എസ്ഐപി നിക്ഷേപം 2023; മികച്ച മ്യൂച്വൽ ഫണ്ടുകളെ എങ്ങനെ കണ്ടെത്തും?

മ്യൂച്വൽ‌ ഫണ്ട് നിക്ഷേപത്തിലേക്ക് കൂടുതൽ ആളുകൾ കടന്നു വന്നു കൊണ്ടിരിക്കുന്നു. ഇക്വിറ്റി, ഡെറ്റ്, ഹൈബ്രിഡ്, മൾട്ടി അസറ്റ്, ഫ്ലെക്സി ക്യാപ്, ഫിക്സഡ് മെച്യൂരിറ്റി ഫണ്ടുകൾ, ടാക്സ് സേവിങ് ഫണ്ടുകൾ, ലിക്വിഡിറ്റി ബേസ്ഡ് ഫണ്ടുകൾ തുടങ്ങി നിരവധി ഫണ്ടുകൾ ഇന്ന് ലഭ്യമാണ്. വിശാലമായ സെക്ടറിൽ നിന്ന് മികച്ച പ്രക്ടനം നടത്തുന്ന ഫണ്ടുകളെ തിരഞ്ഞെടുക്കുകയാണ് നിക്ഷേപകൻ ചെയ്യേണ്ടത്. ഇവിടെ ശ്രദ്ധിക്കേണ്ട കാര്യങ്ങൾ താഴെ നൽകിയിരിക്കുന്നു.

നിങ്ങളുടെ നിക്ഷേപ ലക്ഷ്യവും റിസ്കെടുക്കാനുള്ള ശേഷിയും
ഒരു മ്യൂച്വൽ ഫണ്ട് തെരഞ്ഞെടുക്കുന്നതിനു മുമ്പ് നിങ്ങളുടെ നിക്ഷേപലക്ഷ്യവും റിസ്ക് എടുക്കാനുള്ള ശേഷിയും പരിഗണിക്കേണ്ടതാണ്. ഇത് വിശാലമായ മ്യൂച്വൽ ഫണ്ട് ശ്രേണിയിൽ നിങ്ങൾക്ക് ഉപകാരപ്പെടുന്ന ഫണ്ടുകളിലേക്ക് ശ്രദ്ധ കേന്ദ്രീകരിക്കാൻ സഹായിക്കും.

കഴിഞ്ഞ കാല പ്രകടനം വിലയിരുത്തുക
വ്യത്യസ്ത കാലയളവുകളിലുള്ള മ്യൂച്വൽ ഫണ്ടുകളുടെ പ്രകടനം വിലയിരുത്തുക. ഉദാഹരണത്തിന് 1 വർഷം, 3 വർഷം, 5 വർഷം, 10 വർഷം തുടങ്ങിയ കാലയളവുകൾ പരിഗണിക്കാവുന്നതാണ്. എന്നാൽ കഴിഞ്ഞ കാല പ്രകടനങ്ങൾ ഭാവിയിൽ ആവർത്തിക്കണമെന്നില്ല എന്നത് ശ്രദ്ധിക്കാം. എന്നാൽ വ്യത്യസ്ത വിപണി സാഹചര്യങ്ങളിൽ ഫണ്ട് എത്തരത്തിൽ പ്രകടനം നടത്തിയെന്ന് വിലയിരുത്താൻ ഈ സമീപനം സഹായിക്കും.

Also Read : സാമ്പത്തിക ലക്ഷ്യങ്ങൾ നേടാം, എസ്ഐപി നിക്ഷേപങ്ങളിലൂടെ
ഫണ്ടിന്റെ നിക്ഷേപ തന്ത്രം വിശകലനം ചെയ്യുക
മ്യൂച്വൽ ഫണ്ടിന്റെ നിക്ഷേപ തന്ത്രം വിലയിരുത്തുകയും, അത് നിങ്ങളുടെ നിക്ഷേപ ലക്ഷ്യങ്ങളുമായി എത്തരത്തിൽ യോജിക്കുന്നു എന്ന് പരിശോധിക്കുകയും ചെയ്യാം. ഫണ്ടിന്റെ നിക്ഷേപ ഫിലോസഫി, നിക്ഷേപം നടത്തിയിരിക്കുന്ന വിവിധ തരം കമ്പനികൾ, ഫണ്ട് മാനേജർമാരുടെ ട്രാക്ക് റെക്കോർ‍ഡ് തുടങ്ങിയ വിവരങ്ങൾ ഇവിടെ പരിഗണിക്കാവുന്നതാണ്.

ചിലവ് അനുപാതം പരിശോധിക്കുക
ഫണ്ട് മാനേജ് ചെയ്യുന്നതിന് ആവശ്യമായ ചിലവാണ് മ്യൂച്വൽ ഫണ്ട് ചാർജുകൾ. കുറഞ്ഞ ചിലവ് അനുപാതമുള്ള ഫണ്ടുകൾ തിര‍ഞ്ഞെടുക്കാൻ ശ്രദ്ധിക്കുന്നത് നേട്ടം നൽകിയേക്കും. ഇവ ദീർഘകാലത്തിൽ മികച്ച പ്രകടനം നടത്താൻ സാധ്യതയുണ്ട്.

ഇവ കൂടാതെ വിവിധ ഫണ്ടുകൾ തിര‍ഞ്ഞെടുക്കാനും, നിക്ഷേപങ്ങളിൽ വൈവിധ്യവൽക്കരണം കൊണ്ടുവരാനും ശ്രമിക്കാവുന്നതാണ്.

Read Latest Business News and Malayalam News