അനുഭവത്തിന്റെ കരുത്തിൽ രൂപം കൊണ്ട കോസ്മെറ്റിക്സ് ബിസിനസ്; 29 കോടിയുടെ വിറ്റുവരവ്

അനുഭവത്തിന്റെ ചൂളയിൽ നിന്ന് രൂപം കൊള്ളുന്ന ബിസിനസുകൾക്ക് ഒരു പ്രത്യേകതയുണ്ട്. അവ വിജയിക്കാൻ സാധ്യത കൂടുതലാണ് എന്നതാണത്. അത്തരത്തിൽ ഒരു ബിസിനസാണ് കോയമ്പത്തൂർ സ്വദേശിനിയായ ക്രുതിക കുമാരൻ ആരംഭിച്ചത്. 8,000 രൂപ മുതൽ 10,000 രൂപ വരെ മുടക്കി, ചെറിയ നിക്ഷേപത്തിലൂടെയാണ് ബിസിനസ് ആരംഭിക്കുന്നത്.

തന്റെ മകളുടെ ചർമ്മ സംബന്ധമായ പ്രശ്നങ്ങളാൽ കൃതിക ബുദ്ധിമുട്ടിയിരുന്നു. അസുഖത്തിന് ഒരു പരിഹാരം കണ്ടെത്താൻ അവർ കിണഞ്ഞു പരിശ്രമിച്ചു. ഒടുവിൽ പ്രകൃതിദത്തമായതും, ഈടു നിൽക്കുന്നതുമായ പേഴ്സണൽ കെയർ പ്രൊഡക്ടുകൾ വിവാഹ് എന്ന ബ്രാൻഡ് നെയിമിനു കീഴിൽ ആരംഭിച്ചു.

Also Read : ജോലി നൽകുന്ന സൂപ്പർ ബിസിനസ്; 102 കോടി വിറ്റുവരവ് നേടുന്ന പെൺകുട്ടി
ഉപഭോക്താക്കളുടെ ആവശ്യത്തിന് അനുസരിച്ച്, വൈവിധ്യമാർന്ന ഉല്പന്നനിരയാണ് വിവാഹ് ഒരുക്കിയിരിക്കുന്നത്. സ്കിൻ കെയർ, ഹെയർ കെയർ ഉല്പന്നങ്ങളുടെ 70 ഓളം ഉല്പന്നങ്ങളാണ് കമ്പനി പുറത്തിറക്കുന്നത്. വെബ്സൈറ്റ് വഴിയാണ് കമ്പനിയുടെ ബിസിനസ് പ്രധാനമായും നടക്കുന്നത്. കൂടാതെ വിവിധ ഇ-കൊമേഴ്സ് പ്ലാറ്റ്ഫോമുകളിലൂടെയും കച്ചവടം നടക്കുന്നു. ചെന്നൈ, കോയമ്പത്തൂർ എന്നിവിടങ്ങളിൽ രണ്ട് ഫിസിക്കൽ സ്റ്റോറുകളും കമ്പനിക്കുണ്ട്.

തമിഴ്നാട്ടിലെ ഗോബിചെട്ടിപാളയം എന്ന ചെറിയ ടൗണിലാണ് ക്രുതിക ജനിക്കുന്നത്. പഠനാവശ്യങ്ങൾക്കായി പിന്നീട് കോയമ്പത്തൂരിലെത്തി. വിവാഹത്തിന് ശേഷം മകൾക്ക് 2 വയസ്സായപ്പോഴാണ് ചർമ്മ സംബന്ധമായ പ്രശ്നങ്ങളുണ്ടാവുന്നത്.

തുടർന്ന് വിപണിയിൽ ലഭ്യമായ നിരവധി ഓർഗാനിക് സോപ്പുകൾ, ഷാമ്പൂ എന്നിവ ഉപയോഗിച്ചു നോക്കി. ഇതൊന്നും ഫലം കാണാതെ വന്നപ്പോൾ, പ്രകൃതിദത്ത ചേരുവകൾ ഉപയോഗിച്ച് സ്വയം നിർമ്മിച്ച സോപ്പ് പരീക്ഷിക്കാൻ തീരുമാനിച്ചു.തുടക്കത്തിൽ യൂട്യൂബിലെ വീഡിയോകൾ കണ്ടായിരുന്നു നിർമ്മാണം. പിന്നീട് അറിവ് വർധിപ്പിക്കുന്നതിനായി രണ്ട് മാസം നീണ്ടു നിൽക്കുന്ന ഡിപ്ലോമ കോഴ്സിൽ ചേർന്നു.

ആട്ടിൻപാൽ, ഒലീവ് ഓയിൽ, കാസ്റ്റർ ഓയിൽ തുടങ്ങിയവ ഉപയോഗിച്ച്, 2017 ലാണ് കൃതിക സോപ്പ് നിർമ്മാണം ആരംഭിക്കുന്നത്. ഇവയ്ക്ക് സ്വീകാര്യത ലഭിച്ചതിനെ തുടർന്ന്, ആട്ടിൻപാൽ സോപ്പ്, കൽക്കരി സോപ്പ്, റോസ് സോപ്പ് തുടങ്ങിയ പുതിയ ഉല്പന്നങ്ങൾ നിർമ്മിക്കാൻ ആരംഭിച്ചു. ഇവയുടെയെല്ലാം പ്രധാന ഘടകം ആട്ടിൻപാലായിരുന്നു. സ്വന്തം വീട്ടിലെ ഫാമിൽ നിന്ന് എടുക്കുന്ന ഘടകങ്ങൾ ഉപയോഗിച്ചായിരുന്നു സോപ്പ് നിർമ്മാണം.

Also Read : പ്രായമുള്ളവരെ പരിചരിക്കുന്ന ഉത്തരവാദിത്തമുള്ള ബിസിനസ്; എംബിഎക്കാരന്റെ വേറിട്ട വഴി
2017 മാർച്ചിലാണ് ക്രുതിക തന്റെ സംരംഭക യാത്ര ആരംഭിക്കുന്നത്. തുടക്കത്തിൽ 8,000 രൂപ മുതൽ 10,000 രൂപ വരെയാണ് നിക്ഷേപിച്ചത്. ക്ലാസിക് ഗോട്ട് മിൽക്ക് സോപ്പ്, അൺസെന്റഡ് ഗോട്ട് മിൽക്ക് സോപ്പ്, കുക്കുംബർ സോപ്പ്, കാരറ്റ് സോപ്പ് എന്നിങ്ങനെ വ്യത്യസ്തങ്ങളായ ഉല്പന്നങ്ങളാണ് തുടക്കത്തിൽ നിർമിച്ചത്.

തുടക്കത്തിൽ രണ്ട് ജോലിക്കാരാണ് ഉണ്ടായിരുന്നത്. എന്നാൽ ഏതാനും മാസങ്ങൾക്കുള്ളിൽത്തന്നെ കോയമ്പത്തൂരിൽ 1000 സ്ക്വയർ ഫീറ്റുള്ള നിർമാണ യൂണിറ്റ് ആരംഭിച്ചു. സോപ്പ്,ഷാമ്പൂ എന്നിവയുടെ നിർമ്മാണത്തിനായി ഏകദേശം 10 ലക്ഷം രൂപ നിക്ഷേപിച്ചു. ഇപ്പോൾ 100 ജോലിക്കാരാണ് സ്ഥാപനത്തിലുള്ളത്

കമ്പനി പ്രൈവറ്റ് ലിമിറ്റഡാക്കിയത് 2020 വർഷത്തിലാണ്. തുടർന്ന് ആദ്യ വർഷം തന്നെ 1 കോടി രൂപയുടെ വിറ്റുവരവ് നേടി. അവിടെ നിന്നും നിലവിൽ 29 കോടിയുടെ വിറ്റുവരവിലേക്കാണ് കമ്പനി എത്തി നിൽക്കുന്നത്. നിലവിൽ യുഎസ് അടക്കമുള്ള രാജ്യങ്ങളിലേക്ക് ഉല്പന്നങ്ങൾ കയറ്റുമതി നടത്തി ബിസിനസ് വർധിപ്പിക്കാനുള്ള ശ്രമത്തിലാണ് കമ്പനി.

Read Latest Business News and Malayalam News