കേന്ദ്രബജറ്റിൽ സാധാരണക്കാർ പ്രതീക്ഷിക്കുന്ന ചില നികുതി ഇളവുകൾ

കേന്ദ്രബജറ്റ് അവതരിപ്പിക്കാൻ ഇനി ഏതാനും ദിവസങ്ങൾ മാത്രമാണ് ബാക്കിയുള്ളത്. കോവിഡ് സൃഷ്ടിച്ച പ്രതിസന്ധി മൂലം കഴിഞ്ഞ ഏതാനും വർഷങ്ങൾ സാധാരണക്കാർക്ക് വെല്ലുവിളി നിറഞ്ഞതായിരുന്നു. തൊഴിൽ നഷ്ടവും, വരുമാനത്തിലുണ്ടായ കുറവും പലരുടെയും കുടുംബ ബജറ്റിനെ താളം തെറ്റിച്ചു. പണപ്പെരുപ്പം സാധാരണക്കാരുടെയും, ശമ്പളവരുമാനക്കാരുടെയും ജീവിത്തെ പ്രതികൂലമായി ബാധിച്ചു. കോവിഡിനു ശേഷം വരുമാനം വർധിക്കാത്ത സാഹചര്യവും നിലവിലുണ്ട്. ജീവിതച്ചിലവ് വർധിച്ച സാഹചര്യത്തിൽ സാമ്പത്തിക ലക്ഷ്യങ്ങൾക്കായി നീക്കിയിരിപ്പ് നടത്താൻ പലർക്കും സാധിക്കുന്നില്ല. സാധാരണക്കാരെ പൊതുവെ ബാധിക്കുന്ന നികുതി നിരക്കുകളിൽ മാറ്റം വരുത്തിയാൽ സമൂഹത്തിലെ വലിയൊരു വിഭാഗത്തിന് ആശ്വാസം ലഭിക്കുമെന്നാണ് വിലയിരുത്തപ്പെടുന്നത്.

നികുതി നിരക്കുകളിൽ സർക്കാർ ഇളവു നൽകുമെന്നാണ് ഇപ്പോഴത്തെ പ്രതീക്ഷ. ഡിഡക്ഷൻസ്, ക്രെ‍ഡിറ്റ്സ് എന്നിവ വർധിപ്പിക്കണണെന്നതാണ് പ്രധാന ആവശ്യം. നിലവിലെ ആദായ നികുതിയുടെ ബേസിക് എക്സംപ്ഷൻ പരിധി, നോൺ സീനിയർ സിറ്റിസൺസിന് 2.50 ലക്ഷം രൂപയാണ്. നികുതിയുടെ പരിധി വർധിപ്പിച്ചു നൽകുന്നത് താഴ്ന്ന വരുമാനക്കാർക്കും, മധ്യവർഗ കുടുംബങ്ങൾക്കും ആശ്വാസം പകരുമെന്നാണ് വിലയിരുത്തൽ. കഴിഞ്ഞ ഏതാനും വർഷങ്ങലായി രാജ്യത്തെ പണപ്പെരുപ്പ നിരക്ക് കുതിച്ചുയരുകയാണ്. ഇത് ജനങ്ങളുടെ വാങ്ങൽ ശേഷിയിൽ കുറവ് വരുത്തി. ഇക്കാരണത്താൽ തന്നെ ബേസിക് എക്സംപ്ഷൻ ലിമിറ്റ് 5 ലക്ഷം രൂപയിലേക്ക് ഉയർത്തുന്നത് വിപണിയിൽ ഡിമാൻഡ് വർധിക്കാൻ കാരണമാകും. പണപ്പെരുപ്പത്തിന്റെ ആഘാതത്തിൽ കുറവ് വരുത്താനും ഇത് കാരണമാകുന്നു.

Also Read : കേന്ദ്രബജറ്റ്; ചില പൊതുവിവരങ്ങൾ അറിയാം
ശമ്പളവരുമാനക്കാർക്ക് 2018-19 കേന്ദ്രബജറ്റിൽ 40,000 രൂപയുടെ സ്റ്റാൻഡേർഡ് ഡിഡക്ഷൻ അനുവദിച്ചിരുന്നു. 2019 ലെ ഇടക്കാല ബജറ്റിൽ ഈ പരിധി 50,000 രൂപയായി ഉയർത്തി നൽകി. എന്നാൽ ശമ്പളവരുമാനക്കാരും നിലവിൽ പണപ്പെരുപ്പത്തിന്റെ തീവ്രത നേരിടുന്നു. ഇക്കാരണത്താൽ സ്റ്റാൻഡേർഡ് ഡിഡക്ഷനിൽ 25,000 രൂപയെങ്കിലും ഉയർത്തി നൽകാൻ കേന്ദ്രസർക്കാർ തയ്യാറാവുമെന്നാണ് ഈ വിഭാഗത്തിന്റെ പ്രതീക്ഷ.

ടാക്സ് സേവിങ് നിക്ഷേപങ്ങളെ സെക്ഷൻ 80 സി പ്രോത്സാഹിപ്പിക്കുന്നു. ഇതിന്റെ പരിധി 2014-15 കാലയളവിലാണ് 1 ലക്ഷത്തിൽ നിന്ന് 1.5 ലക്ഷത്തിലേക്ക് ഉയർത്തി നൽകിയത്. എന്നാൽ നിലവിലെ സാഹചര്യങ്ങളി‍ൽ ഈ പരിധി അപര്യാപ്തമാണെന്ന് വാദമുണ്ട്. വർഷങ്ങൾക്കു ശേഷം ഈ പരിധി 2 ലക്ഷം രൂപയെങ്കിലുമായി വർധിപ്പിക്കണമെന്ന ആവശ്യം സർക്കാരിന്റെ മുന്നിലുണ്ട്.

Read Latest Business News and Malayalam News