വസ്ത്രങ്ങളാൽ നെയ്തു..കോടികൾ

വർഷം 2017. ഇ കൊമേഴ്സ് കമ്പനികളായ ഫ്ലിപ്കാർട്ടും, സ്നാപ് ഡീലും ഒന്നിക്കാൻ പോകുന്നു എന്ന വാർത്ത വന്ന സമയം. സ്നാപ് ഡീലിൽ സീനിയർ മാർക്കറ്റിങ് എക്സിക്യൂട്ടീവായി ജോലി ചെയ്തിരുന്ന അനുരാഗ് സിങ്ങിന് കമ്പനിയിലെ ജോലി സുരക്ഷയിൽ ആശങ്ക തോന്നി. മെർജിങ് നടന്നാൽ നിരവധി ആളുകൾക്ക് ജോലി നഷ്ടപ്പെടുമെന്ന അഭ്യൂഹങ്ങൾ ആ സമയത്തുണ്ടായിരുന്നു. ഭാര്യയായ റിംജിം ഹാഡയോട് ആലോചിച്ച് ജോലി രാജി വെക്കുകയും, ഇ-കൊമേഴ്സ് മേഖലയുമായി ബന്ധപ്പെട്ട് എന്തെങ്കിലും ബിസിനസ് ആരംഭിക്കാമെന്ന് ഇരുവരും തീരുമാനിക്കുകയും ചെയ്തു.

ഇരുവരും ജയ്പൂരിലേക്ക് താമസം മാറി. ആച്ചോ എന്ന പേരിൽ മോഡേൺ വുമൺ എത്ത്നിക് വെയർ ഫാഷൻ ബ്രാൻഡ് തുടങ്ങാനാണ് തീരുമാനിച്ചത്. മൂന്ന് ജോലിക്കാരുമായി 100 സ്ക്വയർ ഫീറ്റ് സ്ഥലത്താണ് ബിസിനസിന്റെ തുടക്കം. 10 ലക്ഷം രൂപയാണ് തുടക്കത്തിൽ നിക്ഷേപിച്ചത്. ഒരു തയ്യൽ മെഷീൻ മാത്രമാണ് തുടക്കത്തിൽ ഉണ്ടായിരുന്നത്.

2021-22 സാമ്പത്തിക വർഷത്തിൽ കമ്പനിയുടെ വിറ്റുവരവ് 40 കോടി രൂപയിലെത്തി. 25,000 സ്ക്വയർ ഫീറ്റ് സ്ഥലത്ത് 225 ജോലിക്കാരും, 150 തയ്യൽ മെഷീനുകളും എന്ന നിലയിലേക്ക് കമ്പനി വളർന്നു.

സിനിമാ മേഖലയുമായി ബന്ധപ്പെട്ട സെലിബ്രിറ്റികളും കമ്പനിയുടെ ഉപഭോക്താക്കളാണ്. 220 രാജ്യങ്ങളിലായി 5 ലക്ഷം സംതൃപ്തരായ ഉപഭോക്താക്കളാണ് ലോകാമാകെ വ്യാപിച്ചു കിടക്കുന്നത്.

സോഷ്യൽ മീഡിയയിലുള്ള പ്രൊമോഷനാണ് ബ്രാൻഡിന്റെ വളർച്ചയ്ക്ക് കൂടുതലായി സഹായിച്ചത്. ഇൻസ്റ്റഗ്രാമിലും, ഫെയ്സ്ബുക്കിലും നിരവധി ആളുകളാണ് കമ്പനിയെ ഫോളോ ചെയ്യുന്നത്. ഇൻസ്റ്റഗ്രാമിൽ മാത്രം 6 ലക്ഷം പേർ കമ്പനിയെ ഫോളോ ചെയ്യുന്നു

കുർത്ത സെറ്റുകൾ, ലെഹങ്ക, ഷറാറ, ഘാഗ്ര - കോളിസ്, സാരികൾ മുതലായ ഉല്പന്നങ്ങളാണ് ഹൈലൈറ്റ്. ഫോക്സ് ജ്വല്ലറി, ബാഗുകൾ, ഷൂ എന്നിവ 1000 രൂപ മുതൽ 10,000 രൂപ വരെയുള്ള വില നിലവാരത്തിൽ ലഭിക്കും.18 തരം വ്യത്യസ്ത ബാഗുകൾ ഒരുക്കിയിരിക്കുന്നു എന്നതും പ്രത്യേകതയാണ്.

ഉപഭോക്താക്കളുടെ ഭാഗത്തു നിന്നുള്ള ഫീഡ്ബാക്ക് എടുക്കാനും, അവരുടെ സംതൃപ്തിക്ക് ഒന്നാം സ്ഥാനം നൽകാൻ നിരന്തരം ശ്രദ്ധിക്കുന്നതാണ് തങ്ങളുടെ വിജയരഹസ്യമെന്ന് അനുരാഗ് പറയുന്നു.

തുടക്കത്തിൽ കാര്യങ്ങളെല്ലാം അനുരാഗും, ഭാര്യയും മാത്രമാണ് നോക്കിയത്. ഒരു കുഞ്ഞിന് ജന്മം നൽകുന്നതിന് തലേന്നു വരെയും, കുഞ്ഞ് ഉണ്ടായിക്കഴിഞ്ഞ് അ‍ഞ്ചു ദിവസം കഴിഞ്ഞ ഉടനേയും ജോലി ചെയ്ത ദിവസങ്ങളുണ്ട്. ആദ്യ കാലങ്ങളിൽ ഫോട്ടോ ഷൂട്ടുമായും, ഓർഡറുകൾ മാനേജ് ചെയ്യുന്നതുമായും ബന്ധപ്പെട്ട് തുടർച്ചയായ മണിക്കൂറുകൾ ഇരുവരും ജോലി ചെയ്തു.