ഹെലികോപ്റ്ററിന് പകരം ഉള്ളി നല്‍കി ആമസോണ്‍!

ഓര്‍ഡര്‍ ചെയ്ത സാധനം മാറി നല്‍കുന്നത് ഓണ്‍ലൈന്‍ ഷോപ്പിംഗില്‍ പുതിയ കാര്യമല്ല. ഇക്കുറി തികച്ചും വ്യത്യസ്തമായ തമാശയാണ് ആമസോണ്‍ ഒപ്പിച്ചിരിക്കുന്നത്.

മകന്റെ പിറന്നാളിന് സമ്മാനമായി റിമോട്ട് കണ്‍ട്രോള്‍ ഹെലികോപ്റ്റര്‍ ഓര്‍ഡര്‍ ചെയ്‌ത അച്ഛനാണ് ഇക്കുറി പണി കിട്ടിയത്. നീര്‍മാര്‍ഗയിലെ മുഹമ്മദ് ഷാഫി മകന്‍റെ അഞ്ചാം പിറന്നാളിന് നല്‍കാനായി 1,200 രൂപ വില വരുന്ന റിമോര്‍ട്ട് കണ്‍ട്രോള്‍ ഹെലികോപ്റ്റായിരുന്നു ആമസോണില്‍ ഓര്‍ഡര്‍ ചെയ്‌തത്‌. പകരം, പാഴ്സലായി വന്നതോ, ഉള്ളി!

സംഭവത്തെ തുടര്‍ന്ന് ഷാഫി ആമസോണ്‍ അധികൃതര്‍ക്ക് പരാതി നല്‍കി. മുഴുവന്‍ തുകയും റീഫണ്ട് ചെയ്തു നല്‍കാം എന്ന് അധികൃതര്‍ അറിയിച്ചതായി ഷാഫി പറയുന്നു.

ആമസോണില്‍ മാത്രമല്ല, മിക്ക ഓണ്‍ലൈന്‍ ഷോപ്പിംഗ് പ്ലാറ്റ്ഫോമുകളിലും സമാന രീതിയിലുള്ള സംഭവങ്ങള്‍ മുന്‍പും ഉണ്ടായിട്ടുണ്ട്. നിരവധി ആളുകള്‍ ഇതേപോലെയുള്ള പരാതികളുമായി മുന്നോട്ടു വരുന്നുണ്ട്. ഐഫോണിന് പകരം സോപ്പുകട്ടയും കല്ലുമെല്ലാം മുന്‍പേ ഇങ്ങനെ പാഴ്സലായി വന്ന ചരിത്രമുണ്ട്. ഓണ്‍ലൈന്‍ ഷോപ്പിംഗ് കമ്പനികള്‍
ഓര്‍ഡറുകള്‍ പാക്ക് ചെയ്യുമ്പോള്‍ കൂടുതല്‍ ശ്രദ്ധ പുലര്‍ത്തേണ്ട കാലം അതിക്രമിച്ചു കഴിഞ്ഞിരിക്കുന്നു