നിസാൻ്റെ ആഗോളഗവേഷണകേന്ദ്രം ടെക്നോപാ‍ര്‍ക്കിൽ

തിരുവനന്തപുരം: ഇലക്ട്രിക് വാഹനനിര്‍മാണരംഗത്തും ഡ്രൈവര്‍രഹിത കാറുകളുടെ ഗവേഷണത്തിലും ലോകത്ത് മുന്നിട്ടു നിൽക്കുന്ന നിസാൻ മോട്ടോഴ്സിന്‍റെ ആഗോളഗവേഷണസ്ഥാപനം ടെക്നോപാര്‍ക്കിൽ ആരംഭിക്കുന്നു. ഇലക്ട്രിക് വാഹനമായ ലീഫ്, ഡ്രൈവര്‍ രഹിത ടാക്ടി വാഹനമായ ഈസിറൈഡ് എന്നീ പദ്ധതികള്‍ക്ക് വേണ്ടി ഗവേഷണം നടത്താനായി കമ്പനി സ്ഥാപിക്കുന്ന നാല് നിസാൻ ഗ്ലോബൽ ഡിജിറ്റൽ ഹബ്ബുകളിലൊന്നാണ് ടെക്നോപാര്‍ക്കിൽ സ്ഥാനം പിടിക്കുന്നത്.

വാഹനനിര്‍മാണരംഗത്ത് ചെന്നൈ എന്നതുപോലെ ഡ്രൈവര്‍രഹിത കാര്‍ ഗവേഷണരംഗത്ത് തിരുവനന്തപുരത്തെ രാജ്യത്തിന്‍റെ കേന്ദ്രമാക്കുകയാണ് സംസ്ഥാനസര്‍ക്കാരിന്‍റെ ലക്ഷ്യം. ആര്‍ട്ടിഫിഷ്യൽ ഇന്‍റലിജൻസ് ഉള്‍പ്പെടെയുള്ള സാങ്കേതികവിദ്യകള്‍ ഉപയോഗിച്ച് നിസാൻ പുതിയ ഉത്പന്നങ്ങളും സേവനങ്ങളും ഗവേഷണം ചെയ്ത് വികസിപ്പിക്കുന്നതിന് തലസ്ഥാനം വേദിയാകും. ഏകദേശം 5000 ഹൈ പ്രൊഫൈൽ തൊഴിലവസരങ്ങളായിരിക്കും ഇവിടെ സൃഷ്ടിക്കപ്പെടുക. ആദ്യ ഘട്ടത്തിൽ 500 പേര്‍ക്ക് തൊഴിൽ ലഭിക്കും.

മുഖ്യമന്ത്രി പിണറായി വിജയന്‍റെ നിര്‍ദേശപ്രകാരം ഐടി സെക്രട്ടറി എം ശിവശങ്കര്‍, ടെക്നോപാര്‍ക്ക് സിഇഓ ഋഷികേശ് നായര്‍, കെ-ഡിസ്ക് ചെയര്‍മാൻ കെ എം എബ്രഹാം എന്നിവര്‍ ജപ്പാനിലെ നിസാൻ ആസ്ഥാനത്തെത്തി കമ്പനി പ്രതിനിധികളുമായി കൂടിക്കാഴ്ച നടത്തുകയും തിരുവനന്തപുരത്ത് ഹബ് തുടങ്ങിയാലുള്ള നേട്ടങ്ങളെപ്പറ്റി പ്രത്യേക അവതരണം നടത്തുകയും ചെയ്തിരുന്നു. ഇതിനു ശേഷം നിസാന്‍റെ ഉന്നതതലസംഘം തിരുവനന്തപുരത്തെത്തി നിസാൻ സിഇഓ ആന്‍റണി തോമസിന്‍റെ നേതൃത്വത്തിൽ കേന്ദ്രമന്ത്രി അൽഫോൺസ് കണ്ണന്താനം, ശശി തരൂര്‍ എംപി എന്നിവരുമായി കൂടിക്കാഴ്ച നടത്തി.


നിലവിൽ ലോകത്ത് ഏറ്റവുമധികം വിൽക്കപ്പെടുന്ന ഇലക്ട്രിക് വാഹനങ്ങളിലൊന്നാണ് നിസാൻ ലീഫ്. ആര്‍ട്ടിഫിഷ്യൽ ഇന്‍റലിജൻസ് ഉപയോഗിച്ച് ഡ്രൈവര്‍ ഇല്ലാതെ ഓടുകയും യാത്രക്കാരോട് സംവദിക്കുകയും ചെയ്യുന്ന ഈസിറൈഡ് ടാക്സി പദ്ധതി, നിസാൻ ലീഫ് എന്നിവയുടെ ഗവേഷണമായിരിക്കും തിരുവനന്തപുരം ടെക്നോപാര്‍ക്കിലെ കേന്ദ്രത്തിൽ നടക്കുക.