വനിതാ സംരഭകരേ ഇതിലേ... ബിസിനസ് തന്ത്രങ്ങളും ഫണ്ടിംഗിനുള്ള വഴിയും ഗൂഗിള്‍ പറഞ്ഞ് തരും

സമൂഹത്തിന്റെ സാമ്പത്തിക രംഗത്തും സ്തീകൾക്ക് വലിയ സംഭാവനകൾ ചെയ്യാനാകും. നവ സമൂഹത്തെ കെട്ടിപ്പടുക്കാനും രൂപകല്പന ചെയ്യാനും ആഗ്രഹമുള്ള ഒരുപാട് സ്ത്രീകളുണ്ട്. എന്നാൽ അവർക്ക് ഒരു സംരംഭം തുടങ്ങാൻ പോലുമുള്ള മൂലധനമില്ലാത്തതിനാൽ ഇത് സാധിക്കാതെ വരുന്നുവെന്നും ആദിത്യ സ്വാമി പറഞ്ഞു. ഇന്ത്യയിലെ സ്റ്റാർട്ടപ്പുകൾക്കായി സമാഹരിച്ച ശതകോടിക്കണക്കിന് ഡോളറിൽ 6% ഫണ്ടിംഗ് മാത്രമാണ് സ്ത്രീകൾ നയിക്കുന്ന സ്റ്റാർട്ടപ്പുകൾക്ക് ലഭിച്ചതെന്ന് സ്വാമി ചൂണ്ടിക്കാട്ടി‌. പൂർണമായും സ്ത്രീകൾ നേതൃത്വം നൽകുന്ന സ്റ്റാർട്ടപ്പുകൾ ഫണ്ടിംഗിന്റെ 1.5% മാത്രമാണ്.

സമൂഹത്തിൽ സ്ത്രീകൾ നയിക്കുന്ന കമ്പനികൾ കൂടുന്തോറും സമൂഹത്തിൽ സ്ത്രീകൾ അനുഭവിക്കുന്ന പ്രശ്നങ്ങളും കുറഞ്ഞ് വരും. അത് നമ്മുടെ സമൂഹത്തിന് ഒരുപാട് ഗുണം ചെയ്യും. സ്ത്രീകൾക്ക് ഇത്തരത്തിൽ ഊന്നൽ നൽകുന്ന പദ്ധതികൾ ആലോചിക്കാൻ കുറച്ച് കാരണങ്ങളുണ്ട്. 48% സ്ത്രീകളും ഗൈഡ് ചെയ്യാൻ തങ്ങൾക്ക് ഒരാളില്ലാത്തതിലാനാലാണ് സംരംഭക രംഗത്തേക്ക് ഇറങ്ങാത്തതെന്ന് കണക്കുകൾ പറയുന്നു. എന്നാൽ ഗൂഗിൾ പ്രോഗ്രാമുകളുടെ നട്ടെല്ലാണ് മെന്റർഷിപ്പ്. ശക്തമായ ഉപദേശക അടിത്തറ കെട്ടിപ്പടുക്കാനും സ്ത്രീകൾ നയിക്കുന്ന സ്റ്റാർട്ടപ്പുകളുടെ ആവശ്യങ്ങൾ പരിഹരിക്കാനും തങ്ങൾക്ക് കഴിയുമെന്നും ഗൂഗിളിന്റെ പ്രൊജക്ട് മാനേജർ കൂടിയായ പോൾ രവീന്ദ്രനാഥ് ജി പറഞ്ഞു.

ഈ സ്റ്റാർട്ടപ്പുകൾക്കുള്ള ഫണ്ടിംഗ് പ്രശ്നം പരിഹരിക്കുന്നതിലും ഗൂഗിളിന്റെ പദ്ധതി ശ്രദ്ധയൂന്നും. വനിതാ സ്ഥാപകർക്കുള്ള പരമാവധി ഫണ്ട് സ്വരൂപിക്കാൻ എന്തുചെയ്യാനാകുമെന്ന് ആലോചിക്കുകയാണെന്ന് രവീന്ദ്രനാഥ് ജി പറഞ്ഞു. മറ്റ് രാജ്യങ്ങളിൽ നിന്നുമുള്ള സ്ത്രീകൾ നയിക്കുന്ന സ്റ്റാർട്ടപ്പുകളുടെ ശൃംഖലയിലേക്ക് നമ്മുടെ രാജ്യത്തെ സംരംഭകരെ പരിചയപ്പെടുത്തും. സ്റ്റാർട്ടപ്പുകൾ അഭിമുഖീകരിക്കുന്ന പ്രശ്‌നങ്ങളെക്കുറിച്ചുള്ള വിശകലനത്തോടെയാണ് പ്രോഗ്രാം ആരംഭിക്കുന്നത്. പിന്നീട് ഒരു മെന്റർ മാർച്ചിംഗ് പ്രൊസസ് നടക്കും. അതിനുശേഷം മെന്ററും ഗൂഗിൾ ടീമും വനിതാ സംരഭകരും ചേർന്ന് സ്റ്റാർട്ടപ്പ് നേരിടുന്ന വെല്ലുവിളികളെച്ചുള്ള കാര്യങ്ങളിൽ ശ്രദ്ധ കേന്ദ്രീകരിക്കും. പിന്നീട് അതത് സംരംഭങ്ങൾക്കും സംരംഭകർക്കും അനുയോജ്യമായ ടെക് ടീമുകളെ കണ്ടെത്തി നൽകും. പ്രോഗ്രാമിലൂടെ ടെക് ആർക്കിടെക്‌ചർ അവലോകനങ്ങൾ, ഡിസൈൻ, യുഎക്‌സുമായി ബന്ധപ്പെട്ട സഹായം എന്നിവയും ഉൾപ്പെടുന്നു.