മ്യൂച്വൽ ഫണ്ടുകളിൽ തവണകളായി ചെറിയ തുക വീതം നിക്ഷേപിച്ച് ദീർഘകാലത്തിൽ സമ്പത്ത് സ്വരുക്കൂട്ടാൻ സഹായിക്കുന്ന പദ്ധതിയാണ് സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ അല്ലെങ്കിൽ എസ്ഐപി. മികച്ച ഫണ്ടുകൾ ലാഭകരമായ വരുമാനം വാഗ്ദാനം ചെയ്യാറുണ്ട്. എന്നാൽ മ്യൂച്വൽ ഫണ്ടുകളിലെ നിക്ഷേപങ്ങൾ വിപണിയിലെ ചാഞ്ചാട്ടവുമായി ബന്ധപ്പെട്ടതാണ്. അതുകൊണ്ടു തന്നെ മ്യൂച്വൽ ഫണ്ടുകളിൽ പലതും ഉയർന്ന അപകടസാധ്യതയുള്ളവയുമാണ്. ഈ അപകട സാധ്യതക്ക് അനുസരിച്ചുള്ള റിട്ടേൺ വാഗ്ദാനം ചെയ്യുന്ന ഫണ്ടുകളുമുണ്ട്. ചില മ്യൂച്വൽ ഫണ്ടുകളിൽ എല്ലാ മാസവും 500 രൂപയിൽ നിന്ന് പോലും എസ്ഐപി നിക്ഷേപം ആരംഭിക്കാൻ ആകും. പരമ്പരാഗത നിക്ഷേപങ്ങളുമായി താരതമ്യപ്പെടുത്തുമ്പോൾ ഈ നിക്ഷേപങ്ങൾക്ക് ഉയർന്ന റിസ്ക് ഉണ്ട് എന്ന് ഓർത്തിരിക്കണം എന്നു മാത്രം.
1. ക്വാണ്ട് ടാക്സ് പ്ലാൻ- ഡയറക്ട് ഗ്രോത്ത് ഫണ്ട്. ഈ വർഷം മികച്ച നേട്ടം നൽകിയ ഫണ്ടുകളിൽ ഒന്നാണിത്. ഏറ്റവും ഉയർന്ന റിട്ടേൺ ആണ് അഞ്ച് വർഷങ്ങളിൽ നൽകിയത്. മികച്ച വളർച്ചാ സാധ്യതയുള്ള ഈ ഫണ്ട് ഇക്വിറ്റി ലിങ്ക്ഡ് സേവിംഗ്സ് സ്കീം ആണ്. കൂടാതെ വിലയേറിയ ലോഹങ്ങൾ, സാമ്പത്തിക മേഖല, ഊർജ്ജ മേഖല എന്നിങ്ങനെയുള്ള വിവിധ മേഖലകളിൽ ആയാണ് നിക്ഷേപം. ദീർഘകാലത്തിൽ മൂലധനം നൽകാൻ ലക്ഷ്യമിടുന്നു. കഴിഞ്ഞ ഒരു വർഷത്തിനുള്ളിൽ 13 ശതമാനത്തിലധികം റിട്ടേൺ നൽകി. കഴിഞ്ഞ അഞ്ചു വർഷ കാലയളവിൽ 26 ശതമാനത്തിലധികം വരുമാനമാണ് നൽകിയത്.
ഇൽഎസ്എസ് ആയതിനാൽ 1961 ലെ ആദായനികുതി നിയമത്തിലെ സെക്ഷൻ 80സി പ്രകാരം 1.5 ലക്ഷം രൂപ വരെ നികുതി കിഴിവുകളും വാഗ്ദാനം ചെയ്യുന്നുണ്ട്. 2018-ൽ ആരംഭിച്ചതുമുതൽ എസ്ഐപി നിക്ഷേപകർക്കും മികച്ച വരുമാനം നൽകിയിട്ടുണ്ട്. മാനേജ്‌മെന്റിന് കൈകാര്യം ചെയ്യുന്ന ആസ്തി 2,692 കോടി രൂപയാണ്. ചെലവ് അനുപാതം 0.57 ശതമാനവും.
2. പിജിഐഎം ഇന്ത്യ മിഡ്‌ക്യാപ് ഓപ്പർച്യുണിറ്റീസ് ഫണ്ട്
പിജിഐഎം ഇന്ത്യ മിഡ്‌ക്യാപ് ഓപ്പർച്യുണിറ്റീസ് ഫണ്ട് 2013 നവംബർ 11-ന് അവതരിപ്പിച്ച ഫണ്ടാണ്. കാലക്രമേണ ഗണ്യമായ മൂലധന നേട്ടം ഉണ്ടാക്കുക എന്നതു തന്നെയാണ് ലക്ഷ്യം. ഉപഭോക്തൃ ഉത്പന്ന മേഖല ഉൾപ്പെടെ വവിധ മേഖലകളിൽ നിക്ഷേപമുണ്ട്. ഉയർന്ന അപകടസാധ്യത ഉണ്ടായിരുന്നിട്ടും, കഴിഞ്ഞ അഞ്ചു വർഷത്തിനുള്ളിൽ ഈ ഫണ്ട് 20 ശതമാനത്തിലധികം റിട്ടേൺ നൽകി. ഫണ്ട് കൈകാര്യം ചെയ്യുന്ന മൊത്തം ആസ്തി 7,558 കോടി രൂപയാണ്, ചെലവ് അനുപാതം 0.44 ശതമാനമാണ്.