ടേൺ സമർപ്പിക്കേണ്ടത്.

Also Read: യെസ് ബാങ്കിന് പിന്നാലെ ലക്ഷ്മി വിലാസ് ബാങ്ക്; നിക്ഷേപകർ ശ്രദ്ധിക്കേണ്ട കാര്യങ്ങൾ

ഇനി വർഷങ്ങളായി റിട്ടേൺ കൃത്യസമയത്ത് സമർപ്പിക്കുകയും എന്നാൽ കുറച്ച് കാലമായി വരുമാനമില്ലാതെ ഇരിക്കുകയും ചെയ്യുന്ന സ്വയം തൊഴിൽ സംരംഭകർ ആദായനികുതി റിട്ടേൺ സമർപ്പിക്കേണതുണ്ടോ എന്ന് പരിശോധിക്കാം. ബിസിനസിൽനിന്നുള്ള ഒരു വർഷത്തെ വിറ്റുവരവ് രണ്ടര ലക്ഷം രൂപയിൽ കൂടുതൽ ആണെങ്കിൽ റിട്ടേൺ സമർപ്പിക്കണം. ബിസിനസിൽ നഷ്ടമുണ്ടെങ്കിലും റിട്ടേൺ നിർബന്ധമായും സമർപ്പിക്കണം. കാരണം റിട്ടേൺ സമർപ്പിച്ചാൽ മാത്രമേ ഈ നഷ്ടം വരും വർഷങ്ങളിൽ ക്യാരി ഫോർവേഡ് ചെയ്യാനാകൂ. ഇങ്ങനെ ക്യാരി ഫോർവേഡ് ചെയ്യുന്ന നഷ്ടം വരും വർഷങ്ങളിൽ ലാഭമുണ്ടെങ്കിൽ ആ ലാഭവുമായി തട്ടി കിഴിക്കാവുന്നതാണ്.

ഇങ്ങനെ തട്ടിക്കിഴിച്ച ശേഷമുള്ള ലാഭത്തിൻമേലെ വരുംവർഷങ്ങളിൽ നികുതി ബാധ്യത വരുകയുള്ളൂ. ഒരു വർഷത്തെ നഷ്ടം ആ വർഷം കഴിഞ്ഞുള്ള എട്ട് വർഷങ്ങളിലേക്ക് വരെ ക്യാരി ഫോർവേഡ് ചെയ്യാം. ആ കാലയളവിൽ ഒരിക്കലും നഷ്ടം തട്ടിക്കിഴിക്കാനുള്ള ലാഭം ബിസിനസിൽനിന്ന് ഇല്ലെങ്കിൽ ഒൻപതാമത്തെ വർഷത്തിലേക്ക് ക്യാരി ഫോർവേഡ് സാധ്യമല്ല. റിട്ടേൺ കൃത്യസമയത്ത് സമർപ്പിച്ചില്ലെങ്കിൽ ആ വർഷത്തെ നഷ്ടം ക്യാരി ഫോർവേഡ് ചെയ്യാനുള്ള സൗകര്യം നഷ്‌ടപ്പെടും. 60 വയസ് വരെയുള്ള മുതിർന്ന പൗരൻമാർക്ക് മൂന്ന് ലക്ഷം രൂപയും 80 വയസെത്തിയവർക്ക് അഞ്ച് ലക്ഷം രൂപയുമാണ് ആദായനികുതി റിട്ടേൺ സമർപ്പിക്കേണ്ട വരുമാന പരിധി.