ഇന്ന്..
ശ്രീനാധ് പോട്ലപ്പള്ളി റാവു എന്നാണ് ആ സംരംഭകന്റെ പേര്. ബിസിനസ്സിന്റെ പേര് ഫാം സ്റ്റേ. ഫാം ആശയത്തിലൂന്നിയുള്ള ഒരു റിസോർട്ടാണത്. ഹൈദരാബാദ് നഗരത്തിനടുത്താണ് ലൊക്കേഷൻ. ഇത് കൂടാതെ റിയൽ എസ്റ്റേറ്റ്, നിർമാണം, ഇന്റീരിയർ, ഹോസ്പിറ്റാലിറ്റി മുതലായ നിരവധി മേഖലകളിൽ ഇദ്ദേഹം മുതൽ മുടക്കിയിട്ടുണ്ട്. എലഗന്റ് ഗ്രൂപ്പ് ഓഫ് കമ്പനീസ് എന്ന ബാനറിനു കീഴിലാണ് ഈ ബിസിനസ് സംരംഭങ്ങളെല്ലാം. ഈ ബിസിനസുകളുടെ ഏകദേശ വിറ്റുവരവ് 100 കോടി രൂപയാണ്.
സംരംഭകന്റെ പശ്ചാത്തലം
ഹൈദരാബാദിലെ നിസാം കോളേജിൽ നിന്ന് ബിഎ പാസായതിനു ശേഷം, 1993-94 ൽ ഒരു ഫാർമസ്യൂട്ടിക്കൽ മൾട്ടി നാഷണൽ കമ്പനിയിൽ മെഡിക്കൽ റപ് ആയി ശ്രീനാഥ് ജോലിയിൽ പ്രവേശിച്ചു. 1200 രൂപയായിരുന്നു തുടക്കത്തിലെ ശമ്പളം. എന്നാൽ ജോലിയിൽ മികച്ച പ്രകടനം കാഴ്ച വെച്ചതോടെ വിദേശരാജ്യങ്ങളിൽ ജോലി ചെയ്യാനുള്ള നിരവധി അവസരങ്ങൾ കമ്പനി നൽകി. ആദ്യം റഷ്യയിലേക്കും, തുടർന്ന് യുഎസിലേക്കും അദ്ദേഹത്തിന് പ്രൊമോഷൻ ലഭിച്ചു.
ബിസിനസിലേക്ക്..
തന്റെ മുതിർന്ന സഹോദരനുമൊന്നിച്ച് യുഎസിൽ ഒരു ഐടി കൺസൾട്ടൻസി ഫേം അദ്ദേഹം സ്ഥാപിക്കുകയാണ്. സംരംഭക മോഹങ്ങൾക്ക് തുടക്കമിട്ടെങ്കിലും, തന്റെ അമ്മയുടെ അസുഖത്തെ തുടർന്ന് എല്ലാം ഉപേക്ഷിച്ച് അദ്ദേഹത്തിന് ഇന്ത്യയിലേക്ക് മടങ്ങേണ്ടി വന്നു. തിരികെയെത്തിയ ആദ്യ വർഷങ്ങളിൽ നിരവധി ബിസിനസുകളാണ് ശ്രീനാഥ് ചെയ്തത്.
ഇപ്പോഴത്തെ ഫാം റിസോർട്ടിന്റെ സ്ഥലം 2000 ലാണ് വാങ്ങിയത്. 2010 ലാണ് റിസോർട്ടായി മാറ്റിയെടുക്കുന്നത്. ഓർഗാനിക് ഫാമിങ്, ഫൺ ആക്ടിവിറ്റികൾ തുടങ്ങി നിരവധി അനുഭവങ്ങളാണ് സന്ദർശകരെ ഇവിടെ കാത്തിരിക്കുന്നത്.
എന്തൊക്കെ തടസ്സങ്ങളുണ്ടായാലും ബിസിനസിൽ നിന്ന് ബിസിനസിലേക്ക് നടന്നു കയറാനുള്ള മനസ്സാണ് ഇവിടെ ശ്രീനാഥിനെ വിജയിയാക്കുന്നത്. 1200 രൂപ മാസ ശമ്പളം ലഭിച്ചപ്പോഴും, പടുത്തുയർത്താൻ ശ്രമിച്ച ബിസിനസ് പാതി വഴിയിൽ ഉപേക്ഷിച്ചപ്പോഴും പിന്തിരിയാൻ തയ്യാറാവാത്തതാണ് ആ വിജയത്തിനു പിന്നിലെ വലിയ രഹസ്യം.
ഫാം സ്റ്റേ
ഒരു ഫാം സ്റ്റേ അവിടെ എല്ലാവിധ ആധുനിക സൗകര്യങ്ങളും ഒരുക്കിയിരിക്കുന്നു. വാരാന്ത്യങ്ങൾ ചിലവഴിക്കാൻ പറ്റിയ ശാന്ത സുന്ദരമായ പ്രകൃതി സൗഹാർദപരമായ ഒരു സ്ഥലമാണത്. ആധുനിക ഫാം സ്റ്റേ ബിസിനസിനെ അതിന്റെ എല്ലാവിധ സൗന്ദര്യങ്ങളോടും കൂടി ഒരുക്കാനാണ് ഇവിടെ ശ്രമിച്ചിരിക്കുന്നത്. ആയിരക്കണക്കിനു മരങ്ങളാണ് ഇവിടെ തലയുയർത്തി, തണൽ വിരിച്ച് നിലകൊള്ളുന്നത്.
ഇക്കോ ടൂറിസത്തിന്റെ സാധ്യതകൾ വളരെ നേരത്തെ തിരിച്ചറിഞ്ഞതാണ് ഇത്തരമൊരു സംരംഭം തുടങ്ങാൻ ശ്രീനാഥിനെ പ്രേരിപ്പിച്ചത്. ഇത് അദ്ദേഹത്തിന്റെ പാഷന്റേയും, നിശ്ചയദാർഢ്യത്തിന്റേയും, ദീർഘവീക്ഷണത്തിന്റേയും, കഠിനാധ്വാനത്തിന്റേയും പ്രതീകമാണ്. 20 ഏക്കറുകളിലായി അത് വ്യാപിച്ചു കിടക്കുന്നു.